شاكارىم - قازاق فيلوسوفياسىنداعى شوقتىعى بيىك تۇلعا. تامىرىن حالىق دانالىعىنان باستاۋ الاتىن ونىڭ كوركەم ءسوزدى مۇرالارى تەرەڭ ويلى، اقىندىق شەبەرلىكتىڭ، ۇلتجاندىلىقتىڭ، ازاماتتىقتىڭ مەكتەبى.

بيىل   ۇرپاقتان-ۇرپاققا ساباقتاساتىن وشپەس مۇرا قالدىرعان ۇلكەن جۇرەكتى، كوركەم ءسوزدىڭ حاس شەبەرى، ءسوز زەرگەرى شاكارىم قۇدايبەردىۇلىنىڭ تۋعانىنا – 165 جىل.

شاكارىمنىڭ اتىندا قازىر سەمەيدە بەلگىلى ۋنيۆەرسيتەت بار. شاكارىمتانۋ ماسەلەلەرى بويىنشا عىلىمي-زەرتتەۋ ورتالىعى جۇمىس ىستەيدى. شاكارىمنىڭ ەنتسيكلوپەدياسى جارىق كوردى. شاكارىم جۋرنالى شىقتى. عىلىمي باعىت قالىپتاستىرىلدى. وسىنىڭ توڭىرەگىندە شاكارىمگە قىزىعۋشىلار، زەرتتەۋشىلەر كوبەيدى. ارينە، بۇعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى، قر ۇعا اكادەميگى، تاريح عىلىمدارىنىڭ دوكتورى ەرلان سىدىقوۆتىڭ ءسىڭىرىپ جۇرگەن ەڭبەگى ەرەكشە.

2012 جىلى شاكارىم كىتابى ە. سىدىقوۆتىڭ اۆتورلىعىمەن «جزل» سەرياسىمەن ورىس تىلىندە ماسكەۋدەن شىققان بولاتىن. ول كىتاپ قالىڭ وقىرمان قاۋىمى تاراپىنان جىلى قابىلداندى. جاقسى تارادى. ورىس تىلىندە شىققاننىڭ اسەرى بولار، قىتاي، تۇرىك، ۋكراين تىلدەرىنە اۋدارىلدى. وسىلايشا، شاكارىم كىتابى بەس تىلگە اۋدارىلعان بولاتىن.

كۇنى كەشە تاشكەنت قالاسىندا «Muharrir nashriyoti» باسپاسىنان وزبەكستان جازۋشىلار وداعىنىڭ مۇشەسى، وزبەكستان رەسپۋبليكاسى تۋران عىلىم اكادەمياسىنىڭ اكادەميگى ابدۋللا رۋستاموۆتىڭ تارجىماسىمەن «شاكارىم» كىتابى وزبەك تىلىندە جارىق كوردى.

بۇل كىتاپ ەندى التىنشى تىلدە سويلەي باستادى.

قازتاي ايانا سەرىكقىزى

Abai.kz