مامىر ايىندا الماتى قالاسىندا «دۇيسەنبىلىك سپورت» جوباسى اياسىندا فۋتبولدان ىرىكتەۋ ويىندارى ءوتتى. وعان «قىرعاۋىل»، «كەنجەحان»، «باتىر»، «باقوردا»، «بەرەكە»، «التىن وردا»، «7 قۇرداس»، «سالامات»، «بارىس» ساۋدا ورتالىقتارىندا جۇمىس ىستەيتىن جاستاردان جاساقتالعان 10 كوماندا قاتىستى. جوبانىڭ اتى ايتىپ تۇرعانداي جارىستار ءار اپتانىڭ دۇيسەنبى كۇندەرى ءوتتى.

«دۇيسەنبىلىك سپورت» جوباسىن جىل سايىن وتكىزۋ داستۇرگە اينالعان. جوبانىڭ تاپسىرىس بەرۋشىسى – الماتى قالاسى جاستار ساياساتى باسقارماسى. ونى ورىنداۋ بيىل بايقاۋ قۇجاتتارىنا سايكەس «Social project management» ورتالىعى» قوعامدىق قورىنا جۇكتەلدى.

العاشقى ىرىكتەۋ ويىندارى كەزىندە 10 كوماندا ەكى توپقا بەس-بەستەن ءبولىنىپ، ءوزارا ىرىكتەۋ ويىندارىن جۇرگىزدى. ناتيجەسىندە 10 كوماندا ىشىنەن 4 كوماندا جارتىلاي فينالعا سۋىرىلىپ شىقتى. ولار «باقوردا»، «اراسان»، «بارىس»، «التىن وردا» كوماندالارى ەدى. چەمپيونات ەرەجەسىنە ساي جارتىلاي فينالدا «باقوردا» مەن «التىن وردا»، «اراسان» مەن «بارىس» كوماندالارى كەزدەستى.

«باقوردا» مەن «التىن وردا» كوماندالارى اراسىنداعى ويىندا العاشقىلاردىڭ مىسى باسىم ەكەنى ءا دەگەننەن ءبىلىنىپ تۇردى. باقوردالىقتار كوماندالىق پاس بەرۋدە ۇيىمشىلدىق جاعىنان قارسىلاستىرىنان ءبىر ساتى جوعارى تۇردى دەسەك بولادى. ولار ەكى تايم قورىتىندىسى بويىنشا التىن وردالىقتاردىڭ قاقپاسىن بەس رەت ءدال كوزدەپ، وزدەرىنە تەك ءبىر گول عانا جىبەردى. ويىن 5:1 ەسەبىمەن اياقتالىپ، «باقوردا» اقتىق فينالعا ءوتتى.

جارتىلاي فينالدىڭ كەلەسى جۇبى اراسىنداعى ويىن باسقاشا ءوربىدى. «بارىس» پەن «اراسان» كوماندالارى ەكى تايم بويى ارپالىسىپ، ءبىر ءبىرىنىڭ وسال تۇسىن تابا المادى. اسىرەسە قاقپاشىلار كەرەمەت ويىن كورسەتتى. ويىننىڭ تارتىستى وتكەنى سونشا تورەشى ويىن ءتارتىبىن بۇزعان ويىنشىلارعا بىرنەشە مارتە سارى قاعاز كورسەتۋگە ءماجبۇر بولدى. كەيبىر ويىنشىلار جاراقات الىپ، ولارعا مەديتسينالىق كومەك كورسەتىلدى. ال ويىن تارتىستى وتكەنىنە قاراماستان نەگىزگى تايمدار 0:0 ەسەبىمەن اياقتالدى. تورەشى جەڭىمپازدى پەنالتي قورىتىندىسى بويىنشا انىقتاۋ تۋرالى شەشىم شىعاردى. ناتيجەسىندە «بارىس» ويىنشىلارىنىڭ ءبىرى ءمۇلت كەتىپ، قاقپاشى ونىڭ تەپكەن دوبىن قايتارىپ تاستادى. ال اراساندىقتار تەپكەن دوپتىڭ ءبارى قاقپا ىشىنەن تابىلدى. پەنالتي قورىتىندىسى بويىنشا 4:5 ەسەبىمەن «اراسان» كومانداسى «باقوردامەن» فينالدا باق سىناساتىن بولدى.

ءۇشىنشى ورىن ءۇشىن كۇرەس تە كوماندالار ءۇشىن وڭاي بولمادى. «التىن وردا» مەن «بارىس» كوماندالارى قولا مەدال ءۇشىن جان الىسىپ جان بەرىستى. ەكى كوماندانىڭ شابۋىلشىلارىنان گورى قاقپاشىلارى مىقتى ويناپ، ولار الىستان، جاقىننان كەلگەن دوپتاردى قايتارىپ تاستاپ وتىردى. قولا مەدال يەگەرى دە ويىننان كەيىنگى پەنالتي قورىتىندىسى بويىنشا انىقتالىپ، جۇلدەنى «بارىس» كومانداسى ءوز قانجىعاسىنا بايلادى.

«باقوردا» مەن «اراسان» كوماندالارىنىڭ فينالدىق ويىنىندا گول كوپ بولدى. اراساندىقتار ويىن باستالا سالا بىرىنەن سوڭ ءبىرى ەكى گولدى قارسىلاستارىنىڭ قاقپاسىنا توعىتتى. الايدا باقوردالىقتار دا ەر ەكەن. ولار دا ەكى گولدى قاتار سوعىپ، ەسەپتى تەڭەستىرىپ ۇلگەردى. وسىلايشا نەگىزگى ۋاقىت 2:2 ەسەبىمەن اياقتالىپ، ەكى كوماندا تورەشىنىڭ شەشىمىمەن پەنالتيگە جۇگىندى. پەنالتي قورىتىندىسى بويىنشا «اراسان» كومانداسىنىڭ اسىعى الشىسىنان ءتۇسىپ، ولار «دۇيسەنبىلىك سپورت» جوباسى اياسىندا وتكەن چەمپيوناتتىڭ جەڭىمپازى اتانىپ، كۋبوكتى يەلەندى.

جارىس سوڭىندا ءبىرىنشى ورىن العان «اراسان» كومانداسىنا 150 مىڭ تەڭگەنىڭ، ەكىنشى ورىن العان «باقوردا» كومانداسىنا 100 مىڭ تەڭگەنىڭ، ءۇشىنشى ورىن العان «بارىس» كومانداسىنا 50 مىڭ تەڭگەنىڭ سەرتيفيكاتتارى تابىس ەتىلدى.

Abai.kz