سەيسەنبى كۇنى مەملەكەت باسشىسى قاسىم-جومارت توقاەۆتىڭ توراعالىعىمەن ەلوردانى دامىتۋ ماسەلەلەرى جونىندەگى كەڭەس ءوتتى.

مۇندا 25 جىلدان بەرى قازاقستان حالقىنىڭ ەسەسىن جەپ، اۋزىنان ىرىسىن ىسىرىپ كەلگەن استانا تۋراسىندا ءبىراز ماسەلە ايتىلدى.

ارينە، ەلوردا ەل كوركى بولاتىنداي قالا بولۋى كەرەك. بىراق ول بۇرىنعى نازارباەۆتىڭ كەزىندەگىدەي، شيرەك قازاقستاننىڭ بيۋدجەتىن جالمايتىن تويىمسىز شاھار بولعانى «ادىلەتتى قازاقستان» قاعيداسىنا قيعاش كەلەدى.

ماسەلەن، ىسىراپشىل بيلىك پەن جالماۋىز جەمقورلار ميللياردتاعان قاراجاتتى قىلعىتقان LRT اسپالى جولىنىڭ جوباسى وسى كەڭەستە تاعى دا ءسوز بولدى. بۇل جوبانى تاعى دا مايلاپ ءسىڭىرۋ ءۇشىن، پرەزيدەنت توقاەۆ استانالىقتار «كوزىنە جاس الارلىق» ءبىراز ءسوز ايتتى.

«تۇرعىندار ءالى كۇنگە دەيىن ايالدامادا جارتى ساعات بويى تۇرۋعا ءماجبۇر، – دەيدى پرەزيدەنت. – ءتىپتى كەيدە جولاۋشىلار اۆتوبۋسقا سىيماي جاتادى. قازىر استاناعا 400-دەن استام اۆتوبۋس جەتىسپەيدى. الداعى 5 جىلدا بۇل تاپشىلىق 2 ەسە ارتۋى مۇمكىن. 400 ايالدامادا اۆتوبۋس توقتايتىن ارنايى ورىن قاراستىرىلماعان»،-دەپ بارىپ، توقاەۆ مىرزا «ءبيتتىڭ قۇرىلىسىنا» قايتادان ورالدى. حالىقتىڭ قانىن سورعان بۇل «بيت» – LRT.

«LRT-عا قاتىستى جۇمىستى مەيلىنشە تەزدەتىپ اياقتاۋ كەرەك. مەن بۇرىن دا ايتتىم، LRT جوباسى نەگىزىنەن قاتە بولدى. بىراق قازىرگى تاڭدا باسقا امالىمىز جوق، بۇل جوبانى جۇزەگە اسىرۋىمىز كەرەك. LRT-نىڭ قۇرىلىسىن توقتاتساق، شىعىن ودان دا كوپ بولادى. ال بالاما جوبالار جوق»، – دەدى مەملەكەت باسشىسى.

ەگەر LRT قاتە بولعان بولسا، ونىڭ قالقيعان بەتون باعاندارىن ىسىراپشىلىق پەن جەمقورلىقتىڭ ەسكەرتكىشى رەتىندە نەگە قالدىرماسقا؟ ازىرشە، ارينە. نازارباەۆتىڭ تويىمى جوق كوزى سياقتى بولىپ تۇرسىن سىرەسىپ! ەل ەكونوميكاسى داعدارىستان شىعىپ، قىمباتشىلىق قامىتى حالىقتان سىپىرىلعان كەزدە اتىڭ وشكىر LRT-عا قايتىپ كەلەر ەدىك...

شاماسى، ولاي بولمايدى-اۋ! پرەزيدەنتتىڭ پارمەن بەرگەنىنە قاراعاندا، سول «تويىمسىز كوز» ءالى دە حالىقتىق قاراجاتقا سۇقتانىپ تۇرعان سياقتى...

سىرىم داتوۆ

Abai.kz