زەلەنسكيدەن ونىڭ باتىرى كىم ەكەنىن – سۇراپتى. ال ونىڭ جاۋابى كوپ نارسەنى اڭعارتادى.

ۆلاديمير زەلەنسكي بەس جىلعا جۋىق ۋاقىت بويى سوعىسىپ جاتقان ەلدى باسقارۋ جاۋاپكەرشىلىگىن ارقالاپ كەلە جاتقان ادام.

Reuters اگەنتتىگىنە بەرگەن سۇحباتىندا ۋكراينا پرەزيدەنتى بۇرىنعى ومىرىنەن نەنى كوبىرەك ساعىناتىنىن ايتىپ بەرگەن ەكەن.

ودان: «اكتەر بولعان كەزىڭىزدى ساعىناسىز با؟» دەپ سۇراعاندا، زەلەنسكي: «مەن جاقسى اكە بولۋدى ساعىندىم»، - دەپ جاۋاپ بەرەدى.

– بالالارىڭىز كىشكەنتاي كەزىندە ولارعا نە دەپ ايتاتىن ەدىڭىز؟

– مەن سەنى جاقسى كورەمىن!.

– ال قازىر ەسەيگەن بالالارىڭىزعا نە ايتار ەدىڭىز؟

– مەن سەنى ساعىندىم...

سوعىس قۇرساۋىنداعى پرەزيدەنتتىڭ جان دۇنيەسىندەگى ساعىنىش پەن مۇڭدى بىلدىرەتىن وسى ءۇش اۋىز ءسوزدىڭ سالماعى تىم اۋىر. سان ءتۇرلى ساياسي مالىمدەمەلەردىڭ، شىم-شىتىرىق كەلىسسوزدەردىڭ جانە الەمدىك كوشباسشىلاردىڭ ۇزدىكسىز قىسىمىنىڭ ارتىندا بالالارىمەن بىرگە ۋاقىت وتكىزۋدى اڭسايتىن قاراپايىم اكە تۇر.

سودان كەيىن اڭگىمە باتىرلىق تۋرالى سۇراققا ۇلاسادى.

– ءسىز باتىرسىز با؟

– جوق.

– ال كىمدى باتىر دەپ سانايسىز؟

– مەنىڭ بالالارىم، ءبىزدىڭ اسكەرىمىز جانە ۋكراينا حالقى. مەن ءوز ۇلتىمنىڭ ءبىر بولىگىمىن. مەنىڭ ويىمشا، ءبىزدىڭ ۇلتىمىز ناعىز باتىر.

ول ءوزىن باتىر رەتىندە كورسەتۋگە مۇمكىندىك بولعان ەدى. الايدا زەلەنسكي وتباسى تۋرالى، ۋكراينانى قورعاپ جۇرگەن ساربازدار مەن سوعىسقا قاتىسىپ جاتقان ادامدار تۋرالى ايتادى.

سوعىس كەزىندەگى پرەزيدەنت زەلەنسكي تۋرالى ايتىلىپ جۇرگەن سان الۋان اڭگىمەلەردىڭ ىشىندە بۇل سۇحبات ونىڭ لاۋازىمىنىڭ ار جاعىندا تۇرعان ادامدى جاقىنىراق تانۋعا مۇمكىندىك بەرگەندەي.

بالكىم، ەڭ جۇرەك تەبىرەنتەر سوزدەرى باتىلدىق نەمەسە كوشباسشىلىق تۋرالى سوزدەر ەمەس، ءدال وسى – «مەن سەنى ساعىندىم» شىعار...

امانتاي تويشىبايۇلى

Abai.kz