مەملەكەت باسشىسى قاسىم-جومارت توقاەۆ «تاۋەلسىزدىكتىڭ 25 جىلدىعى» مونۋمەنتى جانىنداعى الاڭدا ناۋرىز مەيرامىنا ارنالعان مەرەكەلىك ءىس-شاراعا قاتىسىپ، ءسوز سويلەدى. بۇل تۋرالى اقوردانىڭ جازدى.

«ناۋرىز – جىل باسى، حالقىمىز ەجەلدەن تويلاعان كوكتەم مەرەكەسى. بۇل – حالىق اسىعا كۇتەتىن اسا ەرەكشە مەيرام، قىستىڭ ىزعارى قايتاتىن، كوكتەم شۋاعىن توگەتىن ءسات. تابيعات تۇلەپ، تىرشىلىك قايتا جاڭاراتىن مەزگىل.

ەلىمىز ءاز-ناۋرىزدى ءاردايىم ىرىستى ىنتىماقتىڭ باستاۋىنا بالاعان. الىستاعان اعايىن ۇلىس كۇنى تاتۋلاسىپ، قايتا قاۋىشقان. جۇرت ءبىر-بىرىنە اقجارما تىلەكتەرىن ايتقان. كوپشىلىك ورتاق داستارحاننان ءدام تاتىپ، قاريالار جاستارعا باتاسىن بەرگەن.
بابالارىمىز ناۋرىز تويىن جاسامپاز ەڭبەكتىڭ مەيرامى ساناعان. بۇلاقتىڭ كوزىن اشىپ، اعاش وتىرعىزعان. ەلگە پايداسى تيەتىن يگى ىستەر اتقارعان. ءبىر سوزبەن ايتساق، ۇلىستىڭ ۇلى كۇنى – جاڭا ءومىردىڭ جارشىسى.
بۇل مەيرامدى حالقىمىز تۇتاس ەل بولىپ، ءبىر ۇلت بولىپ تۇگەل تويلايدى. ناۋرىز كەزىندە بۇكىل ەلگە ورتاق قۇندىلىقتار دارىپتەلەدى. ياعني، ءاز-ناۋرىز – ناعىز حالىقتىق مەيرام.
باۋىرمالدىق، جاناشىرلىق، سىيلاستىق، وتانشىلدىق سياقتى قاسيەتتىڭ ءبارى وسى ۇلىق مەرەكەدە كورىنىس تاپقان. ءبىز – اتا جولىن جالعاعان جۇرتپىز.

مەن ءدال ءبىر جىل بۇرىن تىڭ باستاما كوتەردىم. ەلىمىزدى تۇبەگەيلى جاڭعىرتۋ ءۇشىن اۋقىمدى رەفورمالار ۇسىندىم. حالىق بۇل باستامالاردى قولدادى. ءبىز جوسپارىمىزدى ءبىر جىلدا تابىستى جۇزەگە اسىردىق.

رەفەرەندۋم ارقىلى كونستيتۋتسياعا ماڭىزدى وزگەرىستەر ەنگىزدىك. بيلىك جۇيەسىن قايتا جاساقتاۋ ءۇشىن ماڭىزدى ساياسي شارالار ىسكە اسىرىلدى.

كەشە عانا وتكەن ءماجىلىس پەن ءماسليحاتتار سايلاۋى – بۇكىل رەفورمالارىمىزدى العا باستايتىن وتە ماڭىزدى قادام. بۇل سايلاۋ – اۋقىمدى وزگەرىستەردىڭ لايىقتى جالعاسى. وسىلايشا، مەملەكەتىمىز جاڭا داۋىرگە قادام باستى. جالپى، ەلىمىزدىڭ جاڭا ساياسي كەلبەتى قالىپتاستى.

تاريحي ءسات ۇلىستىڭ ۇلى كۇنىمەن تۇسپا-تۇس كەلىپ وتىر. مۇنىڭ زور سيمۆولدىق ءمانى بار.

جاڭا قازاقستاننىڭ بۇگىنگى بەينەسى ءاز ناۋرىزبەن تولىق ۇندەسەدى، ياعني ۇلىستىڭ ۇلى كۇنىندە قاسيەتتى وتانىمىز مۇلدە جاڭا سيپاتقا يە بولدى. مۇنى دۇنيە ءجۇزىنىڭ كوپتەگەن ەلدەرى مويىنداپ وتىر.

ەندى ساياسي جۇيەسى تولىق جاڭعىرعان ەلىمىز تىڭ قارقىنمەن داميدى. بۇل رەفورمالار ەكونوميكانىڭ وسۋىنە، حالىق تابىسىنىڭ ارتۋىنا جول اشادى. رەفورمالار مىندەتتى تۇردە جالعاسىن تابادى. ءبىز جان-جاقتى دامىعان قۋاتتى مەملەكەت بولامىز! بۇل – نەگىزگى ماقساتىمىز.

ازاماتتارىمىزدىڭ كوزقاراسى ءارتۇرلى بولعانىمەن، بارلىعىنىڭ تىلەگى – ءبىر. بۇل – ەلدىڭ اماندىعى، مەملەكەتتىڭ جارقىن بولاشاعى. ءبىز وسى ورتاق ماقسات جولىندا بىرلەسىپ ەڭبەك ەتەمىز.

الدا اتقاراتىن جۇمىس كوپ. ءبىز ءبىر ەل بولىپ ىسكە كىرىسسەك، الىنبايتىن اسۋ جوق. مەن جاسامپاز حالقىمىزدىڭ كەلەشەگى جارقىن بولادى دەپ سەنەمىن. مەملەكەتتىڭ مۇددەسى – بارىنەن بيىك.

ءبىز جاستارىمىزعا قامقور بولىپ، ولارعا بارىنشا جاعداي جاسايمىز. مەن جاستارعا سەنەمىن! ولارعا زور ءۇمىت ارتامىن!
ەل بولاشاعى – وسكەلەڭ ۇرپاقتىڭ قولىندا. ەندەشە، تۋعان ەلىمىزدى بىرگە دامىتايىق، اعايىن!

«بىرلىك ءتۇبى – بەرەكە» دەيدى حالقىمىز. قوعامدا كەلىسىم جانە تاتۋلىق بولسا، ەلىمىز كوزدەگەن ماقساتىنا جەتەدى.
ءبىزدىڭ ماقساتىمىز – ايقىن. بۇل – ادىلەتتى قازاقستاندى قۇرۋ. وسى جولدا ءبارىمىز ءبىر كىسىدەي جۇمىلايىق، ارداقتى اعايىن!
بيىل قاسيەتتى رامازان ايى ۇلىستىڭ ۇلى كۇنىمەن قاتار كەلدى. ورازا ۇستايتىن جاماعاتتىڭ نيەتى قابىل بولسىن! ءار شاڭىراققا قىدىر قونىپ، باق دارىسىن! جاڭا جىل قۇت-بەرەكە اكەلسىن!
ۇلىس وڭ بولسىن! اق مول بولسىن!»، -دەدى پرەزيدەنت سالتاناتتى شارادا.

Abai.kz