جۇما, 29 ناۋرىز 2024
بيلىك 2426 25 پىكىر 30 ناۋرىز, 2023 ساعات 12:37

اقوردا مەن ءماجىلىس: ۇكىمەتكە ءاليحاننان ارتىعى جوق...

ءاليحان سمايىلوۆ قازاقستان رەسپۋبليكاسىنىڭ پرەمەر-ءمينيسترى لاۋازىمىندا قالدى. ول قاڭتار وقيعاسىنان كەيىن 2022 جىلعى 11 قاڭتاردا قازاقستان ۇكىمەتىن باسقارۋعا كەلگەن. قاسىم-جومارت توقاەۆ ءماجىلىستىڭ پلەنارلىق وتىرىسىندا ۇكىمەتتى باسقارۋعا ءاليحان سمايىلوۆتى ۇسىنعان.

«مەن سايلاۋدا جەڭىسكە جەتكەن پارتيا مەملەكەت باسشىسىنا پرەمەر-ءمينيستردىڭ كانديداتۋراسىن ۇسىنا الاتىنىن اتاپ ءوتتىم. بۇگىن مەن ءماجىلىس توراعاسى ەرلان جاقانۇلى قوشانوۆتى قابىلدادىم. جاڭا عانا فراكتسيا جەتەكشىلەرىمەن ارنايى كەزدەستىم. ۇكىمەت باسشىسى لاۋازىمىنا «Amanat» پارتياسى ۇسىنعان كانديداتتى تالقىلادىق. ورتاق مامىلەگە كەلدىك.

اتا زاڭىمىزدىڭ 44-بابىنا سايكەس، پرەمەر-مينيستر لاۋازىمىنا ءاليحان اسحانۇلى سمايىلوۆتىڭ كانديداتۋراسىن ۇسىنامىن. بارشاڭىز بۇل ازاماتتى جاقسى تانيسىزدار. بىلىكتى ءارى تاجىريبەلى مامان. جۇمىسقا ادال، ەڭبەكقور ادام. ول ۇكىمەتتىڭ الدىندا تۇرعان مىندەتتەردى جاقسى بىلەدى. وعان جاڭا ۇكىمەتتىڭ تىزگىنىن سەنىپ تاپسىرۋعا بولادى دەپ سانايمىن.

كونستيتۋتسيانىڭ 56-بابىنا سايكەس پرەمەر-مينيستر لاۋازىمىنا ءاليحان اسحانۇلى سمايىلوۆتى تاعايىنداۋ ءۇشىن ءماجىلىستىڭ كەلىسىم بەرۋىن سۇرايمىن»، - دەدى پرەزيدەنت.

وسىدان كەيىن داۋىس بەرگەن 97 ءماجىلىس دەپۋتاتىنىڭ 7-ەۋى قارسى داۋىس بەردى، 8 ادام قالىس قالدى. 82-ءىسى ءلاپپاي تاقسىر دەدى.

مەملەكەت باسشىسى قاسىم-جومارت توقاەۆ ءاليحان اسحانۇلى سمايىلوۆتى قازاقستان رەسپۋبليكاسىنىڭ پرەمەر-ءمينيسترى لاۋازىمىنا تاعايىنداۋ تۋرالى جارلىققا قول قويدى.

ايتا كەتەيىك، ءاليحان سمايىلوۆ 2018 جىلعى قىركۇيەكتەن باستاپ 2019 جىلعى اقپانعا دەيىن — قارجى ءمينيسترى قىزمەتىن اتقارعان.

2019 جىلعى 25 اقپاندا پرەمەر-ءمينيستردىڭ ءبىرىنشى ورىنباسارى – قارجى ءمينيسترى قىزمەتىنە تاعايىندالدى. 2021 جىلى 18 قاڭتاردا قر پرەزيدەنتىنىڭ جارلىعىمەن وسى قىزمەتىنە قايتا تاعايىندالدى.

ءتۇيىن. قاسىرەتتى قاڭتاردان كەيىن ۇكىمەتتىڭ تىزگىنىن ۇستاعان ءاليحان سمايىلوۆقا ءازىر تەڭ كەلەتىن تابىلماي تۇر. بۇل اقوردا مەن ونىڭ اينالاسىنداعىلاردىڭ پىكىرى. سونىڭ دالەلى، بيلىكتەگى دومينانت پارتيا بۇگىن پرەمەرلىككە قايتا ۇسىنىپ، ءماجىلىس ءبىراۋىزدان دەرلىك قولداپ، پرەزيدەنت قول قويىپ، كرەسلوسىن ساقتاپ قالدى.

وسىعان دەيىن قازاق قوعامى ۇكىمەتتى كىم تىزگىندەيدى دەگەن ساۋال توڭىرەگىندە قىزۋ-تالقى جاساعان. ۇكىمەت كرەسلوسىنا ۇمىتكەرلەر قاتارىندا ەڭ ىقتيمال نۇسقا رەتىندە الماتى قالاسىنىڭ اكىمى ەربولات دوساەۆتىڭ اتى اتالعان.

Abai.kz

25 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1581
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2280
عيبىرات

قايسار رۋحتى عازيز جان

مۇحتار قۇل-مۇحاممەد 3606