جۇما, 19 شىلدە 2024
46 - ءسوز 3138 4 پىكىر 26 جەلتوقسان, 2022 ساعات 13:21

مەن جازباسام بولمايتىن بولدى

قايتۋ

قارلى تاۋ اراسىنداعى كوشتەن،

اداسىپ قالعان توبەت-

ءوزىنىڭ اڭعالدىعىنا نالىپ،

ۇلىدى كەنەت.

 

اينالا ىمىرت ءۇيىرىلىپ،

ۇيتقىيدى اقتۇتەك بوران.

جەكە ءبىر ۇيشىگىڭ بولماسا دا،

قايدا الگى جىپ-جىلى قوراڭ.

 

قوڭتورعايلاۋ يەسى مۇنى،

قايىرىلىپ ىزدەگەن دە شىعار.

الدە باسقا يت تاۋىپ الدى ما؟

قاسقىر كەلگەندە سىنار.

 

باي اۋىلىنىڭ تازىلارىنا

ىلەسىپ نەڭ بار ەدى.

سەنى جولدان قالدىرعان -

مايلى جىلىكتىڭ الەگى.

 

الدىڭ تۇمان، ارتىڭ مۇز،

ال، ەندى سەن نەتپەكسىڭ؟

قاي يەڭدى پانالاپ،

قايدا ساپار شەكپەكسىڭ؟!

 

...ەسكى جۇرتقا تارتارسىڭ،

نار تاۋەكەل بەكىنىپ.

باسقا قىلار قايران جوق.

ۇلىعانمەن وكىنىپ.

 

كوشتەن اداسىپ كەتكەنىڭ دە

نەگىزى - دۇرىس بولدى.

تاۋىپ الدىڭ مىنە -

تۋعان جەرگە اپاراتىن جولدى.

 

ايتسە دە، يەسىز قالعان جۇرتتاعى،

قورقاۋلار سيعىزار ما؟

"بوپتى. جولاي ءوزىم سىندى

اداسقانداردى جيىپ،

تارتايىن سول بار تاۋعا!"

 

تاۋەلسىزدىك

شىڭىراۋدا قالعان سوڭعى تامشىداي باعالى،

جارلىنىڭ العاش تونىنداي كيگەن جاعالى.

مىڭ جىلدىق شولگە نوسەر بوپ قۇيعان تەلەگەي،

ارالدا قالعان جالعىزعا جاقىنداعان كەمەدەي.

كۇركىرەپ كوشكىن قۋعاندا دالدا بوپ قالعان توبەدەي،

انام ءبىر جايعان ورەدەي.

قىمباتسىڭ عوي سەن ماعان!

 

تەرەزەنى تىرمالاپ اناسىن كۇتكەن سابيدەي،

تاتار ءدامى بىتكەندە كوزدى ارباعان پانيدەي.

ماحابباتقا ءماجنۇن بوپ جان باۋراعان سىيقىرلى،

شىمىر-شىمىر جايىلىپ بۋىندى العان كۇي سىندى.

مەن بولتىرىك، سەن ەنە جەلدەن اۋلاپ ءيسىڭدى -

ۇمتىلدىم عوي مەن ساعان!

 

ايالاعان جەتىمدى الاقاننىڭ تابىنداي،

ۇزىلگەندە تىرسەگىم ۇستاپ تۇرعان تامىرداي.

قۇيرىعىممەن ۇشقاندا، قانات بولعان تالدىرماي،

كوكتەمدى اڭساپ كەلگەندە، شالقىپ جاتقان ايدىنداي.

عاسىرلىق تاس تۇنەكتى جارىپ وتكەن جاسىنداي،

كەشەگى وتكەن قابلان ەر كەنەنىڭ عازيز باسىنداي! -

قاستەرلىسىڭ سەن ماعان!

 

تامىرىم قاڭسىپ قالعاندا، قانىپ ىشكەن ءشارباتتاي،

تامۇقتا كۇيىپ جاتقاندا، جارق ەتە قالعان ءجانناتتاي.

شام تۇبىندە جىمىڭداپ ورامال تىككەن سۇلۋداي،

تاۋدىڭ ءيىسى اڭقىعان اكەمنەن قالعان جىلۋداي.

قىزىر جايلاپ جاتاتىن اتامنىڭ قۇتتى تورىندەي،

كۇننىڭ ءيىسى اڭقىعان اجەمنەن قالعان مەيىردەي،-

ىستىقسىڭ عوي سەن ماعان!

 

وياۋ كورگەن تۇسىمدەي - جالعانداعى شىندىعىم!

ار مەن رۋحتى الەمگە تاراتاتىن كىندىگىم.

اقيقاتى اللانىڭ، كوزىمنىڭ اق پە قاراسى -

مىنە بۇل قازاق دالاسى!

اڭىڭ ۇرىكپەسىنشى - تومارىڭ بوپ جاتايىن.

قۇسىڭ ۇرىكپەسىنشى - سۋ تۇبىنە باتايىن.

جاسا تاۋەلسىزدىگىم!- تارقامايتىن ساعىنىش!

قازاعىڭدى ماڭگىلىك ساپارلارعا الىپ ۇش!

