سارسەنبى, 21 اقپان 2024
اقمىلتىق 3436 127 پىكىر 30 ماۋسىم, 2023 ساعات 13:04

ادال ازاماتتار پرەزيدەنتتىڭ قورعاۋىنا مۇقتاج!

قازاقتا «جاقسى ءسوز – جارىم ىرىس!» دەگەن وتە كيەلى ءسوز بار. تۇركىستان تورىندە وتكەن ۇلتتىق قۇرىلتايدىڭ ەكىنشى وتىرىسىنا مەن قاتىسقان ەمەسپىن. بىراق، پرەزيدەنتىمىز قاسىم-جومارت توقاەۆتىڭ سول قۇرىلتايدا ايتقان ءبىر جاقسى ءسوزى مەنىڭ ويىمنان شىعار ەمەس. ول ءسوزدى بۇكىل دۇنيەنى ءدۇر سىلگىندىرگەن «پريگوجيننىڭ بۇلىگى» دە سانامنان وشىرە المادى.

مىنە، قۇرىلتاي وتكەلى ءبىراز كۇننىڭ ءجۇزى بولدى، سەنسەڭىز سول ءسوز قۇلاق تۇبىمدە ءالى جاڭعىرىپ تۇر.

جۇرت قاسىم-جومارت كەمەلۇلىنىڭ وسى جولعى: «سونداي-اق شەتەلدەگى قانداستارىمىزبەن تىعىز قارىم-قاتىناس ورناتىپ، رۋحاني بايلانىستى نىعايتا بەرەمىز. بۇل ماسەلە – مەنىڭ جەكە نازارىمدا...»، - دەگەن ءسوزى شىعار دەپ، ارى قاراي وقىماي، قويا سالۋى مۇمكىن.

جوق، ول ءسوزى ەمەس، «شىن مانىندە، ءبىز ايتىپ جۇرگەن ادىلەتتى قازاقستاندى ادال ازاماتتار قۇرادى!» دەگەن ءسوزى.

ءسويتىپ، مىنە، ۇلتتىق قۇرىلتايدىڭ ەكىنشى وتىرىسى جاڭا قازاقستانعا  «ادال ازامات» دەگەن تاماشا ۇعىمدى الىپ كەلدى.

مەن بۇل ءسوزدى ۇلتتىق قۇرىلتايدىڭ ەكىنشى وتىرىسىنىڭ تاريحي تابىسى دەپ باعالايمىن.

ارينە، «ادال ازامات» ۇعىمىنىڭ قازاق جادىندا بۇرىننان بارى بەلگىلى عوي، بىراق بۇگىنگى تاڭدا ونىڭ بۇكىل تۇركىنىڭ كيەلى استاناسى تۇركىستان تورىندە وتكەن ۇلتتىق قۇرىلتايدا مەملەكەت باسشىسىنىڭ اۋزىنان قايتا جاڭعىرۋى، تاپتەشتەپ تۇرىپ ءتۇسىندىرىلۋى تەگىن بولماسا كەرەك!

ءبىر عاجابى، قاسىم-جومارت كەمەلۇلى: «وتانشىلدىق، ادامگەرشىلىك، بىلىمپازدىق، ناعىز مامان بولۋ، ۇنەمشىلدىك، ەڭبەكقورلىق، ەل مەن جەرگە جاناشىرلىق سياقتى اسىل قاسيەتتەر بارىنەن بيىك تۇرۋعا ءتيىس. وسىنداي ىزگى قاسيەتتىڭ ءبارىن بويىنا سىڭىرگەن جاندى ادال ازامات دەگەن ءبىر اۋىز سوزبەن سيپاتتاۋعا بولادى»، - دەپ سول «ادال ازاماتتىڭ» ولشەمىن دە ءوزى ءدوپ باسىپ سىيپاتتاپ بەرىپتى.

ارينە، قاسىم-جومارت كەمەلۇلى سيپاتتاعان قاسيەتتەردى بويىنا سىڭىرگەن قىز-جىگىتتەر بيلىك باسىندا از ەمەس كوپ.

