قازاقستان رەسپۋبليكاسى ادىلەت مينيسترلىگى مەن باسقا دا مەملەكەتتىك ورگانداردىڭ بىرلەسە قابىلداعان شارالارىنىڭ ناتيجەسىندە Jusan توبى قازاقستاندىق يۋريسديكتسياعا قايتارىلدى، دەپ حابارلايدى ادىلەت مينيسترلىگىنىڭ ءباسپاسوز قىزمەتى.

2021 جىلى جوسپارلى تۇردە Jusan توبى، سونىڭ ىشىندە Jusan Bank جانە تەلەكوممۋنيكاتسيا، اۋىل شارۋاشىلىعى جانە باسقا دا سالالارداعى بىرقاتار اكتيۆتەر شەتەلدىك يۋريسديكتسياعا شىعارىلدى. ناتيجەسىندە قازاقستان ۇكىمەتى ءىس جۇزىندە كومپانيالار توبىنا باقىلاۋىنان ايىرىلدى.

قازاقستانعا قايتارىلعان كومپانيالار توبى ۇكىمەت پەن باسقا دا مەملەكەتتىك قۇرىلىمداردىڭ باقىلاۋىندا قازاقستان زاڭناماسىنا ساي جۇمىس ىستەيدى.

Jusan Bank قازاقستاندىق ءبىلىم بەرۋ ۇيىمدارىن قارجىلاندىرۋدى جالعاستىرۋ مىندەتتەمەسىن الدى، – دەلىنگەن حابارلامادا.

سونىمەن قاتار، بانكتىڭ مەملەكەتتەن ەرتەرەكتە العان كومەگى مەرزىمىنەن بۇرىن قايتارىلادى.

مەملەكەت باسشىسىنىڭ شەتەلگە شىعارىلعان اكتيۆتەردى قايتارۋ تۋرالى تاپسىرماسىن ورىنداۋ جالعاسادى، – دەپ حابارلايدى مينيسترلىك.

Jusan Bank ءباسپاسوز قىزمەتىنىڭ حابارلاۋىنشا، اتالعان شەشىمنىڭ ءبىر شارتى – قازاقستاندىق ءبىلىم بەرۋ ۇيىمدارىن قارجىلاندىرۋدى جالعاستىرۋ.

ءبىز قازاقستاندىقتاردىڭ قارجىلىق جانە قارجىلىق ەمەس قىزمەتتەر بويىنشا ارتىپ كەلە جاتقان سۇرانىستارىن قامتاماسىز ەتە الاتىن زاماناۋي تسيفرلىق بانكينگتى قۇرۋ بويىنشا قابىلدانعان ستراتەگيانى ۇستانامىز. وتكەن جىلدىڭ تابىستى ناتيجەلەرى جانە بانكتىڭ اعىمداعى قارجىلىق جاعدايى وزىنە العان بارلىق مىندەتتەمەلەردى ورىنداۋعا، سونىڭ ىشىندە مەملەكەت كومەگىنىڭ ءبىر بولىگىن مەرزىمىنەن بۇرىن قايتارۋعا مۇمكىندىك بەرەدى، – دەيدى بانكتىڭ ءباسپاسوز قىزمەتى.

Abai.kz