ترامپ قىتاي جانە رەسەي باسشىلارىمەن ۇشجاقتى كەزدەسۋ وتكىزۋگە قارسى ەمەس ەكەنىن مالىمدەدى.

اقش پرەزيدەنتى دونالد ترامپ قاراشا ايىندا قىتايدا وتەتىن ازيا-تىنىق مۇحيتى ەكونوميكالىق ىنتىماقتاستىعى (اوسشك/اپەك) ءسامميتى اياسىندا اقش، رەسەي جانە قىتاي كوشباسشىلارىنىڭ ۇشجاقتى كەزدەسۋىنە قاتىسۋعا قارسى ەمەستىگىن ءبىلدىردى. بۇل تۋرالى ول 19 قازاندا جۋرناليستەرگە بەرگەن سۇحباتىندا مالىمدەدى.

اقش باسشىسى ۇشجاقتى ءسامميتتى وتكىزۋگە ءالى ناقتى رەسمي كەلىسىمىن بەرمەگەنىن اتاپ ءوتتى. دەگەنمەن، ول قىتاي توراعاسى سي تسزينپين مەن رەسەي پرەزيدەنتى ۆلاديمير پۋتين مۇنداي كەلىسسوزدەر وتكىزۋگە ىقىلاس بىلدىرسە، «سولاي ىستەيتىنىن» جەتكىزدى.

ترامپتىڭ ايتۋىنشا، بۇل كەزدەسۋدىڭ نەگىزگى تاقىرىبى ءۇش مەملەكەتتىڭ يادرولىق قارۋ-جاراقتى شەكتەۋ نەمەسە ودان باس تارتۋ ماسەلەسى بولۋى مۇمكىن. سونىمەن قاتار ول كەزدەسۋ بارىسىندا ۋكرايناداعى سوعىستى رەتتەۋ دە ءسوز بولاتىنىن تىلگە تيەك ەتتى. اقش پرەزيدەنتى مۇنداي تالقىلاۋلاردىڭ ۋكراينا پرەزيدەنتى ۆلاديمير زەلەنسكيدىڭ قاتىسۋىنسىز دا ءوتۋى ىقتيمال ەكەنىن دە اشىق ايتتى.

ۇسىنىس قايدان شىقتى؟

ترامپ، سي تسزينپين جانە ءپۋتيننىڭ ۇشجاقتى كەزدەسۋ وتكىزۋ مۇمكىندىگى تۋرالى العاش بولىپ The Wall Street Journal (WSJ) باسىلىمى جازعان بولاتىن. باسىلىمنىڭ ءوز دەرەككوزدەرىنە سۇيەنىپ حابارلاۋىنشا، مۇنداي باستاما كوتەرگەن — ۆلاديمير پۋتين. رەسەي تاراپى وسى كەزدەسۋ ارقىلى ۋكرايناداعى سوعىستى تالقىلاپ، ماسكەۋ ۇسىنىپ وتىرعان بەيبىتشىلىك شارتتارىنا حالىقارالىق قولداۋ تاپقىسى كەلەدى.

WSJ مالىمەتىنە سايكەس، پۋتين بۇل ۇسىنىستى ترامپپەن 9 قازاندا وتكەن تەلەفون ارقىلى سويلەسۋ كەزىندە ايتقان. كەيىنىرەك كرەملدىڭ رەسمي وكىلى دميتري پەسكوۆ مۇنداي جوعارى دەڭگەيدەگى كەزدەسۋدى ۇيىمداستىرۋ مۇمكىندىگى شىنىمەن دە تالقىلانىپ جاتقانىن راستادى.

Abai.kz