وكىنىشكە وراي، «ەلوردانىڭ اتىن «نۇر-سۇلتان» دەپ وزگەرتۋ كەرەك!» دەسە، «بۇل دۇرىس ءارى سارالانعان شەشىم. استاناعا قانشاما كۇش-جىگەر جۇمسالعانىن بىلەمىز. مۇنىڭ ءبارى نۇرسۇلتان نازارباەۆتىڭ ساياسي ەركىنىڭ ارقاسىندا ورىن الدى، سوندىقتان قاسىم-جومارت توقاەۆتىڭ شەشىمى – وتە دۇرىس، زاڭدى، ءبىز ونى قولدايمىز...»، - دەپ بىردەن قول كوتەرەتىن; «جوق، «استانا» اتاۋىن قايتارۋ كەرەك!» دەسە، «ەڭ باستىسى، حالىقتىڭ پىكىرىن ەسكەرۋىمىز كەرەك. حالىقتىڭ، قالا تۇرعىندارىنىڭ پىكىرى – نەگىزگى فاكتور. بۇل تۇرعىدا حالىق نە ايتسا، سول بولۋى كەرەك. حالىق قولداسا، وسىنداي شەشىمدەرگە بارۋىمىز ءتيىس...», -دەپ ونى دا قوستاي جونەلەتىن، ءوز جانىنان الىپ-قوسارى جوق، تەك پرەزيدەنتتىڭ ساياساتىن تاپسىرلەپ قانا وتىراتىن، بىراق پرەزيدەنت ايتقان ىزگى قاسيەتتىڭ ءبارىن بويىنا سىڭىرگەن، وزگەنىڭ الا ءجىبىن اتتامايتىن، قولى تازا، جەمقورلىقتان ادا  «ادال ازاماتتاردىڭ» كوبەيىپ بارا جاتقانى جانىمىزعا ايازداي باتادى. اشىق ايتايىن، ولاردىڭ حالىققا تيگىزەر پايداسى شامالى. كەرىسىنشە، وندايلار ءىلىنىپ-سالىنىپ ءجۇرىپ، جوعارى لاۋازىمداردى يەمدەنىپ الادى دا، ۇلت مۇددەسى سىنعا تۇسكەن تاعدىرشەشتى ماسەلەلەرگە كەلگەندە، العا ءبىر ادىم باسپاي، جۇمعان اۋزىن اشپاي، سورىڭدى قايناتادى.

بۇگىنگى كۇننىڭ تالابى بيىگىنەن قاراساق، ءبىزدىڭ مەملەكەتتىك قىزمەتكە ونداي جالپىلداعان «اق قارعالار» مەن «كوك قارعالار» ەمەس، تىرناعى ىلىنگەن لاۋازىمدى جايناتىپ جىبەرەتىن; جاڭالىققا جانى قۇشتار; وزگەرىس دەسە، وزەگىن بەرەتىن ناعىز رەفورماشىلار كەرەك، ارينە!

ەندى ءبىز – جاڭعىرۋ مەن وزگەرىسكە شولدەپ الابۇرتقان سەرگەك كوڭىل قاۋىم «جاڭا قازاقستان» قۇرۋدىڭ العى شەبىندە، جەتەكشى ورىندا تىزگىن ۇستاپ جۇرگەن «پرەزيدەنت كومانداسىنا» قاسىم-جومارت كەمەلۇلى ورتاعان قويعان وسى «ادال ازامات» ولشەمىمەن كوز سالا باستادىق.

قۇدايعا شۇكىر، ونداي ادال ازاماتتار جوق ەمەس، بار.

سونىڭ ءبىرى – جاركەشوۆ سانجار سەرىكبايۇلى دەپ بىلەمىن.

