جۇما, 29 ناۋرىز 2024
ءبىر ساۋال 4294 8 پىكىر 13 قاڭتار, 2023 ساعات 13:15

«قازاقستان» رەسەي تۋى استىندا تۇرعان جوق پا؟

ەلىمىزدىڭ باستى ءارى قازاق تىلىندە عانا تازا حابار تاراتاتىن ۇلتتىق «قازاقستان» تەلەارناسىنىڭ ابىرويى مەن بەدەلى اسقاق ارينە. ەلىم، جەرىم، انا ءتىلىم دەيتىن قازاقتىلدى كورەرمەن حالىق تاراپىنان ءوز ورنىن ويىپ تۇرىپ العاندىعىندا ءسوز جوق.

تالاي قىزىقتى ەلدىك باعدارلامالاردى، نەبىر كوركەم فيلمدەر، سونىڭ ىشىندە ۇلتتىق كوركەم كينو تۋىندىلارىمىزدى، دەرەكتى فيلمدەرىمىزدى باسقا دا دۇنيەتانىمدىق حابارلاردى دارىپتەپ، ۇلكەندى-كىشىلى كورەرمەندەردى باۋراپ، ءوزىنىڭ دارەجەسىن كوتەرىپ كەلە جاتقانىن تۇراقتى كورەرمەن رەتىندە ماقتانىشپەن ايتا الامىن.

جاڭالىقتاردىڭ دا ءمانى وزگەرىپ، ەل مۇڭىن جوقتاپ، وزەكتى ماسەلەلەردى كوتەرىپ، يگىلىكتى ىستەردى پاش ەتىپ كەلە جاتقانىن كورگەندە ريزاشىلىق تانىتىپ جاتامىز. ءبىر عانا «اشىق الاڭ» كوتەرگەن، تالقىلاعان ماسەلەنىڭ ءوزى نەگە تۇرادى؟.. ارينە، ءبىز بۇل ارادا ەلىمىزدىڭ اتىن جارقىراتىپ تۇرعان «قازاقستان» تەلەارناسىنىڭ اتىنا ءاربىر حابارىن تالقىلاپ نەمەسە ماداقتاپ وي-پىكىرىمىزدى ايتىپ نەمەسە مانسۇقتايىن دەپ وتىرعان جوقپىز.

تەك سوڭعى كەزدە وسى تەلەارنامىزدىڭ جاڭالىقتارىن قوسىپ قالعان كەزدە كوزىمە وتتاي باسىلعان كورىنىس مازامدى الا باستادى. بۇرىن بۇعان دەيىن قانشا كورىپ كەلە جاتساق تا، كەيدە ءمان بەرە بەرمەيمىز عوي. ويتكەنى وعان سەبەپ، ارنالاردى باسىپ وتىرعان كەزدە رەسەيدىڭ ءبىر ارناسىنىڭ الدەبىر باعدارلاماسى ما، جاڭالىقتارى ما، ءوز تۋلارىنىڭ بەينەسىندە ءدال ءبىزدىڭ «قازاقستان» جاڭالىقتارىنىڭ باسىندا، ورتاسى مەن ۇزىلىستەرى اراسىندا قىزىل، كوك، اق جولاقتاردى ويناقشىتىپ تۇراتىن بەينەكادرلارى سياقتى جارق-جۇرق ەتكەن كورىنىسى كوزىمە وتتاي باسىلدى. قازىرگى تىلدىك تەرميندەرمەن ايتقاندا، «جاڭالىقتار بەكگراۋندى» (background news) دەي مە، اۋەنمەن زىر اينالىپ، ءتۇرلى تۇسپەن قۇبىلا ويناقشىعان مۇندايعا كوزىمىز ۇيرەنگەن عوي.

ەندى وسى سۇيىكتى «قازاقستان» تەلەارنامىزدىڭ جاڭالىقتارى قۇبىلا ويناپ باستالعان ساتتە، ونىڭ جۇرگىزۋشى سۇيكىمدى دە سۇلۋ قىزدارى مەن سىمباتتى جىگىتتەرى سايراي جونەلگەندە، ارتىنداعى كورىنىسى تۋرا ءبىر رەسەي تۋىنىڭ استىندا، تاساسىندا تۇرعانداي كورىنىس بەرەتىنىن بايقادىڭىز با؟ الاۋلاتقان، جالاۋلاتقان كوك، قىزىل، اق ءتۇس قاتارلاسا جولاق بويلاي، ولاي بۇلاي شىر اينالادى. تاپ ءبىر رەسەي تۋىن جەلبىرەتىپ، سونىڭ اياسىندا جۇرگەن سياقتى بولىپ كورىنەتىن بولدى ماعان. ءوزىمىزدىڭ ۇلتتىق نىشاندارىمىز كورىنبەي، تاسادا قالادى. رەسەيدىڭ قازاقشا تەلەارناسى بولسا جاقسى عوي. وندا تەك قۋانار ەدىك. ول تەك قازىرگى كەزدە بىزگە ارمان عانا. ودان گورى قىتايدا تازا قازاقشا بىرنەشە تەلەارنا بار دەپ ەستۋشى ەدىك باياعىدا. قازىر قايدام، ول جايلى ەستىمەي قالدىق.

سونىمەن ءبىزدىڭ ۇلتتىق «قازاقستان» تەلەارناسى «جاڭالىقتارىنىڭ» بەكگراۋندى وسىلاي رەسەيلىك قىزىل، كوك، اق ءتۇستى جالاۋىنىڭ جولاقتارى تۇرىندە قالا بەرەر مە ەكەن. ارينە، تەلەارنا باسشىلىعى مۇنداي سىندى جاقتىرماي، وزدەرىنشە ءتۇسىندىرۋى دە مۇمكىن. دەگەنمەن تەلەديدارداعى وسى كورىنىستى جايلاپ قاراپ وتىرساڭىزدار، وسىنداي ويعا كىمنىڭ بولماسىن كەلەرى ءسوزسىز دەر ەدىم. ءيا، «قازاقستان» رەسەي تۋىنىڭ تاساسىندا»، اياسىندا جاڭالىقتارىن جالعاستىرۋدا.

ەگەر سەنبەسەڭىزدەر «قازاقستان» جاڭالىقتارىن قاراپ كورىڭىزدەر!

ەرلان كۇزەكباي،

استانا قالاسى

Abai.kz

8 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2257
عيبىرات

قايسار رۋحتى عازيز جان

مۇحتار قۇل-مۇحاممەد 3536