ءماجىلىس دەپۋتاتى جيگۋلي دايراباەۆ ءىستى بولعان بالالارى ءۇشىن كەشىرىم سۇرامايتىنىن ايتتى.  

«ماعان قوياتىن كىناڭىز بولسا، سونى ايتىڭىز، سول ءۇشىن كەشىرىم سۇرايمىن. بالالار ءوز تىرلىگىنە وزدەرى جاۋاپ بەرەدى. ايىپ ەتپەڭىزدەر»، - دەدى ج. دايراباەۆ.

جۋرناليستەر «بالالارىڭىزعا ناشار تاربيە بەردىڭىز بە؟» دەگەن سۇراق قويدى.

«ونى ۋاقىت كورسەتەدى، الدىن الا ساۋەگەيلىك جاساي المايمىن. قۇقىق قورعاۋ ورگاندارى وزدەرى شەشەدى. سوتتىڭ جۇمىسىنا مەن ارالاسا المايمىن»، - دەپ جاۋاپ بەردى دەپۋتات.

ءسوز سوڭىندا شەتەلدە وسىنداي جاعداي بولسا، لاۋازىمدى تۇلعالار وتستاۆكاعا كەتەتىنى ايتىلىپ، ج. دايراباەۆتىڭ دەپۋتاتتىق مانداتتى نەگە تاپسىرمايتىنى سۇرالدى.

«مەن وتستاۆكاعا كەتكەننەن گورى قازاق حالقىنا وزدەرىڭ سياقتى پايدام كوپ تيەدى. اۋىل شارۋاشىلىعىن دامىتامىز»، - دەدى ول.

بۇدان بۇرىن بەلگىلى بولعانداي، تاراز قالاسىنىڭ سوتى الاياقتىق جاسادى جانە ءىرى مولشەردە اقشا جىمقىردى دەپ ايىپتاپ، ۇكىم شىعارعان ەكى كۇدىكتىنىڭ ءماجىلىس دەپۋتاتى جيگۋلي دايراباەۆتىڭ ۇلدارى بولىپ شىققان.

ماجىلىستەگى «اۋىل» پارتياسى فراكتسياسى دەپۋتاتى جيگۋلي دايراباەۆ مانداتىن تاپسىرمايتىنىن مالىمدەدى.

بىرنەشە كۇننەن بەرى الەۋمەتتىك جەلىدە ج.دايراباەۆتىڭ تۇرعىن ءۇي جانە جەر ماسەلەسىنە قاتىستى داۋلارعا قاتىسى تۋرالى اقپارات تاراپ، وعان دەپۋتات بۇگىن جاۋاپ بەردى.

«جالپى، كەز كەلگەن ادام قۇندى زات ساتىپ العاندا جەتى رەت ولشەپ بارىپ شەشىم قابىلدايدى. وتباسىما دەپ ساتىپ العان ءۇي ۋاقىت وتكەن سوڭ زاڭسىز دەپ ەسەپتەلگەنى كىمگە كەرەك؟ مۇنداي تاۋەكەل ەشكىمگە دە قاجەت ەمەس. وزدەرىڭىزگە وسى ءبىر سۇراقتى قويىپ كورسەڭىز، بىردەن تۇسىنەسىزدەر دەپ ويلايمىن. نوتاريۋس ارقىلى جاسالعان كەلىسىمشارتىمىز زاڭدى، ءۇي يەلەرىنىڭ قۇقىقتارى ساقتالعان. اقشا تالاپ ەتىپ جۇرگەن ازاماتتى تانىمايمىن دا. بىلۋىمشە، ول – ءۇي ساتقان ايەلدىڭ بۇرىنعى جۇبايى (اجىراسقان). ەرلى-زايىپتىلاردىڭ اراسىنا كىرىسەتىن ادام ەمەسپىن. ول ازامات مەنىڭ وسى لاۋازىمىمدى پايدالانىپ، بوپسالاۋ جولىن تاڭداعان. ايتا كەتەيىن، مۇنداي ارەكەت ءبىرىنشى رەت ەمەس. وسىدان ءبىراز ۋاقىت بۇرىن مەنى كىنالاعان ادام قارالاعانى ءۇشىن سوتتىڭ شەشىمىمەن جازالانىپ، ايىپپۇل تولەگەن بولاتىن. بۇل ارەكەتىن توقتاتپاسا قايتادان سوتقا جۇگىنۋىمە تۋرا كەلەدى»، - دەپ جازدى دەپۋتات مەركەدەگى ءۇيى تۋرالى.

ال، كەڭەس اۋىلىنداعى جەرگە قاتىستى جاعدايدىڭ 20 جىل بۇرىن بولعانىن ايتادى.

«جەرگە قاتىستى كومپانيانىڭ يەلەرى – اعايىندى يەمبەرديەۆتەر (ەرلان مەن نۇرلان ەرگەشبايۇلدارى). ولار قازىر قازاقستاندا. شاتاسپاسام، الماتىدا تۇرادى. جەردىڭ دە، اقشانىڭ دا يەسى وسىلار. مەنىڭ بۇل ىسكە ەشقانداي قاتىسىم جوق. كەزىندە مەن تەك جالدامالى قىزمەتكەر بولدىم. مەركى اۋدانىندا 1 مەتر دە جەرىم جوق. سوندىقتان دا، اۋىلداعى نارازى ادامداردىڭ ارىزدارى جەر يەلەرى يەمبەرديەۆتەرگە جولدانۋى ءتيىس دەپ ەسەپتەيمىن. اۋىل تۇرعىندارى مەنى نەگىزسىز كىنالاماي، قايتا كومەگىمە جۇگىنگەنى دۇرىس ەدى. ءالى دە كەش ەمەس»، - دەيدى جيگۋلي دايراباەۆ.

Abai.kz