ءزۇلفيانىڭ كوز جاسى....
سەمەيدىڭ ورمانى ورتەنىپ جاتىر. ازىرگە 60 مىڭ گەكتار ورمان ورتەنگەن. ەگەر سوندىرە الماسا، بۇدان دا ۇلعايا تۇسەرى ءسوزسىز. ءتىلسىز جاۋمەن الىسام دەپ 14 ادام ادام قازا تاپتى. يماندارى سالامات بولسىن.
پرەزيدەنت وتكىزگەن توتەنشە جيىندا ەكولوگيا ءمينيسترى جىلاپ تۇردى.
بۇل كوز جاس – شاراسىزدىقتىڭ كوز جاسى.
بۇل كوز جاس – بيلىكتىڭ جەمقور ەكەنىن ايتا الماي قىستىعىپ، ىشتەن تىنعان جاس شەندىنىڭ كوز جاسى.
بۇل كوز جاس – ەلىمىزدىڭ كادر ساياساتىنىڭ تىعىرىققا تىرەلگەنىنىڭ كوز جاسى.
بۇل كوز جاس – اسقىنعان بيۋروكراتيانى، شەنەۋنىكتەردىڭ قامسىزدىعىن، قايراتسىزدىعىن ءۇنسىز ايىپتاعان كوز جاس.
بۇل كوز جاس – پاراقور، توق ۇلىقتاردىڭ اراسىندا ءوزىن ارتىق سەزىنۋ كوز جاسى.
بۇل كوز جاس – ءورت تۇگىلى ءومىردى بىلمەيتىن، ەل ىشىندە وسپەگەن، جۇرتتىڭ مۇڭ-مۇقتاجىن بىلمەيتىن، قاراپايىم حالىقتان تىم الىس، جاس شەنەۋنىكتىڭ بىردەن مينيستر بولعانىنا وكىنگەن كوز جاسى.
بۇل كوز جاس – ءوزىن مينيسترلىككە ءومىر كورسەتپەي، قىزمەت باسپالداقتارىمەن ساتىلاپ، سوناۋ تومەننەن وسىرمەي، كاسىبي تۇرعىدان جەتىلدىرمەي، بىردەن مينيستر قويا سالعان «جەبەۋشىلەرىنە» لاعنەت ايتقان كوز جاسى.
بۇل كوز جاس – بىلىكسىز كادردىڭ كوز جاسى.
بۇل كوز جاس – ءسوز جۇزىندە بار «جاڭا قازاقستاننىڭ» ءىس جۇزىندە جوق ەكەنىن بىلدىرگەن كوز جاس...
بۇل كوز جاستا ءبارى بار: جەمقورلىقتىڭ جويىلمايتىنى، ەل مەن جەرگە جانى اشىمايتىن جەمقور شەنەۋنىكتەردىڭ بۇدان ءارى دە ەل باسقارا بەرەتىندىگى;
اق وردانىڭ وتىرىك ستاتيستيكامەن ءومىر سۇرەتىندىگى;
كوزبوياۋشىلىقپەن اينالىسۋ – بيلىكتىڭ ەڭ سۇيىكتى ءىسى ەكەندىگى;
شەنەۋنىكتىك كورپۋستىڭ ەشتەڭەدەن ساباق المايتىندىعى;
شەنەۋنىكتەردىڭ مەملەكەت مۇددەسى ءۇشىن ەمەس، قاراقان قارا باسىنىڭ قامى ءۇشىن، مومىن ەلدى تالاۋ، مەملەكەت داۋلەتىن اياۋسىز تالان-تاراجعا سالۋ ءۇشىن بيلىكە باراتىندىعى;
وتانعا جاساعان وپاسىزدىعى، حالىققا جاساعان قياناتى ءۇشىن ەش جازالانبايتىنى، ءارى كەتسە سوگىسپەن قۇتىلا الاتىنىنا سەنىمدىلىگى;
تاريح پەن ۇرپاق الدىندا ەش جاۋاپ بەرمەيتىندىگىنە كامىل سەنەتىنى ت.ب.
ءزۇلفيا – وتىز جىلعى تاۋەلسىزدىك كەزەڭىندە شىن جىلاعان تۇڭعىش مينيستر. وتىز جىلدا حالىقتى اياۋسىز قاناپ كەلگەن ءالى دە قاناي بەرەتىن مىنا بەزبۇيرەك ۇكىمەتتەن قىستىعىپ جىلايتىن ءبىر مينيستر شىقتى-اۋ اقىرى.
ءزۇلفيا، سەنىڭ كوز جاسىڭ مىنا دۇلەي ءورتتى سوندىرە الماس، بىراق جىلاي ءتۇس. پرەزيدەنتتىڭ قابىلداۋىنا بارىپ، ۇكىمەتتە بولىپ جاتقان ماسقارالاردى ايتىپ جىلا، قاۋقارسىز پرەمەر ءمينيستردى وتستاۆكاعا جىبەرىڭىز دەپ جىلا.
«ەسكى قازاقستاننىڭ» كۇللى كادرىن حالىقشىل، مەملەكەتشىل ازاماتتارمەن الماستىرىڭىز دەپ، جىلا.
بيلىكتى جايلاعان جەمقورلىققا تەز ارادا توتەنشە شارا قولدانىڭىز ايتپەسە، تاۋەلسىزدىكتەن ايىرىلامىز دەپ جىلا.
ۇكىمەت وتىرىسىندا دا جىلا.
مەملەكەتكە جەمقورلىق سالدارىنان قاۋىپ ءتوندى، سەندەر نەعىپ وتىرسىڭدار دەپ جىلا.
19 ميلليون حالىقتى تاقىر كەدەي قىلعان كىلەڭ بەتسىز، وڭشەڭ ۇياتسىزدار دەپ جىلا.
شالبار كيگەن سورلىلار، ەركەك ەمەسسىڭدەر دەپ جىلا.
وزدەرىڭدە ار بار ما، وجدان بار ما، مىنانداي جاعدايدى كورىپ وتىرىپ، مينيستر، اكىم بولماق تۇگىلى قالاي جەر باسىپ جۇرسىڭدەر دەپ جىلا.
نامىستارىڭ بار ما ءوزى دەپ جىلا.
ءبىر سىلكىنىپ، مەملەكەت ءۇشىن، حالىق ءۇشىن جاننان كەشىپ، ادال ءىس قىلاتىن كەزدەرىڭ كەلدى عوي دەپ جىلا.
وتانىمدى وسىنشاما جەگەندەرىڭ ءۇشىن ۇرپاقتارىڭ جاۋاپ بەرەدى، ولگەن سوڭ كورلەرىڭدە تىنىش جاتپايسىڭدار دەپ جىلا.
الدارىڭدا ار سوتى، ۇرپاق سوتى، تاريح سوتى تۇر دەپ جىلا.
ءبارىن ايتىپ جىلا، ەلدىڭ زارىن ايتىپ جىلا.
«ەستيتىن ۇكىمەت» حالىقتىڭ جان ايقايىن ەستىمەيدى عوي، بالكىم ءوز ىشىنەن شىققان جالعىز شەنەۋنىكتىڭ كوز جاسىن كورەر، زارىن ەستىر...
ەرلان تولەۋتاي
Abai.kz
