«بالا قۇقىعىنىڭ بۇزىلۋىنا جول بەرمەۋىمىز كەرەك»
عاني بەيسەمباەۆ بالالاردىڭ قاۋىپسىزدىگى ماسەلەسىنە ارنالعان جيىندا: قىزىلوردا، تۇركىستان، اتىراۋ، شىعىس قازاقستان وبلىستارىنداعى جاعدايدى تىلگە تيەك ەتىپ، الماتى وبلىسىنداعى جانتۇرشىگەرلىك وقيعاعا الاڭدايتىنىن ايتتى.
«مينيسترلىك بۇل جاعدايدى كەيبىر جاسوسپىرىمدەر اراسىنداعى شەكتەن تىس زۇلىمدىقتىڭ، قاتىگەزدىكدىڭ كورىنىسى دەپ ەسەپتەيدى. مۇنداي وقيعالار ەشبىر جەردە، ەشبىر ۋاقىتتا بولماۋى ءتيىس، قايتالانباۋى قاجەت! بۇل جاعدايعا قاتىستى قىلمىس جاساعاندار زاڭ تارتىبىندە قاتاڭ جاۋاپكەرشىلىككە تارتىلۋى كەرەك! ءبىز مۇنى قاداعالايمىز»، – دەدى ول.
بارلىق ايماقتىڭ ءبىلىم بەرۋ باسقارمالارىنىڭ، اۋداندىق جانە قالالىق ءبىلىم بولىمدەرىنىڭ، اۋماقتىق ساپانى قامتاماسىز ەتۋ دەپارتامەنتتەرىنىڭ باسشىلارى مەن قۇقىق قورعاۋ ورگاندارى، سونداي-اق دەنساۋلىق ساقتاۋ سالاسىنىڭ وكىلدەرى قاتىسقان جيىن بارىسىندا مينيستر الماتى جانە تۇركىستان وبلىستارىندا مەرت بولعان وقۋشىلاردىڭ اتا-انالارىنا، تۋعان-تۋىستارىنا كوڭىل ايتتى.
ۆەدومستۆو باسشىسى مينيسترلىكتىڭ بىردەن بالالاردىڭ قۇقىعىن قورعاۋ ۋاكىلدەرى، ايماقتىق ساپانى قامتاماسىز ەتۋ دەپارتامەنتتەرى، پسيحولوگتەر، پوليتسيا جانە دەنساۋلىق ساقتاۋ سالاسىنىڭ وكىلدەرىنىڭ قاتىسۋىمەن ارنايى كوميسسيا قۇرىپ، جەدەل ارەكەتتەر جاساعانىن اتاپ ءوتتى. «قازىرگى كەزدە كوميسسيا ءوزىنىڭ جۇمىسىن جالعاستىرىپ جاتىر. ىشكى ىستەر مينيسترىمەن سويلەستىم، قۇقىق قۇرعاۋ ورگاندارى جاعىنان دا جەدەل ارەكەت ەتۋ جۇمىستارى جۇرگىزىلەدى»، – دەدى ول.
وسى ورايدا ول، ءبىلىم بەرۋ سالاسىنداعى نەگىزگى مىندەت بالالارعا قاۋىپسىز جانە قولايلى ورتانى قۇرۋ ءۇشىن قاجەت ارەكەتتەردى قامتاماسىز ەتۋ ەكەنىن ايتتى.
«بالا قۇقىعىنىڭ بۇزىلۋىنا جول بەرمەۋىمىز كەرەك»، – دەگەن عاني بەيسەمباەۆ ءبىلىم باسقارماسى، اۋداندىق جانە قالالىق ءبىلىم بەرۋ بولىمدەرى باسشىلارى تاربيە جۇمىسى بويىنشا جەكە جاۋاپكەرشىلىكتەرىن كۇشەيتۋى ءتيىس ەكەنىن، ءبىلىم بەرۋ ۇيىمدارىنىڭ بارىندە ساباق ۋاقىتىندا، ساباقتان تىس ۋاقىتتا وقۋشىلاردى مەيىرىمدىلىككە، ادامگەرشىلىككە، قامقورلىققا، بىرلىككە، ءبىرىن-ءبىرى قولداۋعا شاقىراتىن ءىس-شارالار ءوتۋى قاجەت ەكەنىن ايتىپ، بارلىق وڭىرلەردە اتا-انالارمەن جۇمىستى جۇيەلى تۇردە كۇشەيتۋدى، سونداي-اق بالالار اراسىندا قانداي دا قۇقىقبۇزۋشىلىقتى الدىن الۋدا ۆەدومستۆوارالىق، ونىڭ ىشىنشە قۇقىق قورعاۋ، حالىقتى الەۋمەتتىك قورعاۋ ورگاندارى، دەنساۋلىق ساقتاۋ ۇيىمدارى اراسىندا ءوزارا بايلانىستى نىعايتۋدى تاپسىردى.
بۇعان قوسا، مينيستر اتا-انالارعا، بالالارعا قاتىستى ۇندەۋ جاسادى.
«قۇرمەتتى بالالار، كەلەسى ءسوزىمدى سەندەرگە ارناعىم كەلەدى. بارلىعىڭدى اتا-انالارىڭ الپەشتەپ ءوسىرىپ جاتىر. ءبىر-بىرلەرىڭە قاتىگەزدىك جاساۋعا جول بەرمەۋ كەرەك. ەگەر ءجابىر كورىپ نەمەسە جابىرلەۋدىڭ كۋاگەرى بولساڭدار، بىردەن كومەككە شاقىرىندار. ءار وڭىردە ءبىز بالا قۇقىقتارىن قورعايتىن وكىلدەردى تاعايىندادىق. مينيسترلىكتىڭ بالا قۇقىقتارىن قورعاۋ كوميتەتى تاۋلىك بويى سەندەرگە قىزمەت اتقارادى. ءتيىستى بايلانىس نومەرلەرىن بىلەسىڭدەر»، – دەدى ول.
Abai.kz
