بۇگىن قوعامدا داۋ تۋعىزعان مالىمدەمەنىڭ اۆتورى الماتى قالاسى ءماسليحاتىنىڭ ەكس-دەپۋتاتى ا.باشينسكايا دەپۋتاتتىق مانداتىن تاپسىردى. بۇل تۋرالى ول ءوزىنىڭ الەۋمەتتىك پاراقشاسىندا جازدى.

«قۇرمەتتى دوستار!

مەن ءوز ءىس-ارەكەتىممەن ەلىمىزدىڭ بەيبىت ساياساتىنا كولەڭكە تۇسىرگىم كەلمەيدى. مەن كوپ ويلاندىم. مەنىڭ قىلىعىمدى ايىپتاعان ادامداردىڭ قانداي سەزىمدە بولعانىن تۇسىنەمىن.

تاعى دا قايتالاپ وتكىم كەلەدى: قازىرگىدەي قيىن ۋاقىتتا مەنىڭ بىلدىرگەن پىكىرىم ورىنسىز بولدى. قوعامنىڭ الدىندا كۇردەلى جاعدايعا الىپ كەلدى.

وسىعان بايلانىستى مەن پارتيانىڭ رەسمي ۇستانىمىمەن تولىقتاي كەلىسەمىن. جاۋاپكەرشىلىگىمدى سەزىنە وتىرىپ، مەن دەپۋتاتتىق مانداتىمدى تاپسىرامىن دەپ شەشىم قابىلدادىم.

جىبەرگەن قاتەلىگىم ءۇشىن بارلىق وتانداستارىم مەن پارتيالاستارىمنان شىن جۇرەكتەن كەشىرىم سۇرايمىن. بارىڭىزگە جاقسىلىق تىلەيمىن»،-دەپ جازدى ەكس-دەپۋتات.

ايتا كەتەيىك، بۇعان دەيىن AMANAT پارتياسى الماتى قالالىق فيليالىنىڭ توراعاسى ستانيسلاۆ كانكۋروۆ دەپۋتات ا.باشينسكايانىڭ داۋلى پىكىرىنە بايلانىستى تۇسىنىكتەمە بەرىپ، بۇل ماسەلەنى پارتيانىڭ بەي-جاي قالدىرمايتىنىن ايتقان بولاتىن.

«ا.باشينسكايا ابايسىزدا قاتەلىكپەن جازىلعان پىكىرى ءۇشىن ءوز تاراپىنان كەشىرىم سۇرادى. دەگەنمەن، ايتىلعان ءسوزدىڭ اۋىرتپالىعى مەن ونىڭ ساياسي استارىن ەسكەرە وتىرىپ، بۇل ماسەلەنى پارتيا بەي-جاي قالدىرمايدى.

ماسەلەنى تەز ارادا پارتيانىڭ ءتيىستى قۇرىلىمدارىندا قاراستىراتىن بولامىز.

ءاربىر جەرگىلىكتى ءماسليحات دەپۋتاتى ءوزى تۇرىپ جاتقان مەملەكەتتىڭ مۇددەسىن باستى ورىنعا قويۋى ءتيىس»،-دەپ جازدى ستانيسلاۆ كانكۋروۆ.

ەسكە سالايىق، تاياۋدا Deutsche Welle باسىلىمى Facebook پاراقشاسىندا ۋكراينا پرەزيدەنتى ۆلاديمير زەلەنسكيدىڭ قىرىمدى رەسەي باقىلاۋىنان قايتارىپ العىسى كەلەتىنى تۋرالى ماقالا شىعاردى.

اتالعان ماقالانىڭ استىنا AMANAT پارتياسى الماتى قالالىق ءماسليحاتىنىڭ دەپۋتاتى ا.باشينسكايا «ودان دا تۇركيانى الىڭىز، زەلەنسكي مىرزا! ول جاقتا كۇن جىلى، جانعا جايلى» دەگەن پىكىر قالدىرعان.

دەپۋتاتتىڭ مالىمدەمەسى قوعامدىق رەزونانس تۋدىردى. جەلى قولدانۋشىلارى رەسەيدى قولداعان دەپۋتاتتى مانداتىنان ايىرۋ كەرەكگىن جازدى.

ارتىنان باشينسكايا «ءداستۇر بويىنشا» كەشىرىم سۇرادى.

«مەن ۋكراينا پرەزيدەنتىنىڭ مالىمدەمەسىنە پىكىرىمدى ويلاماي جازدىم. باۋىرلاس تۇرىك حالقىنان كەشىرىم سۇرايمىن. مەن ۋكراينا مەن رەسەي حالقىنا تەك بەيبىت ءومىر تىلەيمىن. كەشىرىڭىزدەر، بۇل مەنىڭ قاتەلىگىم. مەنىڭ بۇل جاعدايعا پىكىر بىلدىرۋگە قاقىم جوق. مەنىڭ ءوز ەلىم بار. ەڭ بىرىنشىدەن، دەپۋتات رەتىندە مەن سول حالىقتىڭ ءال-اۋقاتىن ويلاۋىم كەرەك. مەن ءبىزدىڭ ازاماتتار مەن پارتيالاستاردان كەشىرىم سۇرايمىن»، – دەپ جازدى ول.

Abai.kz