سارسەنبى, 17 شىلدە 2024
بيلىك 2491 19 پىكىر 29 ناۋرىز, 2023 ساعات 13:56

بۇگىن: ءماجىلىس انت بەردى. ۇكىمەت سوگىس ەستىپ، دوعارىسقا كەتتى

بۇگىن قر پارلامەنتىنىڭ ماجىلىسىنە سۋ جاڭا سايلانعان دەپۋتاتتار انت بەردى. ءماجىلىستىڭ سەگىزىنشى شاقىرىلىمدا 6 ساياسي پارتيادان 69 دەپۋتات پەن ءبىر مانداتتى وكرۋگتەر بويىنشا سايلانعان 29 دەپۋتات جۇمىس جاساماق.

انت قابىلداۋ ءراسىمى

وسك مەن ەكزيت-پولدىڭ ەسەبىنشە، ماجىلىستەگى ايقىن باسىمدىققا «امانات» پارتياسى يە. ودان بولەك، اۋىل، اق جول، رەسپۋبليكا، جسدپ جانە كحپ پارتيالارى دا ماجىلىسكە وتكەن.

«قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا، ونىڭ كونستيتۋتسياسى مەن زاڭدارىنا قاتاڭ باعىنۋعا، دەپۋتاتتىڭ وزىمە جۇكتەلگەن مارتەبەلى مىندەتتەرىن ادال اتقارۋعا انت ەتەمىن»، - دەلىنگەن انت ماتىنىندە.

ءدال وسى ماتىندە بۇگىن 98 دەپۋتات ەل-جۇرتتىڭ الدىندا ايتتى. ايتتى دا قىزمەتتەرىنە كىرىسىپ كەتتى.

پرەزيدەنت نە دەدى؟

ونان سوڭ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسى اشىلدى. جيىنعا مەملەكەت باسشىسى قاسىم-جومارت توقاەۆ قاتىستى. بىرقاتار رەفورمالىق ماسەلەلەردى تالقىعا شىعاردى.

پرەزيدەنت قاسىم-جومارت توقاەۆتىڭ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىنىڭ اشىلۋىندا كوتەرگەن ماسەلەلەرى:

ءبىرىنشى. ىسكەرلىك بەلسەندىلىكتى ىنتالاندىرۋ قاجەت.

ەكىنشى. ەلىمىزدىڭ وندىرىستىك الەۋەتىن بارىنشا ارتتىرۋ ماڭىزدى.

ءۇشىنشى. ينفراقۇرىلىمدى دامىتۋعا قاتىستى ۇستانىمداردى قايتا قاراۋ قاجەت.

ءتورتىنشى. ازىق-تۇلىك قاۋىپسىزدىگىن قامتاماسىز ەتۋگە باسا ءمان بەرۋ قاجەت.

بەسىنشى. ادام كاپيتالىنىڭ ساپاسىن بارىنشا ارتتىرۋ كەرەك.

التىنشى. الەۋمەتتىك تۇرعىدان وسال توپتاعى ازاماتتاردى قولداۋ – باستى مىندەتتىڭ ءبىرى.

جەتىنشى. ادام قۇقىعىن قورعاۋ جۇيەسىن نىعايتۋدى جالعاستىرۋ كەرەك.

سەگىزىنشى. مەملەكەتتىك باسقارۋدىڭ تيىمدىلىگىن جانە ستراتەگيالىق جوسپارلاۋدىڭ ساپاسىن كوتەرۋ قاجەت.

«سوڭعى جىلدارى الەمدە تەڭدەسسىز گەوساياسي، ەكونوميكالىق جانە تەحنولوگيالىق وزگەرىستەر بولدى. وسىعان وراي، ءبىزدىڭ كەيبىر ستراتەگيالىق قۇجاتىمىز وزەكتىلىگىن جوعالتتى. سوندىقتان «قازاقستان – 2050» ستراتەگياسىن» تۇبەگەيلى قايتا قاراۋ قاجەت. ياعني، بۇل قۇجاتتى قازىرگى جاھاندىق ۇدەرىستەردى ەسكەرە وتىرىپ، ەل دامۋىنىڭ ۇزاق مەرزىمگە ارنالعان باسىمدىقتارىن ايقىندايتىن ستراتەگياعا اينالدىرۋ كەرەك. جالپى، كەز-كەلگەن جۇمىس مۇقيات جوسپارلانۋى كەرەك. سوندا مەملەكەتتىك ساياسات ستراتەگيالىق سيپاتقا يە بولادى جانە تۇراقتى جۇزەگە اسىرىلادى. سونىمەن بىرگە ەلىمىز كەز كەلگەن سىن-قاتەرگە توتەپ بەرە الادى»، - دەدى قاسىم-جومارت توقاەۆ.

ءماجىلىستى قوشانوۆ قايتا تىزگىندەدى

قر پارلامەنتى ءماجىلىستىڭ توراعاسى لاۋازىمىنا ەرلان قوشانوۆ سايلاندى. ەرلان قوشانوۆتىڭ كانديداتۋراسىن ءماجىلىس دەپۋتاتى باقتىقوجا ىزمۇحامبەتوۆ ۇسىندى. داۋىس بەرۋ ناتيجەسى بويىنشا پالاتا دەپۋتاتتارى قر پارلامەنتى ءماجىلىسىنىڭ توراعاسى قىزمەتىنە ەرلان جاقانۇلى قوشانوۆتى ءبىراۋىزدان سايلادى.

