عالىمجان جاقيانوۆتىڭ بۇقارالىق اقپارات قۇرالدارىنا ارنالعان مالىمدەمەسى:

2023 جىلدىڭ 2 قاڭتارىندا ادىرنا ۇلتتىق پورتالى ءوزىنىڭ You Tube كانالىندا تولەن توقتاسىنوۆپەن سۇحبات جاريالادى. سۇحباتتا ماعان جالعان جانە نەگىزسىز ايىپ تاعىلعاندىقتان، كوپشىلىككە ءتۇسىندىرۋ ءۇشىن وسى اقپاراتتى ايتۋعا تۋرا كەلىپ تۇر.

كوپتەگەن جىلدار بويى تولەن مەنىڭ دوسىم بولۋمەن قاتار، مەن ساياسي رەپرەسسياعا ۇشىراپ، باس بوستاندىعىمنان ايرىلعاندا ماعان وراسان زور كومەك كورسەتكەن سەرىكتەسىم بولدى. بۇل ءۇشىن مەن وعان شەكسىز ريزامىن. دەگەنمەن، ءدال قازىرگى جاعدايدا مەن ءوز بەدەلىمدى سول ەرتەدەن كەلە جاتقان دوسىمنان قورعاۋعا ءماجبۇرمىن. ەڭ الدىمەن، الماتى قالاسى مەدەۋ اۋداندىق سوتىندا توقتاسىنوۆقا قارسى كرەديتورلار قوزعاعان ازاماتتىق ىستە مەن تالاپكەر دە، جاۋاپكەر دە ەمەس ەكەنىمدى باسا ايتقىم كەلەدى. مەن بۇل پروتسەستە باس قۇقىعى جانە جەكە مۇددەسى زارداپ شەككەن ءۇشىنشى تۇلعامىن.
ال ەندى فاكتىلەرگە كەلسەك. 2007 جىلداردان باستاپ، توقتاسىنوۆ ءبىزدىڭ ورتاق تانىستارىمىزدان بىرنەشە رەت قوماقتى مولشەردە قارىزعا اقشا العان، ال مۇنىڭ ءبارى ماعان ءبىراز ۋاقىتتان سوڭ عانا بەلگىلى بولدى. ۋاقىتىندا قايتارماعاننان نەمەسە قايتارعىسى كەلمەگەننەن بە، ول بارلىق جاۋاپكەرشىلىكتى اكتسيونەرلەر كەلىسىمىن الماستان، ALGT ltd كومپانياسىنا اۋدارعىسى كەلدى.

2019 جىلى قارجىلىق مىندەتتەمە اينالاسىنداعى كيكىلجىڭنەن كەيىن توقتاسىنوۆتىڭ جوبادان شىعۋى جايلى ماسەلە قوزعالدى. كومپانيانىڭ ىشكى ءمان-جايى مەن قارىزدارى تۋرالى بەرىلگەن مالىمەت راستالعان جاعدايدا، ول الاتىن سوما الدىن الا انىقتالدى. سول سومانىڭ شامامەن ۇشتەن ءبىرىن ۋاقىتىندا الدى. بىراق، كەلەسى تولەمدەر توقتاتىلدى. سەبەبى، الدىمەن ىشكى، كەيىن سىرتقى تاۋەلسىز اۋديت جاساپ تەكسەرۋ بارىسىندا (2022 جىلدىڭ ءبىرىنشى جارتىسىندا جاسالدى) توقتاسىنوۆ ەلەۋلى قارجىلىق بىلىقتار مەن الاياقتىق جاساعانى انىقتالدى. الايدا، ول ءوزىنىڭ قارجىلىق مانيپۋلياتسياسىنا ەشقانداي تۇسىندىرمە بەرگەن جوق. مەنىڭ دە، وعان اقشا بەرگەندەردىڭ دە ماسەلەنى ءوزارا بەيبىت جولمەن شەشۋگە تىرىسقان ارەكەتىمىزدەن تۇك شىقپادى. ءتىپتى، قارىزدى قايتارا الاتىن مۇمكىندىگى بولا تۇرىپ، قايتارۋدان باس تارتتى. تۋىنداعان سۇراقتارعا جاۋاپ بەرۋدىڭ ورنىنا، توقتاسىنوۆ ماعان شانتاج جاساپ، قورقىتا باستادى. مەنەن اقشا الماعان جاعدايدا، بۇقارالىق اقپارات قۇرالدارى ارقىلى مەنىڭ قوعامدىق بەدەلىمە نۇقسان كەلتىرەتىنىن اۋىزشا دا، جازباشا دا ايتا باستادى. ماعان قارسى ارانداتۋدا قازاقستاندىق بيلىكتىڭ قولداۋىنا يە بولعانىن دا جەتكىزدى، بىراق مەن ونىڭ بوپسالاۋىن ءۇزىلدى-كەسىلدى قابىلدامادىم. باس تارتتىم.

