«باتىس ايتقان قارۋىن نەگە تەز جەتكىزبەيدى»، «قارۋ بەردىك دەيدى، قايدا سول قارۋلارى»، «بەرەتىن بولسا تەز-تەز بەرمەي مە»، «اۋىزبەن قارۋ بەرەمىز دەپ ايتىپ، بەرمەي ءجۇر عوي» دەگەن پىكىرلەر كوپ. ادەتتە مۇنداي پىكىرلەر رەسەي ۋكرايناعا زىمىران سوققىسىن جاساعاندا نەمەسە قانداي دا ءبىر باعىتتا شابۋىلعا شىققاندا ايتىلادى. «باتىستىڭ قارۋى كەلەمىن دەگەنشە، ۋكراينا قىرىلىپ بىتەتىن بولدى» دەگەن رەپليكامەن جالعاسىن تاۋىپ جاتادى.

سونىمەن وسى ۋاقىتقا دەيىن ۋكرايناعا قانشا كومەك كورسەتىلدى؟ Bloomberg بەرىلگەن قارۋلار سانىن شامامەن بىلاي دەپ كورسەتەدى:

410 تانك بەرىلىپتى، ونىڭ بارلىعى دەرلىك كەڭەستىك جانە رەسەيلىك تانكتەر. ولاردى كوبىنە پولشا، چەحيا، سلوۆەنيا بەرگەن. وزگە دە ەلدەر بار.

300 دانا بروندى تەحنيكا بار، ونىڭ ىشىندە 250 بمپ. باسىم كوپشىلىگى كەڭەستىك تيپتەر.

1100 دانا جەڭىل بروندى تەحنيكا. ونىڭ ىشىندە 300 دانا م113 مەن 250 دانا م117 بار. قالعانى وزگە تيپتەر.

جاياۋ اسكەرگە ارنالعان جەڭىل بروندى اسكەري كولىكتەر سانى 1540 دانا، ونىڭ ىشىندە 1250 دانا HMMWV بار.

300 سۇيرەتىلمەلى گاۋبيتسا بەرىلگەن. ونىڭ ىشىندە 210 دانا 155-ممترلىك M777 پەن 72 دانا 105-ممترلىك زەڭبىرەكتەر بار.

400 دانا ءوزى جۇرەتىن ارتيللەريالىق قوندىرعىلار بار (ساۋ).

38 دانا HIMARS پەن 40 دانا 122-ممترلىك زىمىران كەشەنىن دە ۇمىتپاڭىز.

18 دانا سۋ-25, 31 دانا تىكۇشاق بەرىلگەن. بارلىعى كەڭەستىك قارۋلار. سوعىس باستالعالى ۋكراينا 30 دانا Bayraktar مەن بىرنەشە ءجۇز بارلاۋشى جانە كاميكادزە درونى سانالاتىن Switchblade العان.

37 دانا نەمىس قارۋ ءوندىرىسىنىڭ ماقتانىشى سانالاتىن Gepard زەنيتتىك تەحنيكاسىن العان.

NASAMS-تار كەلىپ جەتتى. ەندى جاقىن ارالىقتا Patriot كەلمەكشى.

بۇل كەسەك-كەسەك ەتىپ ايتاتىن قارۋ تۇرلەرى عوي. بۇدان بولەك مىڭداعان دجاۆەلين، ستينگەر، جۇزدەگەن مىڭ گراناتا مەن سان ءتۇرلى اتىس قارۋى، ميلليونداعان وق پەن ميلليونداعان سناريادتى قوسىڭىز. بۇنىڭ بارلى كومەك ەمەس پە؟ كومەك!

وسىنى بىلە وتىرا، كورە وتىرا «باتىس قارۋدى تەك اۋىزشا بەرۋدە» دەپ ايتۋ بىلمەستىك بولار. ال ەندى «نەگە تەز بەرمەيدىگە» كەلەيىك.

بىرىنشىدەن، قارۋ ول قورعانىس سالاسى. ال قورعانىس ول مەملەكەتتىڭ ءومىر ءسۇرۋىنىڭ باستى كەپىلى. قويماڭداعى قارۋدى الىپ، ەكىنشى ەلگە جەتكىزۋ ساتىندە سەن بوس قالعان قويماڭدى نەمەن تولتىرۋدى ويلاستىرىپ قويۋىڭ كەرەك. سوندىقتان باتىس ەلدەرى ۋكرايناعا قارۋ بەرەتىنىن جاريالاۋدان كەيىن، بىرنەشە ماڭىزدى، تەز ارادا شەشىمىن تابۋى ءتيىس ماسەلەلەرمەن زىر جۇگىرىپ جۇرەدى. ول وزىنە قاجەتتى جاڭا قارۋدى كىمنەن ساتىپ الادى، ۋكرايناعا بەرەتىن قارۋدى مودەرنيزاتسيالاۋ سىندى ماسەلەلەر. بۇل ءبىرشاما ۋاقىتتى الاتىن دۇنيە.

ەكىنشىدەن، ۋكراينا سوعىسى وتە قارقىندى، ينتەنسيۆتى. كۇندەلىكتى ۇرىستا وق-ءدارى وتە كوپ قولدانىلىپ جاتىر جانە بۇل باتىس قويمالارىنداعى سنارياد، زىمىران قورىن تاۋىسۋعا جاقىن قالدى. سوندىقتان قارۋدى جەتكىزگەن ساتتە دە بۇل ماسەلەنى ەسكەرەدى. زىمىرانسىز HIMARS ول قۇر تەمىر، سناريادسىز ارتيللەريا قۇر تەرسەك. ءۇيىپ-توگىپ قارۋ بەرسە دە، ونى تولىق وق-دارىمەن قامتاماسىز ەتە الا ما؟ بۇل جاعىن ساراپشىلار ەسكەرەدى. قازىر بۇل ماسەلەنى شەشۋ ءۇشىن وق-ءدارى شىعارۋدى ەسەلەپ ارتتىرۋ جۇمىستارى قولعا الىنۋدا. بۇل ماسەلە شەشىلسە، وندا بەرەتىن قارۋ سانىن دا ارتتىرۋعا بولادى.

ۇشىنشىدەن، قارۋ بەرۋ ءبىر بولەك، ونى يگەرۋ ءبىر بولەك. مىسالى باتىستىق ۇشاقتاردى كەمى ءبىر جىل ۇيرەنۋ كەرەك، كەي پۆو تۇرلەرى دە ءدال سولاي. سوندىقتان بەرىلگەن قارۋ بىردەن ۇرىس دالاسىنا جەتكىزىلمەي، الدىمەن ونى اتىپ ۇيرەنۋ ءۇشىن ۋكراين ساربازدارى وقىتىلادى. كەڭەستىك قارۋمەن ۇيرەنگەن اسكەر باتىستىق تەحنولوگيانى يگەرۋى كەرەك. وعان دا ۋاقىت كەرەك.

تورتىنشىدەن، باتىس بەرگەن قارۋدى جوندەۋ بار، ونى باپتاۋ بار دەگەندەي. ۇرىس وتە قارقىندى بولعاندىقتان كوبىنە ارتيللەريا ۇڭعىسى ىستەن شىعىپ جاتادى. ونى ۋكراينادا ەمەس، كوپ جاعدايدا بالتىق ەلدەرىندە جوندەيدى. بۇل دا ەسكەرەتىن دۇنيە.

قورىتا ايتقاندا قارۋ بەرىلىپ جاتىر. ءيا، بۇدان دا كوپ بولعانى جاقسى ەدى. دەي-تۇرا وسى دا جامان ەمەس...

اسحات قاسەنعالي

Abai.kz