«ەلىمىزدە پياز باعاسىنىڭ قىمباتتاۋىنا ەش نەگىز جوق»،-دەيدى ساۋدا جانە ينتەگراتسيا ءمينيسترى سەرىك جۇمانعارين.

«قازىر باعا تۇراقتانىپ كەلەدى. ەلىمىزدە پياز جەتكىلىكتى. سونىمەن قاتار، وسى ءونىمنىڭ ەكسپورتىن جاۋىپ تاستادىق. پيازدى قاپپەن ساتىپ الۋدىڭ رەتى جوق. بىراق ونىڭ ساۋداسىنا الىپ-ساتارلار دا كىرىسىپ كەتكەنىن بايقادىق. ەلورداداعى «ماگنۋم» ساۋدا جەلىسىندە پياز 130 تەڭگەدەن ساتىلىپ جاتىر»، - دەدى س. جۇمانعارين سەناتتا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، جاقىندا «ماگنۋم» ساۋدا جەلىسىنىڭ قىزمەتكەرلەرى ءتيىستى تەكسەرىس جۇرگىزىپ، ارزان ءونىمدى بازارعا ساۋداعا شىعارعان 19 ادامدى انىقتادى.

«مۇنداي الىپ-ساتار ارەكەتتەر دۇرىس ەمەس. ءبىز وسى تاۋاردى قاراپايىم حالىق ءۇشىن ساقتاپ، 130 تەڭگە سوماسىندا وتكىزىپ جاتىرمىز. سونىمەن قاتار، پيازدىڭ ساپاسى ناشار دەگەن ءۋاج ايتىلدى. وسىنى تەكسەرىپ، ساپاسى جاقسى ەكەنىن كوردىك»، - دەدى مينيستر.

بۇدان بۇرىن حابارلانعانداي، قازاقستان وڭىرلەرىندە تۇراقتاندىرۋ قورلارىنان ساۋدا نىساندارىنا پياز جەتكىزىلە باستادى.

Abai.kz