ۋكراينا سوعىسى پوزيتسيالىق نەگىزگە ءوتتى. تاراپتار قىسقى مەزگىلگە دايىندالۋدا. جىلى كيىم، جانارماي جانە وق-ءدارى قورىن ارتتىرۋ ۇستىندە. ۇرىس دالاسىندا ارتيللەريالىق سوققى الماسۋ، زىمىران سوققىلارىن جاساۋ جۇزەگە اسۋدا.

ۋكراينا اسكەرى ازات ەتكەن حەرسوندا قيناۋ ورىندارى انىقتالۋدا. ۋكراينا قۇقىق قورعاۋ ورگاندارى حەرسوندا 4 قيناۋ ورىنى بولعانىن انىقتادى. باسقىنشىلار قالانى باسىپ العان ساتتە ۋكراينانى جاقتايتىن جەرگىلىكتى حالىقتى قۋدالاعان.

حالىقارالىق ساراپشىلار مەن اسكەري ۇيىمدار رەسەيدىڭ ساتسىزدىگى جايلى ايتۋدا. ناتو توراعاسى يەنس ستولتەنبەرگ رەسەي قاتەلىك ۇستىنە قاتەلىك جاساپ جاتقانىن ايتۋدا. "پۋتين ۋكراينانى بىرنەشە كۇن ىشىندە جەڭەمىن دەپ ويلاعان ەدى. توعىز اي وتكەن سوڭ رەسەي ساتسىزدىك ۇستىنە ساتسىزدىككە ۇشىراۋدا. ۋكراينا ءوز جەرىن ازات ەتۋدى جالعاستىرىپ جاتىر. جاقىن كۇندەرى حەرسوندى ازات ەتتى", - دەدى ستولتەنبەرگ.

ناتو ۋكرايناعا كومەك بەرۋدى ەسەلەپ ارتتىرۋ كەرەكتىگىن دە باس ايتتى. ددسۇ بولجامى بويىنشا بيىل قىس ۋكرايندىقتار ءۇشىن وتە قيىن بولماق. رەسەي ۋكراينا بيلىگىن ءتيىمسىز كەلىسسوزدەرگە كوندىرۋ ءۇشىن ۋكراينانىڭ ينفراقۇرىلىمدارىنا سوققى جاساۋدا. جارىق، سۋ جانە جىلۋ جزۇيەلەرىنە سوققى جاسالىپ، 40 پايىزعا جۋىق ينفراقۇرىلىم كەشەنى ىستەن شىققان. ونداعان ميلليون ۋكرايندىق جىلۋ مەن جارىقسىز قالۋدا. كيەۆ بيلىگى ۋكرايندىقتاردى كوكتەم باستالعانشا ىڭعايى كەلسە اۋىلدىق ايماققا كوشۋگە شاقىردى. ددسۇ ۋكراينا اۋماعىن اتقىلاۋدىڭ سالدارىنان جۇزدەگەن ەمحانا مەن اۋرۋحانا ىستەن شىققانىن ايتادى. بۇل ناۋقاستاردى ەمدەۋدە ۇلكەن كەدەرگى كەلتىرۋدە.

ۇرىس دالاسىندا رەسەي اسكەرى باحمۋتتى باسىپ الۋعا تىرىسۋدا. باحمۋت ماڭىنداعى ۇرىستاردىڭ جالعاسىپ جاتقانىنا ءتورت ايدان استى. موبيليزاتسيالانعانداردىڭ باسىم كوپشىلىگى وسى باعىتتاعى شابۋىلدارعا قاتىسۋدا. The Guardian باسىلىمىنىڭ جازۋىنشا حەرسون ماىنداعى قوقىس ورتەۋ پوليگونىندا باسقىنشىلار ءوز ساربازدارىنىڭ مۇردەسىن ورتەگەن. حەرسوندى رەسەي اسكەرى زىمىران سوققىسىنىڭ استىنا الۋدا. بىرنەشە بەيبىت تۇرعىن قازا تاۋىپ، بىرنەشە نىسان ۇيىندىگە اينالدى.

ۋكراينانى حالىقارالىق دەيگەدە قولداۋ ارتۋدا. نورۆەگيا ۋكراينانى قىس مەزگىلىندە گازبەن قامتاماسىز ەتۋ ءۇشىن 190 ملن دوللار قارجى بولمەك. ناتو-نىڭ پارلامەنتتىك اسسامبلەياسى ارنايى رەزوليۋتسيا قابىلداپ، "رەسەيدى لاڭكەستىك ەل" دەپ تانۋدى ۇسىندى. ليۋكسەمبۋرگ ۋكرايناعا  HMMWV بروندى كولىكتەرىن تابىستادى.

ۋكراينا اسكەرى قىستا شابۋىل قارقىنىن باسەڭدەتپەيتىنىن ايتۋدا. شابۋىل قارقىنىن باسەڭدەتۋ رەسەي اسكەرىنىڭ بەكىنىپ الۋىنا مۇمكىندىك بەرۋى مۇمكىن.

Abai.kz