«بۇل سەنىم مەن ءۇشىن ۇلكەن مارتەبە، سونداي-اق حالقىمىزدىڭ الدىندا زور جاۋاپكەرشىلىك. سوندىقتان پالاتا دەپۋتاتتارىمەن بىرگە سايلاۋشىلاردىڭ اماناتىن، مەملەكەت باسشىسىنىڭ رەفورمالارىن جۇزەگە اسىرۋ ءۇشىن تاجىريبەمدى، بار كۇش-جىگەرىمدى سالامىن دەپ ۋادە بەرەمىن»، - دەدى ءماجىلىس توراعاسى.

قوشانوۆتىڭ ەكى ورىنباسارى سايلاندى

ونان ءارى پالاتا توراعاسىنىڭ ەكى ورىنباسارى سايلاندى.

داۋىس بەرۋ بارىسىندا وتىرىسقا قاتىسقان 97 دەپۋتاتتىڭ 96-سى البەرت راۋدىڭ كانديداتۋراسىن قولداپ، 1 دەپۋتات قالىس قالدى.

وسىدان كەيىن ءماجىلىس توراعاسى 2-ءشى ورىنباسارى لاۋازىمىنا دانيا ەسپاەۆانىڭ كانديداتۋراسىن ۇسىندى. دانيا ەسپاەۆانىڭ كانديداتۋراسىن 94 دەپۋتات قولدادى، ءبىر دەپۋتات داۋىس بەرگەن جوق، 2 دەپۋتات قالىس قالدى.

ءماجىلىسىنىڭ كوميتەتتەرى سانى مەن اتاۋلارى وزگەرىسسىز قالدى.

وسىلايشا ءماجىلىس كوميتەتتەرىنىڭ سانى مەن اتاۋى مىنانداي قۇرامدا قالاتىن بولدى:

  1. اگرارلىق ماسەلەلەر كوميتەتى
  2. زاڭناما جانە سوت-قۇقىقتىق رەفورما كوميتەتى
  3. حالىقارالىق ىستەر، قورعانىس جانە قاۋىپسىزدىك كوميتەتى
  4. الەۋمەتتىك-مادەني دامۋ كوميتەتى
  5. قارجى جانە بيۋدجەت كوميتەتى
  6. ەكولوگيا ماسەلەلەرى جانە تابيعات پايدالانۋ كوميتەتى
  7. ەكونوميكالىق رەفورما جانە وڭىرلىك دامۋ كوميتەتى

مەملەكەت باسشىسى قاسىم-جومارت توقاەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا پرەمەر-ءمينيستردىڭ كانديداتۋراسىن سايلاۋدا جەڭىسكە جەتكەن «Amanat» پارتياسى ۇسىناتىنىن ايتتى.

«مەن پرەمەر-ءمينيستردىڭ كانديداتۋراسىن سايلاۋدا جەڭىسكە جەتكەن پارتيا مەملەكەت باسشىسىنا ۇسىنۋعا قۇقىلى دەپ ايتتىم. وسى رەتتە، ساياسي جاۋاپكەرشىلىك تە سول پارتياعا جۇكتەلەدى»، - دەدى مەملەكەت باسشىسى.

توقاەۆ ۇكىمەتتى سىنادى: مينيسترلەر شەشىم قابىلداۋدان قورقادى

توقاەۆ VIII سايلانعان قازاقستان رەسپۋبليكاسى پارلامەنتىنىڭ ءبىرىنشى سەسسياسىندا مەملەكەتتىك اپپارات پەن نورما شىعارۋ قىزمەتىن بيۋروكراتياسىزداندىرۋ ءتيىستى دەڭگەيدە جۇرگىزىلمەگەنىن ايتىپ سىنادى.

«بىلتىر مەملەكەتتىك اپپارات پەن نورما شىعارۋ پروتسەسىنىڭ قىزمەتىن بيۋروكراتياسىزداندىرۋ باعىتىندا ماڭىزدى جۇمىس باستالدى. ەڭ ماڭىزدى ماسەلەلەر بويىنشا ساپالى زاڭداردى تەز قابىلداۋ ءۇشىن قاجەتتى جاعدايلار جاسالعان.

الايدا، مويىنداۋ كەرەك، شىنايى بيۋروكراتياسىزداندىرۋ بولعان جوق. ۇكىمەت بيۋروكراتيا مەن ۆەدومستۆولار اراسىنداعى، ۇكىمەت پەن پرەزيدەنت اكىمشىلىگى اراسىنداعى كوپتەگەن كەلىسىمدەرگە سايكەس كەلەتىن ماڭىزدى شەشىمدەردى قابىلداۋدان باس تارتادى.

مينيسترلەر شەشىم قابىلداۋدان قورقادى، جاۋاپكەرشىلىكتى ارىپتەستەرىنە نەمەسە قاراماعىنداعىلارعا جۇكتەيدى. مۇنىڭ ءبارى قولايسىز»، - دەدى قاسىم-جومارت توقاەۆ.

وسىعان دەيىن ءاليحان سمايىلوۆ باسقاراتىن ۇكىمەت وزدەرىنىڭ دوعارىسقا كەتەتىنىن، جاڭا ۇكىمەت جاساقتالعانعا دەيىن مىندەتتەرىن ۋاقىتشا اتقاراتىنىن مالىمدەگەن ەدى.

Abai.kz

19 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1253
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 1973
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2020