ءومىربايانىنا كوز جۇگىرتسەك، سانجار سەرىكبايۇلى 1986 جىلدىڭ ءتولى ەكەن. قىرىققا ءالى تولماعان جىگىت ءبىراز قامالدى بۇزىپ ۇلگىرىپتى. ەڭبەك جولىن 2008 جىلى وستين قالاسىنداعى (تەحاس، اقش) «مۇناي جانە گەوسيستەمالىق ينجينيرينگ ورتالىعىندا» ينجەنەر-زەرتتەۋشى بولىپ باستاپ، اينالاسى ون بەس جىلدىڭ ىشىندە الەمنىڭ 17 مەملەكەتىندە جۇمىس ىستەپ، ون ءبىر جىلدىق حالىقارالىق، وندىرىستىك جانە باسقارۋشىلىق تاجىريبەگە قول جەتكىزىپتى. كوپ ءومىرى اقش، رەسەي، شوتلانديا، ۇلىبريتانيا، يراك كومپانيالارىندا ءوتىپتى. 2014 جىلى مۇناي ۇڭعىسىن بۇرعىلاۋدان الەمدىك رەكورد جاساپتى (Z-40 ۇڭعىسى، 13000 مەتر، ساحالين ارالى، رەسەي فەدەراتسياسى).

سانجار سەرىكبايۇلى 2016 جىلى دۇنيەجۇزىلىك مۇنايشى-ينجەنەرلەر قوعامىنىڭ «بۇرعىلاۋ سالاسىنداعى كورنەكتى جەتىستىكتەرى ءۇشىن» اتتى حالىقارالىق سىيلىعىن جانە بريتاندىق ارناۋلى «كاسىبي مامان-ينجەنەر» اتاعىن الدى (Chartered Engineer»), 2017 جىلى ۇلىبريتانيانىڭ مۇناي ءوندىرىسىن دامىتۋعا قوسقان ۇلەسى ءۇشىن پاتشايىم ەليزاۆەتا ءىى اتىنداعى سىيلىعىن (Merlin ERD كومپانياسىنىڭ قۇرامىندا) الىپتى. سونداي-اق، بريتاندىق «ينجەنەر-مەحانيكتەر ينستيتۋتى كەڭەسىنىڭ» مۇشەسى بولىپ سايلانىپتى.

سول سانجار سەرىكبايۇلى قازىر «QazaqGaz» ۇلتتىق كومپانياسى» اق-نىڭ باسقارما توراعاسى بولىپ قىزمەت اتقارۋدا.

بۇل – سانجار جاركەشوۆ تۋرالى مەنىڭ اشىق اقپارات كوزدەرىنەن العان مالىمەتتەرىم. ال، ونىڭ قازىرگى تاڭدا قانداي اۋقىمدى شارۋالار اتقارىپ جاتقانىن بىلگىڭىز كەلسە، ينتەرنەتتەن «ULYSMEDIA» كانالىنا بەرگەن سۇحباتىن ءوز اۋزىنان تىڭداپ شىعىڭىز.

ءدال وسىنداي جانە ءبىر جانىپ تۇرعان جاس شەنەۋنىكتى مەن تاعى دا سول «ULYSMEDIA» كانالىنا بەرگەن سۇحباتى ارقىلى تانىپ، قاتتى قۋاندىم.

ول جىگىتتىڭ اتى-ءجونى – تامابەك ءابىلحايىر عالىمۇلى.

ءابىلحايىر عالىمۇلى 1994 جىلى تۋىپتى.

ءومىربايانىندا حالىقارالىق بيزنەس ۋنيۆەرسيتەتىن، لۋيس ۇلتتىق ۋنيۆەرسيتەتىن جانە قر پرەزيدەنتى جانىنداعى مەملەكەتتىك باسقارۋ اكادەمياسىن بىتىرگەن. پرەزيدەنتتىك جاستار كادرلىق رەزەرۆىنىڭ مۇشەسى دەپ جازىلىپتى. ءوزى قازىر قازاقستان رەسپۋبليكاسى اۋىل شارۋاشىلىعى ۆيتسە-ءمينيسترى بولىپ قىزمەت اتقارادى ەكەن. ەلىمىزدەگى ەڭ جاس مينيستر بولىپ سانالادى.

قىسقاسى، مەن بۇل ەكى جىگىتتى «ULYSMEDIA» كانالىنا بەرگەن سۇحباتتارى ارقىلى تانىپ ءبىلدىم.