 

ءاتىر

جايناعان جاسىل باققا سىڭعىر قاعىپ،

جۇپار شاشىپ بويجەتكەن كىردى ۇرلانىپ.

ءبىر بوزبالا «chanel» مەن قارسى الدى ونى...

قاۋىزىنا قوندى ارا گۇلدىڭ بارىپ.

 

عاشىقتارعا باقىتتىڭ ءبارىن ءۇيشى،

ءومىردىڭ سوڭى كۇيشى، باسى ءبيشى.

ءتۇن اۋا شىقتى ەكەۋى قولتىقتاسىپ،

بۇرقىراپ باققا ءسىڭدى ءاتىر ءيىسى.

 

دەگەندەي ۇزاق قىلسىن قىزىعىڭدى،

توبەدەن اي كۇلىمدەپ ءجۇزى نۇرلى.

بىراق تا ءسىڭىپ قالعان ءاتىر يىسىنەن

قۇستار مەن گۇل-بايشەشەك تىجىرىندى.

 

...كۇز دە جەتتى، قۇس تا جوق، گۇلدەر عايىپ،

ءومىر سولاي ول ءۇشىن بۇلدانبايىق.

جالعىز كەپتى بويجەتكەن اتىرلەنبەي...

بىلمەدىم، نە بولعانىن كىمدەر دە ايىپ؟!

 

انا

الاتاۋدىڭ قاباعى قۇرسانىپتى –

انامنىڭ ومىرتقاسى قيسايىپتى.

ايدىن كولدىڭ اجارىن مۇڭ شالىپتى –

انامنىڭ ومىرتقاسى قيسايىپتى.

 

بوزتورعايداي شىرىلداپ الا تاڭدا،

بالاپانداي ءوسىردىڭ الاقاندا.

جارىڭ كەتىپ وتىزدان اسا بەرە،

ايدىن كول دە، سەن بولدىڭ الاتاۋ دا!

 

كوز ۇشىندا بۇلدىراپ قالعان داۋرەن،

تاعدىردىڭ تاس قامالىن تالقانداۋمەن.

ەڭبەكتەپ كوتەردىڭ عوي - بەلىڭدە اعام،

قارىنداسىم جەلكەڭدە، ارقاڭدا مەن.

 

ءبىز ءۇشىن ءوزىڭ بولدىڭ مىڭ تولاعاي،

جىلىتتى قاباعىڭنان تۇسكەن اراي.

وسىرەم دەپ جۇرگەندە ۇل-قىزىڭدى،

شەمىرشەگىڭ دە ءوسىپتى ىشكە قاراي

 

ارقاڭا سالماق سالىپ تابىت – عالام،

قۋ جالعان ىرجىڭ-ىرجىڭ شالىقتاعان.

سوندا دا ريزامىن تاعدىرىما،

ومىرتقاڭ وپىرىلماي قالىپتى امان.

 

...ءتاڭىرىم سىناماق پا تاعى قۇلىن،

تار جەردە تۇتقا بولدى تاعىلىمىڭ،

مەن كاعبانى ىزدەپتىم ءپارۋانا بوپ...

ءجاينامازىم ەكەن عوي جاۋىرىنىڭ.

 

شاتاعىم جوق، دىر-دۋمان - القاسىندا،

ءمىناجات قىپ جاتايىن قالقاسىندا،

جەردىڭ شارى شايقالماي امان تۇرسا،

ءبارى، ءبارى انانىڭ ارقاسىندا،

 

...تيىلايىن مەندە ەندى «كوپ ۇرتتاۋدان»،

ەندى بەرەر قۇتىڭدى كەمىتپە اللام.

اناجان جاتىڭىزشى، دەمالىڭىز.

تىزەرلەپ سۇيەيىنشى ومىرتقاڭنان!

XXX

مەن جازباسام بولمايتىن بولدى -

باستى ەمەس، پوەزيانى.

ويتكەنى مىنا عالامنىڭ

كوبەيدى پالە زيانى.

 

مەن جازباسام بولمايتىن بولدى -

باستى ەمەس، درامانى.

ويتكەنى ۇلى رەجيسسەر

ءتاڭىرىم كىنالادى.

 

مەن جازباسام بولمايتىن بولدى -

باستى ەمەس، روماندى.

ويتكەنى مىنا ادامزات

قاپاسقا قامالدى.

 

مەن جازباسام بولمايتىن بولدى -

باستى ەمەس، شەدەۆر.

ويتكەنى، دۇنيەنىڭ ءبارى

ايقاي-شۋ، ەرەۋىل.

 

مەن جازباسام بولمايتىن بولدى -

جەرشارىنىڭ دىمكاسىن.

تەبىرەنتىپ جۇرەگىن،

شىمىرلاتىپ قۇيقاسىن.

 

مەن جازباسام بولمايتىن بولدى -

ەمەس بۇل تىلەگىم.

وزىممەن-ءوزىم وڭاشا،

باس جازىپ ءجۇر ەدىم.

 

مەن جازباسام بولمايتىن بولدى -

وزگەردى ءمان بولەك.

قاپ-اي ءا، ادامزات

قويدىڭ عوي اۋرەلەپ.

 

ارشىن نۇرباقىت

Abai.kz

4 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1292
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2027
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2075