ماسكەۋدەگى بيلىك ۆەرتيكالى سىزات بەرە باستادى ما؟ اقش-تىڭ بەدەلدى «Fox News» تەلەارناسى كرەملدىڭ ەڭ باستى ەكى تىرەگى — قارۋلى كۇشتەر (ارميا) مەن فسب (فەدەرالدى قاۋىپسىزدىك قىزمەتى) اراسىنداعى تەكەتىرەس اشىق سوعىسقا ۇلاسىپ جاتقانىن جاريالادى. سۇراپىل سوعىس ءجۇرىپ جاتقاندا، رەسەي گەنەراليتەتىنىڭ جۇمباق ولىمدەرى مەن قاماۋعا الىنۋى — جۇيە ىشىندەگى ۇلكەن جىكشىلدىكتىڭ ايقىن نىشانى.

بۇل تەكەتىرەستىڭ ايماقتىق جانە جاھاندىق ساياساتقا اسەرىن باعامداۋ ءۇشىن مىنا جايتتاردى ءجىتى ءتۇسىنۋ كەرەك:

• گەنەرالداردىڭ جۇمباق ءولىمى: رەسەي اقپارات قۇرالدارىنىڭ مالىمەتىنشە، سوعىس باستالعالى بەرى كەم دەگەندە 15 رەسەيلىك گەنەرال قازا تاپقان. ولاردىڭ اراسىندا زىمىران سوققىلارىنان ومىردەن وتكەندەرى دە، كولىك جارىلىسى مەن جۇمباق اۆيااپاتتاردان كوز جۇمعاندارى دا بار.
• قورعانىسسىز قالعان قولباسشىلار: ەۋروپالىق بارلاۋ كوزدەرىنىڭ حابارلاۋىنشا، ارميا باسشىلىعى فسب-دان گەنەرالداردىڭ ومىرلىك قاۋىپسىزدىگىن قامتاماسىز ەتۋدى تالاپ ەتكەن. الايدا، ارنايى قىزمەت اسكەريلەر ءۇشىن جاۋاپكەرشىلىك الۋدان باس تارتىپ وتىر. «ولار ءبىر-ءبىرىن كسرو زامانىنان بەرى جەك كورەدى»، — دەيدى ساراپشىلار.
• كرەملدىڭ قاۋىپتى تۇزاعى: وپپوزيتسيالىق ساياساتكەرلەردىڭ پىكىرىنشە، سوعىس ارميانىڭ ماڭىزىن ارتتىردى، بىراق ماسكەۋدەگى ساياسي جۇيە كۇشەيگەن گەنەرالداردان ءوز بيلىگىنە تونەتىن تىكەلەي قاۋىپ كورەدى. ناتيجەسىندە كرەمل تىعىرىققا تىرەلدى: سوعىستى جالعاستىرۋ ءۇشىن تاجىريبەلى كومانديرلەر كەرەك، بىراق ولارعا سەنىم جوق.

ەكى كلاننىڭ استىرتىن سوعىسى نەمەن اياقتالادى؟

بۇل — جاي عانا لاۋازىمدى تۇلعالاردىڭ ەرەگىسى ەمەس، پۋتين رەجيمىنىڭ ىرگەتاسىن شايقالتىپ جاتقان تەرەڭ جۇيەلى داعدارىس. اسكەري ەليتا مەن چەكيستەر اراسىنداعى تەپە-تەڭدىكتىڭ بۇزىلۋى رەسەيدىڭ ىشكى ساياساتىندا ۇلكەن سىلكىنىستەر تۋدىرۋى ابدەن مۇمكىن. بۇل تەكەتىرەستە كىم جەڭىسكە جەتەدى: مايداندا شىڭدالعان ارميا ما، الدە كرەملدىڭ قۇپيا بولمەلەرىن باقىلايتىن فسب ما؟

رەسەيدىڭ كۇشتىك قۇرىلىمدارى مەن اسكەري ەليتاسى اراسىنداعى استىرتىن تارتىستىڭ، سونداي-اق قورعانىس مينيسترلىگىندەگى اۋقىمدى تازارتۋ جۇمىستارىنىڭ قىر-سىرىن تەرەڭىرەك تۇسىنگىڭىز كەلسە، مىنا كرەملدەگى ىشكى داعدارىس تۋرالى بەينەباياندى كورۋگە بولادى. بۇل ۆيدەودا فسب مەن ارميا گەنەرالدارى اراسىنداعى شيەلەنىستىڭ قالاي ۋشىعىپ جاتقانىنا جان-جاقتى تالداۋ جاسالعان.

ءابىل-سەرىك الىاكبار

Abai.kz