جاڭا جىلداعى «جاڭا» جاڭالىق. «قازتاگ» اگەنتتىگىنىڭ حابارلاۋىنا قاراعاندا بيىلعى جىلعى بيۋدجەتىمىز بۇرىنعى پرەزيدەنتىمىزدىڭ كەڭسەسىن مول قارجىمەن قارق قىلىپ تاستاپتى.

تسيفر مىناداي: نازارباەۆتىڭ كەڭسەسىندەگىلەر الاڭسىز جۇمىس ىستەۋى ءۇشىن ولارعا بيىل 1 ميلليارد 678 ميلليون 654 مىڭ تەڭگە ءبولىنىپتى. ال كەلەسى جىلى ول تاعى دا 1 ميلليارد 994 ميلليون 569 مىڭعا ءبىر-اق كوتەرىلەدى. مۇنى دا از دەسەڭىز، 2025 جىلى بۇرىنعى پرەزيدەنتىمىزگە دەگەن ادام ايتقىسىز مىرزالىعىمىز - ەش سوزگە كەلمەستەن 2 ميلليارد 54 ميلليون 435 مىڭ تەڭگەنى ۇستاتا سالاتىن كورىنەمىز.

حالىق قىمباتشىلىقتىڭ قاتتى زاردابىن تارتىپ، قارجىدان قينالىپ، «شىقپا جانىم، شىقپا»، دەپ وتىرعاندا بۇل نە قىلعان مىرزالىق؟ نازارباەۆقا تىكەلەي قىزمەت ەتەتىندەردىڭ قارجىلاي اۋىرتپالىعىن نەگە قاراپايىم حالىق كوتەرەدى؟ بۇرىنعى ەلباسىنا دۋبايعا قاشىپ كەتكەن قىزدارى مەن كۇيەۋ بالالارى نەگە قول ۇشىن بەرمەيدى؟ ولاردىڭ بارلىعى دا سول نازارباەۆتىڭ ارقاسىندا بايىعان جوق پا؟ ەندەشە ءسال دە بولسا قايتارىم دەگەن بولۋى كەرەك قوي؟..

جالپى، وسى ەسكى پرەزيدەنتتىڭ كەڭسەسى دەگەن مەكەمە كىمگە، نە ءۇشىن قاجەت؟ الدە وتىز جىل بويى بيلەسە دە، ەندى سول جۇمساق ورىندىققا ماڭگىلىككە جابىسىپ قالۋدى ويلاعان، ءوزىنىڭ شولاق پايىمداۋىنشا قايمانا حالىق ءوزىن ءالى كۇنگە دەيىن توبەسىنە كوتەرەدى دەگەن ەسەك دامەمەن جۇرگەن قايداعى ءبىر زەينەتكەر ءۇشىن ارنايى كوماندا قۇرىپ، ولارعا داڭعاراداي كەڭسە بەرىپ، ونىمەن قويماي، وسىناۋ ماعىناسىز ىسكە ميللياردتتاعان قارجى ءبولۋ قانشالىقتى قيسىندى؟ بۇدان ەلىمىزگە نە ەكونونميكامىزعا قانشالىقتى پايدا تۇسەدى؟ ال پايداسى تۇسپەسە، مۇنى كىم، نەگە اشىپ وتىر؟ وسى ساۋالدارعا جان-جاقتى دا تولىمدى تۇردە جاۋاپ بەرەتىن جان بار ما؟ الدە حالىقتىڭ اقشاسى اركىمنىڭ قالتاسىنا كەتە بەرەتىن، سۇراۋى جوق ەسەپسىز دۇنيە مە؟

ايتپاقشى نازارباەۆ وسى كەڭسەگە اندا-ساندا كەلىپ-كەتكەنى ءۇشىن ايىنا قانشا جالاقى الادى ەكەن؟

جايبەرگەن بولاتوۆ

Abai.kz