قازاقستانعا اتتاپ باسۋى مۇڭ بولعان كونستانتين زاتۋلين بايقوڭىردا ءجۇر دەگەن اقپارات كەشەلى-بەرى ەلدى شۋلاتتى.

توقاەۆ لۋگانسك جانە دونەتسك سەپاراتيستەرى جاريالاعان «ەرگەجەيلى مەملەكەتتەردى» مويىندامايتىنىن ايتقاننان كەيىن: «قازاقستاندا ۋكراينا ستسەناريى قايتالانۋى مۇمكىن» دەگەن، سونىمەن قوسا «ەلىمىزدىڭ بىرقاتار ايماعى تاريحي تۇرعىدان رەسەيگە تيەسىلى» دەپ كوكىگەن كىساپىر كونستانتين – رەسەي مەمدۋماسىنىڭ دەپۋتاتى.

وسى سوزدەن كەيىن پاسپورت تەكسەرۋ ايماعىندا ونى قازاقستانعا وتكىزبەي قويعان. سول زاتۋلين «گازەتا.Ru» سايتىنا ەكىنشى كۇن قاتارىنان بايقوڭىردا جۇرگەنىن ايتىپتى.

«ءبىز كەشە ماسكەۋدەن بايقوڭىرعا كەلدىك. قازاقستان كەدەنشىلەرىمەن قۇجاتتىق تەكسەرۋ بارىسىندا ماسەلە بولعانى راس. ءبىز سول تەكسەرۋ ايماعىندا ءبىراز ۋاقىت جوعالتۋعا ءماجبۇر بولدىق. شەكاراشىلار مەنى نەگە وتكىزبەي تۇرعانىن ناقتى ايتپادى. ءبىز ەلشىلىككە ماسەلەنى جەتكىزگەن سوڭ، بۇل تۇسىنىسپەۋشىلىك شەشىلدى»، – دەيدى زاتۋلين.

زاتۋلين سوزىنە سەنسەك، ونىڭ قازاق جەرىنە كەلۋىندە ساياسي استار جوق ەكەن. ول تەك بايقوڭىردا تەننيس ءتۋرنيرىن تاماشالاپ، قالاداعى رەسەيلىكتەرمەن كەزدەسۋدى كوزدەپتى. ايتپاقشى، قازاقستاننىڭ بىرتۇتاستىعىنا نۇقسان كەلتىرەتىن داۋلى پىكىردىڭ يەسى: «ەكى ەل اراسىنداعى دوستىق قاتىناستى نىعايتۋعا كۇش سالامىن»، – دەيدى.

Abai.kz