بىلەسىزدەر، ءبىزدىڭ قوعامدا شەنۋنىكتەر تاۋەلسىز مەديالارعا اشىلىپ سۇحبات بەرە بەرمەيدى. تەك، مەملەكەتتىك ارنالاردىڭ الدىن-الا دايىندالىپ، كەلىسىلگەن سۇراقتارىنا عانا ءوز قۇزىرەتى شەگىندە جاۋاپ بەرىپ ۇيرەنگەن. ودان ارى كوسىلىپ سويلەۋگە تارتىنىپ تۇرادى، سىزىپ بەرگەن شەڭبەردەن شىقپايدى.

ال، سانجار جاركەشوۆ پەن ءابىلحايىر تامابەك «ULYSMEDIA» كانالىندا كوسىلە سويلەپ، جۋرناليستپەن بۇكپەسىز سۇحبات قۇردى. اعىن دا، قاراسىن دا جاسىرعان جوق، وزدەرى باسشىلىق ەتىپ وتىرعان سالانىڭ بۇگە-شىگەسىنە دەيىن اقتارىپ تۇرىپ ايتتى. قانداي كەمشىلىكتەر كەتكەنىن دە، ەندى ونى قالاي تۇزەتۋ كەرەك ەكەنىن دە قالدىرماي بايانداپ بەردى.

ەكەۋىنىڭ دە ءار ءسوزىن اتىنعا بالاپ، سۇيسىنە وتىرىپ تىڭدادىق. اسىرەسە، سانجار جاركەشوۆتىڭ: «مەن ءوز باسىم اقشاعا قۇنىققان ادام ەمەسپىن! شەتەلدە جۇمىس ىستەگەندە، قازىرگى تاباسىمنان قاراعاندا، بىرنەشە ەسە ۇلكەن تابىس كوردىم. شەتەلدە، ءوزىڭىز بىلەسىز، جالاقىلار بولەك. ونى تاپتىق. جيعان -تەرگەنىمىز بار. جەتەدى! تەك قانا قاناعات!! سوندىقتان، وسى جاقتا ۇلكەن وزگەرىستەر بولىپ جاتىر، سونداي تازا جىگىتتەردى، ادال جىگىتتەردى جيناپ جاتىرمىن...»، - دەگەن ءسوزى جۇرەگىمىزگە مايداي جاقتى، كوزىمىزگە جاس ىركىلتتى... سۇحبات بىتكەندە، «وركەنىڭ ءوسسىن، سانجار!» دەپ، بەتىمىزدى سىيپادىق!

داۋ جوق، قاسىم-جومارت كەمەلۇلى ايتقان «ادال ازامات» ولشەمىنە ساي كەلەتىن شەنەۋنىك دەپ، وسى ەكى التىن جىگىتتى ايتۋعا بولادى.

ەكى ءىنىمىزدىڭ ەركىن اقپارات قۇرالىنا قاسقايىپ كەلىپ، اعىنان جارىلىپ سۇحبات بەرگەنىن – سول ادالدىقتارىنىڭ بەلگىسى دەپ باعالادىق.

سانجار جاركەشوۆ پەن ءابىلحايىر تامابەكتىڭ انەۋ ءبىز كورىپ جۇرگەن ىڭىرانعان «سۇرعىلت شەنەۋنىكتەردەن» ءبىر ايىرماسى، وزدەرى باسقارىپ وتىرعان سالانىڭ بىلىكتى مامانى بولۋى ءوز الدىنا، ولاردىڭ تىڭ باستامالاردى ورتاعا قويىپ، مەملەكەتتى العا جىلجىتقىسى كەلەتىن رەفوماشىلار ەكەندىگى بولدى. ءبىزدى قاتتى قۋانتىپ، وسى جولداردى جازۋعا ءماجبۇر ەتكەن دە – ولاردىڭ وسى قاسيەتتەرى.