ناتيجەسىندە، وسىدان التى اي بۇرىن توقتاسىنوۆ ماعان قارسى موڭعوليانىڭ ساقشى ورىندارىنا ارىز بەردى. الايدا، بارلىق جاعداي مەن قۇجاتتاردى جان-جاقتى تەكسەرۋدەن سوڭ مەنىڭ تاراپىمنان ەشقانداي قىلمىس نە زاڭ بۇزۋشىلىق بولماعانى ءمالىم بولدى. قىلمىس قۇرامى جوق بولعاندىقتان ءىس اشىلمادى. بارلىق جاعداي مەن قۇجاتتاردى تەكسەرگەننەن كەيىن، كەرىسىنشە، موڭعوليانىڭ تەرگەۋ كوميتەتى مەن پروكۋراتۋراسى ALGT ltd بۇرىنعى اتقارۋشى ديرەكتور رەتىندە توقتاسىنوۆتىڭ ءوزىن الاياقتىق پەن قۇجاتتاردى قولدان جاساعانى ءۇشىن جاۋاپقا تارتۋعا شەشىم قابىلدادى. ءوزى تاپسىرعان اقپارات جانە مەنىڭ ءوتىنىشىم نەگىزىندە موڭعوليا قىلمىستىق كودەكسىنىڭ 17.3-بابىنا سايكەس وعان وزىنە قارسى قىلمىستىق ءىس قوزعالدى. تەرگەۋشىگە بەرگەن ۋادەسىنە قاراماستان جانە زاڭدى بۇزا وتىرىپ، توقتاسىنوۆ 2022 جىلعى 10 قازاندا موڭعوليادان كەتىپ قالدى، قازىرگى ۋاقىتتا وعان حالىقارالىق ىزدەۋ جاريالانعان.

جوعارىدا بەرىلگەن مالىمەت پەن بارلىق جاعداي مەدەۋ اۋداندىق سوتىنا ناقتى قۇجاتپەن ۇسىنىلعان.

قورىتىندىلاي كەلە مىنانى ايتقىم كەلەدى. تولەن توقتاسىنوۆ ءوزىنىڭ جەكە باسىنداعى قارىزدارى مەن قارجىلىق بورىشتارىنان شاتاسىپ، جاۋاپكەرشىلىگىن مويىنداعىسى كەلمەي، مەنى اۋىر قىلمىس جاسادى دەپ ايىپتاپ، ماعان اشىق جالا جابۋعا كىرىستى. مۇنداي جالاسىنا كونەتىن نيەتىم جوق. ماعان قارسى ۇيىمداستىرىلىپ جاتقان ارانداتۋلاردا توقتاسىنوۆتىڭ باستى ءرولدى ويناۋى ءوز شەشىمى مە، الدە بىرەۋلەردىڭ ايداپ سالۋى ما، ازىرشە انىق ايتا المايمىن. بارلىعى جاقىن ارادا اشكەرلەنەدى دەپ ويلايمىن جانە سوعان سەنەمىن. سونداي-اق، ءبىزدىڭ ىسكەرلىك جانە جەكە قارىم-قاتىناسىمىزدىڭ قوعامدىق تالقىلاۋدىڭ تاقىرىبىنا اينالعانىنا وكىنىش بىلدىرەمىن.

عالىمجان جاقيانوۆ

3 قاڭتار، 2023 جىل.

ادىرنا ۇلتتىق پورتالى جاريالاعان تولەن توقتاسىنوۆتىڭ سۇحباتى:

Abai.kz