رەسەي پرەزيدەنتى ۆلاديمير پۋتين 7-جەلتوقسان كۇنى ازاماتتىق قوڭعامدى دامىتۋ جانە ادام قۇقىعى ماسەلەسى بويىنشا كەڭەستىڭ وتىرىسىنا قاتىستى. ارينە، ونلاين رەجيمدە. پۋتين سوڭعى ءبىر جىل ىشىندە جزەكە باس قاۋىپسىزدىگىنە الاڭداپ، كوپتەگەن شارالاردا تەك قانا ونلاين باس كورسەتىپ جۇرگەن جايى بار. سەبەبى دە تۇسىنىكتى. 

كەڭەستىڭ اتاۋى عانا ادام قۇقىعى مەن ازاماتتىق قوعڭامعا قاتىستى بولدى، ال تالقىلانعان ماسەلە سول باياعى دونباسس، ۋكراينا سوعىسى، ويدان شىعارىلعان ۋكرايناداعى ناتسيزم مەن وزبىر باتىس اياسىندا ءوربىدى. رەسەي باسشىسى ادەتتەگىدەي كەڭەس الاڭىن ءوز مالىمدەمەلەرىن ايتۋ ماقساتىندا قولداندى.

"ارنايى وپەراتسيا وتكىزۋ ايماعىندا ارينە بىرقاتار ماسەلەلەر بار. قازىر دە بار دەسەك بولادى. وپەراتسيا وتكىزىپ جاتقان اۋماقتا كەز كەلگەن ساتتە ءتۇرلى ماسەلە پايدا بولۋى ىقتيمال كانداي ماسەلە تۋىنداۋى مۇمكىن دەگەن سۇراق اياسىندا ۇنەمى ساراپتاما جاساپ وتىرۋ قاجەت.  

مىسالى ۇرىس دالاسىندا ءوز پوزيتسياسىن تاستاپ كەتەتىن جايتتار بولادى. ۋكراينادا ول ءۇشىن بىردەن اتىپ تاستايدى. ساپقا تۇرعىزىپ، جاپپاي اتىپ تاستاعان جايتتار از ەمەس. ونى بارلىعى بىلەدى، بۇل قۇپيا اقپارات ەمەس قوي. ال بىزدە ارينە ونداي جوق. بىزدە ءتىپتى ەشقانداي دا لاگەر، ارنايى جازالاۋ ايماقتارى دا جوق. تەك وسى تاقىرىپ اياسىندا فەك اقپاراتتار عانا بار. بىزدە دە ۇرىس دالاسىندا ءوز پوزيتسياسىن تاستاپ كەتەتىندەر بولادى. بىراق قازىر ولاردىڭ سانى وتە از. بەيبىت ومىردەن ۇرىس دالاسىنا اتتانۋ وڭاي ەمەس، ادامي تۇرعىدان ونداي جەكەلەگەن جايتتاردى تۇسىنۋگە بولادى", - دەيدى رەسەي باسشىسى.

رەسەيدە قوسىمشا موبيليزاتسيا ءجۇرۋى مۇمكىن دەگەن جاڭالىق جەلدەي ەسىپ ءجۇر. بۇل تۋرالى دا پۋتين اقپارات بەردى. بىلاي دەيدى: "ەندى بولۋى مۇمكىن موبيليزاتسيا جايلى قاۋەسەتتەرگە جاۋاپ بەرسەم. بىزدە 300 مىڭ ادام موبيليزاتسيالانىپ، ولاردىڭ 150 مىڭى ارنايى وپەراتسيا ايماعىنا جىبەرىلدى. ولاردىڭ ىشىندە 77 مىڭى مايدان دالاسىندا ءجۇر، ال قالعاندارى اۋماقتىق قورعانىس قۇرامىندا نەمەسە ءالى دە ارنايى وپەراتسيا ءوتىپ جاتقان ايماقتاعى اسكەري قويمالاردا، بازالاردا قىزمەت ەتۋدە.

قالعان 150 مىڭ ادام ءالى دە پوليگونداردا جاتتىعىپ جاتىر. ولاردى اسكەري رەزەرۆ دەپ اتاساق دۇرىس بولاتىن شىعار. ءدال وسىنداي جاعدايدا بۇگىنگى كۇنى قوسىمشا موبيليزاتسيا جۇرگىزۋدىڭ ەش قاجەتتىلىگى جوق".

ول بۇل سوعىستاعى جەتىستىكتى دە اتاپ وتكەن بولدى. "ارنايى وپەراتسيا وتە ۇزاققا سوزىلۋى مۇمكىن. دەگەنمەن بىزدە جاڭا ايماقتار پايدا بولدى، بۇل ايتارلىقتاي ناتيجە. نەسىن جاسىرامىز، ازوۆ تەڭىزى ەندى رەسەي فەدەراتسياسىنىڭ ىشكى تەڭىزىنە اينالدى", - دەدى پۋتين.

پۋتين سوعىسقا ۋكراينانىڭ ءوزى كىنالى دەيدى. "سوعىستى ءبىز باستاعان جوق ەدىك. 2014 جىلى ۋكراينادا توڭكەرىس بولىپ، سوعىس وتىن كيەۆ جاقتى. ۋكراينادا توڭكەرىس ارقىلى بيلىككە دونباسستاعى حالىقتى تۇنشىقتىرۋشى كۇشتەر كەلدى", - دەيدى ول.

سوڭعى ۋاقىتتا ۋكرايناداعى اسكەري جەڭىلىستەردەن كەيىن رەسەي باسشىسى يادرولىق قارۋعا قاتىستى بىرنەشە مالىمدەمە جاساپ، تاكتيكالىق يادرولىق قارۋ قولدانۋ مۇمكىندىگىن ارتتىرعان بولاتىن. الايدا باتىستىڭ ول مالىمدەمەلەرگە قاتىستى ەسكەرتپەسى وتە قاتاڭ بولدى. ال پۋتين كەشە بىلاي دەدى: ء"بىز ەسىمىزدەن اداسقان جوقپىز، يادرولىق قارۋدىڭ نە ەكەنىن جاقسى تۇسىنەمىز.  ءبىزدىڭ يادرولىق كۇشتەرىمىز الەمدەگى ەڭ قۋاتتى، بۇل دالەلدەۋدى قاجەت ەتپەيتىن فاكت. يادرولىق قارۋدى ءبىز قورعانىس ماقساتىندا عانا قولدانامىز".

وسىلايشا پۋتين ازاماتتىق قوعام مەن ادام قۇقىعى تالقىلانۋعا ءتيىس جيىندى سوعىس ماسەلەسىن تالقى ەتكەن وتىرىسقا اينالدىرىپ، باتىستى ايىپتاپ قالۋدىڭ تاعى ءبىر مۇمكىندىگىن ءمۇلت جىبەرمەدى.

كا مىرزا

Abai.kz