ۋكراينا تمد ەلدەرى باسشىلارىنىڭ 9 مامىردا ماسكەۋدە وتكەن اسكەري پارادقا قاتىسۋىن «دۇشپاندىق ارەكەتكە» بالادى.

«اسكەري شەرۋدەن ءبىر ءتۇن بۇرىن رەسەي فەدەراتسياسى ۋكراينانى قيراتىپ، ادام ءولىمىن كوبەيتە ءتۇسۋ ءۇشىن 25 زىمىران جىبەردى، ونىڭ ىشىندە 15-ءى كيەۆكە ءتۇستى»، - دەلىنگەن حابارلامادا.

ۋكراينا ۆەدومستۆوسىنىڭ مالىمدەمەسىندە ورتالىق ازيا مەن كاۆكاز حالىقتارىنىڭ 78 جىل بۇرىن ءناتسيزمدى جەڭۋگە باعا جەتپەس ۇلەس قوسقانى ايتىلعان.

ەندى كەلىپ ولاردىڭ باسشىلارىنىڭ رەسەيدەگى پارادقا قاتىسۋى «ۋكرايناعا دەگەن دۇشپاندىق، ءوز ەگەمەندىگى مەن ءومىرى ءۇشىن كۇرەسىپ جاتقان ۋكراين حالقىنا دەگەن قۇرمەتسىزدىك» دەپ باعالادى.

9 مامىردا ماسكەۋدە وتكەن اسكەري شەرۋگە قازاقستان، قىرعىزستان، تاجىكستان، وزبەكستان، تۇركىمەنستان، بەلارۋس، ارمەنيا سياقتى تمد ەلدەرىنىڭ جەتى پرەزيدەنتى قاتىسقان بولاتىن.

Abai.kz