كەشە سامارقاندا «ورتالىق ازيا – رەسەي» فورماتىندا ءوڭىردىڭ سىرتقى ىستەر مينيسترلەرى كەزدەستى. ولار حالىقارالىق كۇن ءتارتىبىنىڭ نەگىزگى اسپەكتىلەرىن جانە ايماقتىق قاۋىپسىزدىك پەن تۇراقتىلىق ماسەلەلەرىن قاراستىردى.

رەسەي دەلەگاتسياسىن باستاپ كەلگەن سەرگەي لاۆروۆ بۇل جولى دا «باتىستىڭ ارسىزدىعىن» تىلگە تيەك ەتتى.

«باتىستىڭ ارسىزدىعى، وعان قوسا سانكتسيا ماسەلەسىن موينىنا العان امەريكالىقتاردىڭ وڭىرگە قوقان-لوقىسى شەكتەن شىعىپ بارادى. ولار ايماق ەلدەرىنىڭ تاۋەلسىزدىگى مەن ەگەمەندىگىن سىيلاپ وتىرعان جوق»،-دەدى ول تريبۋنادان.

ارينە، ورتالىق ازيا ەلدەرىنىڭ رەسەي شەنەۋنىگىنەن ەستىگىسى كەلگەن ءسوزى بۇل ەمەس ەدى،-دەپ جازادى haqqin.az باسىلىمى.

ءوڭىر باسشىلارى اۋزىن بۋعان وگىزدەي ءۇنسىز عانا وتىردى. جارىتىپ مالىمدەمە جاساماستان تارقادى. ولاردىڭ ماسكەۋدەن باسقا دا ءوز مەملەكەتتەرىندە باس اۋىرتار ماسەلەسى جەتەرلىك.

لاۆروۆ بۇل جيىنعا قۇر كوپىرمە ءسوزىن سويلەۋگە كەلىپتى.

مىسالعا الاتىن بولساق، كەيىنگى ۋاقىتتا ورتالىق ازيا ەلدەرىنە كەلىپ كەتكەن اقش پەن باتىس ەلدەرىنىڭ وكىلدەرى ناقتى ۇسىنىسىن ايتتى. «سىزدەر رەسەيگە سانكتسيانى اينالىپ وتۋگە كومەكتەسىپ وتىرسىزدار ما؟  جوق بولسا، قانە، ماسەلەنى ويلانىپ شەشەيىك. ءبىزدىڭ سىزدەردىڭ جاعدايلارىڭىزدى ءتۇسىنىپ وتىرمىز. سوندىقتان سانكتسيانىڭ زالالى سىزدەرگە ءتيىپ كەتپەيتىندەي جولدى قاراستىرايىق» دەگەن ۇسىنىسپەن كەلدى. قورقىتىپ-ۇركىتكەن جوق، لاۆروۆ سياقتى مانيپۋلياتسياعا باستاعان جوق، ناقتى ۇسىنىسىن ايتا كەلدى.

ال قىتاي بولسا، ورتالىق ازيا ەلدەرىمەن «اۋقىمدى سەرىكتەستىك» قۇرۋعا دايىندالىپ جاتىر. بۇل جوسپار مامىرداعى  «قىتاي – ورتالىق ازيا» سامميتىندە قارالادى.

ورىس دەلەگاتسياسىنىڭ باسشىسى «رەسەيدىڭ ارنايى وپەراتسياسىن قولداڭدار» دەگەن بوس سوزدەن باسقا تۇك تە ۇسىنعان جوق. بۇل دەگەنىمىز سولتۇستىكتەگى كورشىگە جاڭا سىرتقى ساياسي باسىمدىقتار مەن باعدارلاردى ىزدەيتىن ۋاقىت كەلدى دەگەن ءسوز.

رەسەيدىڭ ورتالىق ازيا اۋماعىنداعى بەدەلى قۇلدىراي بەرەدى. بۇرىن كرەمل وڭىردەگى ەلدەردىڭ «تىنىشتىعىن قامتاماسىز ەتەمىز» دەيتىن بولسا، قازىرگى كۇنگى ونىڭ ۋكرايناعا سوعىسى ايماق ەلدەرىنىڭ سەنىمىنە سەلكەۋ ءتۇسىردى. ماسكەۋ ەندىگى كەزەكتە ءمان-ماعىناسىنان ايىرىلعان ۇگىت-ناسيحاتىنان باسقا ەشتەڭە ۇسىنا المايدى.

سەرگەي لاۆروۆتىڭ وسى جولعى ءىس-ارەكەتى «ماسكەۋدەن اۋلاقتاي تۇسىڭدەر» دەگەن بەلگى بەردى.

كەرىمسال جۇباتقانوۆ

Abai.kz