پرەزيدەنت توقاەۆتىڭ جەتى جىلدىق مەرزىمگە قايتا سايلانعاننان كەيىنگى العاشقى ساياسي ارەكەتى وبلىس پەن قالا اكىمدەرىن تاعايىنداۋ بولدى. ەسكى ءۇردىس جالعاسىن تاۋىپ، ءبىر-ەكى ۇمىتكەر كانديداتتى جەرگىلىكتى ماسيليحاتتار داۋىسقا سالىپ سايلاعان كەيىپ تانىتتى.

قىس قاھارى باستالعاندا قىرسىققانداي رەيدەر، ەكىباستۇزدا جىلۋ قۇبىرلارى جارىلىپ، جۇرت اۋرە-سارساڭعا تۇسكەن شاقتا، پرەزيدەنتتىڭ تاعايىنداعان اكىمدەرىن بىردەن قولدادى دەپ ايتا المايمىز. اسىرەسە، «ديۆان ساراپشىلارىنىڭ» اڭىسى سۇراپىل بولدى. نازارباەۆ كەزىندە بيلىكتە اۋىس-ءتۇيىس بولعاندا ايتىلاتىن «قوسىلعىشتاردىڭ ورىنى اۋىسقانىمەن، قوسىندىنىڭ ءمانى وزگەرمەيدى» مىسقىلى وسى جولى دا قايتالاندى.

شىمكەنت قالاسىنىڭ اكىمى مۇرات ايتەنوۆ پەن شىعىس قازاقستان وبلىسىنىڭ اكىمى دانيال احمەتوۆتىڭ ورىنىندا قالعانىنا الەۋمەتتىك جەلى بەلسەندىلەرى جاپپاي قارسىلىق تانىتتى. جاقىندا وتكەن ۇكىمەتتىڭ كەڭەيتىلگەن وتىرىسىندا پرەزيدەنتتىڭ «ديۆان ساراپشىلارىن» ەلەمەۋ جايىندا شەنەۋنىكتەرگە قاراتا ايتقان سوزىنە وسى جايتتەر تۇرتكى بولدى دەپ ويلايمىز.

الەۋمەتتىك جەلىدە ايتىس-تارتىستىڭ ورشۋىنە ورىنىن بوساتپاعان اكىمدەر عانا ەمەس، وتكەن جىلى توقاەۆتىڭ جارلىعىمەن II دارەجەلى «دوستىق» وردەنىمەن ماراپاتتالعان رەسەيدىڭ قازاقستانداعى ەلشىسى الەكسەي بوروداۆكيننىڭ اتىشۋلى سۇحباتى دا سەبەپكەر بولدى.

ەلشىنىڭ: «قازاقستاندى اسىرە ۇلتشىلدىق جايلاپ الدى. قازاقستاندىقتار ەكى اياعىن تەڭ باسۋى ءۇشىن مەملەكەتتىك ءتىل مەن ورىس ءتىلىن قاتار الىپ ءجۇرۋى كەرەك»، - دەگەن ماعىنادا ايتقان سوزدەرى «ديۆان ساراپشىلارىنىڭ» اشۋىن تۋدىردى.

كوروناۆيرۋسپەن بىرگە ەلىمىزدە دۇركىن-دۇركىن رەسەي ساياساتكەرلەرىنىڭ قاڭقۋ سوزدەرى جاڭعىرىپ، ەلدىڭ كوڭىلىن الاڭداتىپ قويعانى بەلگىلى. اكىمدەرگە ارىستانداي اقىرعان «ديۆان باتىرلارى» ورىس ەلشىسىنەن دە قايمىعىپ قالمادى. «جامان ءۇيدى قوناعى بيلەيدى» دەگەنى مە، ءمۇنىسى نەسى؟! تاۋبەسىنە كەلتىرەيىك»، دەگەندەي ورىس ەلشىسىن ەلدەن شىعارۋ تۋرالى پەتيتسيا جاريالادى.

بۇدان بۇرىن ۋكراينانىڭ قازاقستانداعى ەلشىسى ايدالاداعى ورىسقا قاراتا ايتقان ءبىر اۋىز ءسوزى ءۇشىن قازاقستاننان كەتكەن ەدى. پرەزيدەنتتىڭ «ديۆان ساراپشىلارى» جايىندا ايتقان ءسوزىنىڭ استارىنا ۇڭىلسەك، بەلسەندىلەردىڭ كەزەكتى نارازىلىعى دا ەسكەرۋسىز قالاتىنى ايدان انىق ەدى. تاعى ءبىر جاعىنان ورىس ەلشىسىنىڭ جوعارىداعى ءسوزى انا ءتىلىنىڭ ءوز وتانىنداعى مۇشكىل حالىنە نارازى جۇرتتىڭ نامىسىنا تيگەنىمەن، پرەزيدەنت توقاەۆتىڭ ءپۋتيننىڭ باتاسىن العان حالىقارالىق ورىس ءتىلىن دامىتۋ قورىن قۇرۋ يدەياسىمەن ۇندەسىپ جاتقانىن باسا ايتۋمىز كەرەك.

ايتىپ-ايتپاي الەۋمەتتىك جەلى بىزدە عانا ەمەس، دەموكراتيالى باتىستا دا ساياساتكەرلەردىڭ باس اۋرۋىنا اينالىپ وتىرعانى بەلگىلى. ينتەرنەت الپاۋىتتارىمەن اشىق ايقاسقا تۇسكەن امەريكانىڭ ەكس-پرەزيدەنتى ترامپ قايتا سايلانۋ ورايىنان ايىرىلدى. سوڭعى بىرنەشە جىلدا جۇرت ىڭعايىنا باعىپ كەلگەن اقوردا ەندى قاتاڭ كەيىپكە ەنەتىن سياقتى. ال ينتەرنەت پايدالانۋشىلار كەرىسىنشە باتىل وپپوزيتسياسى جوق، بۇقارالىق اقپارات قۇرالدارى مەن باسپالارى ۇكىمەتتىڭ تەندەرىنە تەلمىرىپ وتىرعان ەلدە الەۋمەتتىك جەلىنىڭ بىردەن ءبىر پىكىر تالاس مىنبەرىنە، بيلىكپەن ديالوگ الاڭىنا اينالىپ وتىرعانىن العا تارتۋدا.

ەسبول ۇسەنۇلى

Abai.kz