ورىسقا وتارلانعاننان باستاپ قازاقتىڭ ءيتىنىڭ تۇقىمى دا وزگەردى. قورا كۇزەتىپ، قوي جاياتىن ماڭ توبەتتەر مەن قوياننان تارتىپ قاسقىر الاتىن تازىلاردىڭ سانى سيرەپ كەتتى. سيرەمەگەن دەشى؟! يەسىمەن بىرگە نە كورمەدى دەيسىڭ؟! اقتار مەن قىزىلداردىڭ قىرعىنى، وتىرىقشىلىق، اشارشىلىق، سوعىس ازدىرماي قايتسىن؟!

سوڭعى وتىز جىلدا دا اۋزىنان اق ىركىت اعاتىن ارمانداعى كۇيگە جەتكەن جوق. توقىراۋدان توزىپ شىعىپ، جاپپاي جەكەشەلەندىرۋدىڭ، جابايى كاپيتاليزمنىڭ زاردابىن تارتتى. اۋىلدان قالاعا اعىلعان ەلمەن بىرگە «مارگينال» اتاندى. قالا سىرتىنداعى ساياجايلاردى، كەڭەس زامانىنان قالعان ەسكى نىسانداردى پانالادى. سەرگەلدەڭ كۇي كەشىپ، اشتىقتان بۇرالىپ، جۇرەگى قارايىپ، قاۋقارسىز بالالارعا الىمجەتتىك جاساي بەرگەن سوڭ، ۇستىنەن شاعىم كوبەيىپ، اقىر اياعى وكىمەتتىڭ باسقارۋىنا ءوتتى. ەل بيۋدجەتىنە ماسىل بولدى. ودان دا ءبۇيىرى شىققان جوق.

جەمقورلاردىڭ سالىقتان جينالعان اقشادان بولىنگەن قارجىنى يتاياقتارىنا جەتكىزبەي اۋزىنان جىرىپ اكەتىپ جاتقانىن ايتىپ شاعىمدانايىن دەسە، ءتىلى جوق. وڭاشاعا بارىپ ۇلىپ، ءتىسىن اقسيتىپ، قۇر ىرىلداعاننان باسقا كورسەتەر قاۋقارى جوق. تۇقىمداستارىنىڭ ءبىرى تاپا-تال تۇستە قان كوشەدە اتىلىپ، ءبىرى تىرىدەي ۇيتىلىپ، ەندى ءبىرى ماشيناعا سۇيرەلىپ، كورەسىنى كورگەنىن قالاي ۇمىتسىن؟! جۇرەگى بەرىشتەنبەي، قاتىگەزدەنبەي نە وڭسىن؟! شەتەلدىك قۇقىق قورعاۋشىلار كورىپ جاتقان قورلىقتارىن جىپكە تىزبەلەپ، ايداي الەمگە جاريا ەتىپ، اراشا تۇسپەگەن دە تۇقىمى ءبىر جولاتا قۇرىپ كەتەر مە ەدى قايتەر ەدى؟!

سولاردىڭ قارشا بوراتقان شاعىمىنان كەيىن «جانۋارلارعا جاۋاپكەرشىلىكپەن قاراۋ تارالى» زاڭ قابىلداندى. ەندى ەشكىم ەسكەرتۋسىز وق اتا المايدى. بۇرىنعى «اتۋ» ءسوزىنىڭ ورىنىن «اۋلاۋ» ءسوزى باسقانىمەن، ءالى دە قاۋىپ سەيىلگەن جوق. ادامنان ايلا اسقان با؟! شىمكەنت پەن استانا باستاماشى بولىپ، پەدوفيلدەرگە حيميالىق كاستراتسيا جاساعان سياقتى يتتەردى پىشتىرۋگە دە قىرۋار قارجى اجىراتتى. قاراپ تۇرساڭ يتتەردى تارتىپكە سالۋدا قىپ-قىزىل اقشا! وكىمەت وڭىرلەرگە جىلىنا يت اۋلاۋ ءۇشىن ميللياردتار بولەدى. ول اقشانى يگەرۋ ءۇشىن كادىمگى جول، مەكتەپ سالعان سياقتى مۇددەلى مەكەمە سمەتالىق قۇجات دايىندايدى، تەندەر ويناتىلادى.

ءاي، يتتەردىڭ وزدەرىندە دە بار. شەتەلدىڭ ءيتى سياقتى زاماناۋي تىرلىككە، جىلى بولمەدە، ديۆاندا كوگىلدىر ەكراننان مۋلتفيلم كورىپ، ادامشا تىرلىك كەشۋگە كونبەيدى. دالانى، كەزبەلىكتى اڭساپ تۇرادى. زاماناۋي ومىرگە ۇيرەنگەن تۇقىمداستارىن كورە المايدى. تالاپ تاستاعىسى كەلىپ تۇرادى. ءبارىن ايت تا ءبىرىن ايت: يت بولۋدىڭ قيىنى-اي؟!

ەسبول ۇسەنۇلى

Abai.kz