كەشە كەشكىلىك گۇرجىستان پارلامەنتى «باق-تار مەن ۇيىمداردىڭ اشىقتىعىنا» بايلانىستى زاڭ جوباسىن قابىلداماققا جينالعان. بۇل جوباعا ساي رەسەيدەگى ىسپەتتەس كوپتەگەن باق پەن ۇەۇ-لاردى (نپو) «شەتەلدىك اگەنت» (ينواگەنت) دەپ تانىپ، جاۋىپ تاستاۋ ۇسىنىلعان.

حالىق بۇعان قارسى شىقتى. بىرنەشە كۇن قاتارىنان قىزۋ تالقىلاۋلار بولدى. ءتىپتى، پارلامەنتتىڭ ءوز ىشىندە توبەلەس شىققانىن وسىعان دەيىن جازدىق. ال زاڭ جوباسىن ۇسىنۋشى توپتىڭ ارتىندا رەسەيشىل كۇشتەر تۇر دەگەن اقپارات بار.

اتالعان زاڭ جوباسىنىڭ اۆتورى «حالىق كۇشى» قوزعالىسى. «شەتەلدىك اگەنت» تۋرالى زاڭ جوباسى رەسەي ۋكرايناعا سوعىس اشقاننان كەيىن تالقىعا شىققان. زاڭ جوباسىنىڭ اۆتورلارى «باتىس گۇرجىستاندى سوعىسقا ارالاستىرماقشى»، - دەپ ايىپتاپ، زاڭ جوباسىندا «ليبەرەلدى يدەولوگيا پروپوگانداسىنا» قارسى تۇرامىز»، - دەگەن. اتالعان زاڭ جوباسىن پارلامەنتتەگى بيلىك پارتياسى – «گۇرجىستان ارمانى» قولداعان. ءسويتىپ، بىرلەسكەن كواليتسيا پارلامەنتتە ايقىن باسىمدىققا يە بولعان.

ال كەشە كەشكە تبليسي جۇرتى بۇل زاڭ جوباسىنا قارسى كوشەگە شىقتى. رۋستاۆەلي كوشەسىندەگى پارلامەنتتىڭ الدىنا 10 مىڭنان استام ادام جينالعان. ولار پارلامەنتتى باسىپ كىرۋگە تىرىسقان. ءسويتىپ، انتي-رەسەيلىك ميتينگ باستالىپ كەتكەن. بەيبىت ميتينگ قاقتىعىسقا، كوتەرىلىسكە ۇلاستى دەسەك بولادى.

پوليتسيا حالىقتى تاراتۋ ءۇشىن كۇش قولداندى. كوز جاساۋراتاتىن گاز، سۋ شاشىپ، رەزەڭكە وق اتتى. بۇل حالىقتى ودان ارى اشۋلاندىردى. پارلامەنتتىڭ عيماراتى الدىندا قان توگىلگەن قاقتىعىس باستالدى.

گۇرجىستان پرەزيدەنتى داۋلى زاڭ جوباسىنا ۆەتو قوياتىنىن مالىمدەدى. «بۇل زاڭ جوباسىن پارلامەنت قابىلداعان كۇننىڭ وزىندە، مەنە وعان ۆەتو قويامىن. بۇل گۇرجىستاننىڭ ەۋروپالىق ينتەگراتسيا باعىتىنا قايشى»، - دەدى. بىراق، تولقۋلار باسىلعان جوق. اقش مەملەكەتتىك دەپارتامەنتى بەيبىت حالىققا كۇش قولدانعانداردىڭ جازاسىز قالمايتىنىن قاتاڭ ەسكەرتتى.

وسىلايشا، انتي-رەسەيلىك اكتسيا گۇرجىستاننىڭ ەكىنشى ءىرى قالاسى باتۋميدە دە جالعاستى. ول جاقتا دا مىڭداعان ادام كوشەگە شىقتى.

ەو ديپلوماتياسىنىڭ باسشىسى جوزەپ بوررەل: «گرۋزيا باسقا باعىتقا كەتىپ بارادى. «شەتەلدىك اگەنت» تۋرالى زاڭ ەو قۇندىلىقتارى مەن ستاندارتتارىنا قايشى. اتالعان زاڭدى قابىلداۋدىڭ اقىرى اۋىر بولۋى مۇمكىن.

گرۋزيا ەو مەن ناتو-عا ۇمىتكەر مەملەكەت. اتالعان زاڭ جوباسىن قابىلداۋ وسى مۇمكىندىكتەن ءبىرجولا ايىرۋى مۇمكىن. ال جاۋاپكەرشىلىك - اتالعان زاڭ جوباسىن قولداۋ داۋىس بەرگەندەردە بولادى»، - دەدى.

گۇرجى وپپوزيتسياسىنىڭ ليدەرلەرىنىڭ ءبىرى نيكا مەليا: «رۋستاۆەلي كوشەسى رەسەيشىلدەرگە ەمەس، ناعىز گۇرجىلەرگە تولعانعا دەيىن تۇراتىن بولامىز. ءبىز بۇگىن دە ميتينگكە شىعامىز»، - دەدى.

Abai.kz