ءيا، قاراپ وتىرساق، «QazaqGaz» ۇلتتىق كومپانياسى» اق-ى دا، اۋىل شارۋاشىلىعى مينيسترلىگى دە قازاقستانداعى «جىلىكتىڭ مايلى باسى» ەسەبىندەگى سالالار. ول سالالاردان تۇسەتىن جانە وعان مەملەكەتتەن بولىنەتىن قاراجات تا قوماقتى ەكەنى بەلگىلى.

مۇنداي ورىندارعا، ارينە، قايرات شارىپباەۆ پەن تيمۋر قۇلىباەۆ سەكىلدىلەر عانا باسشىلىق ەتىپ، سۇلىكشە سورىپ كەلگەنىن بۇكىل دۇنيەجۇزى بىلەدى.

تەك، 238 ادامنىڭ باسىن جۇتقان «قاسىرەتتى قاڭتار» كوتەرىلىسى عانا ولاردى ورىندارىنان تايدىرعانداي بولدى.

وكىنىشكە وراي، ولاردىڭ جەمتىكتەستەرى تۇبىرىمەن قوپارىلىپ بولعان جوق، پىشاقتارىن قايراپ ءالى وتىر. بىراق، ولار جاي وتىرماي، «سوڭعى جىلدارى ءبىز قازاقستاندى تۇبەگەيلى جاڭعىرتۋعا، ترانسفورماتسيالاۋعا كوشتىك. ءتۇرلى سالادا اۋقىمدى وزگەرىستەر باستالدى. بۇل كەيبىر ىقپالدى ادامدارعا ۇنامادى. ولار جىلدار بويعى زاڭسىز ارەكەتتەرىن ودان ءارى جالعاستىرا بەرۋدى كوزدەدى. نەعۇرلىم جوعارى بيلىككە يە بولۋدى كوكسەدى. سول ءۇشىن كانىگى قىلمىسكەرلەر، قارۋلى باندىلار مەن وپاسىز شەنەۋنىكتەر بىرىگىپ، استىرتىن توپ قۇردى...»، - دەپ قاسىم-جومارت كەمەلۇلى ايتقانداي، تاق پەن اقشا ءۇشىن ادال ازاماتتاردى اياقتان شالۋ، سىندىرۋ، كەرەك بولسا باسىن كەسۋ سىندى يتتىكتىڭ ءبارىن جاسايدى.

وتكەن وتىز جىلدىقتاعى ەڭ تاڭداۋلى ەكى ءمينيستردىڭ بىرەۋى جاقسىبەك كۇلەكەەۆ بولسا، ەكىنشىسى زەينوللا كاكىمجانوۆ ەكەنىن ەكىنىڭ ءبىرى بىلەدى.

ادالدىقتارى مەن ىسكەرلىكتەرىنەن بولسا كەرەك، ەكەۋىنىڭ دە قىزمەتتىك جولى تىم شىركىن-اي بولعان جوق.

جاقسىبەك ابدىراحمەتۇلىنا تاپا تال تۇستە قاستاندىق جاسالىپ، ەش كۇناسىز قاماققا الىنعانىن بىلە تۇرىپ، ءبىر پەندە ارا تۇسە العان ەمەس. تەك، تۇرمەدەن شىققاندا عانا ءبىرىنشى بولىپ، قاسىم-جومارت كەمەلۇلى ۇيىنە شاقىرىپ، شاي بەرىپتى.

زەينوللا كاكىمجانوۆ قر مكم كەدەن كوميتەتى توراعاسىنىڭ مىندەتىن اتقارۋشى بولىپ 2002 جىلى قىزمەت اتقارعان كەزدە، كەدەندىك تولەمدەردەن مەملەكەتكە وتكىزگەن نەبارى التى-اق ايدىڭ ىشىندەگى قارجىنىڭ كولەمى – «قورعاس» كەدەنىنىڭ سوڭعى ون جىلدا بەرگەنىنەن اسىپ تۇسكەنى – قازاقستاننىڭ كەدەن تاريحىنداعى وشپەس وقيعا بولىپ، تاسقا باسىلىپ قالدى. زەينوللا قاليدوللاۇلىن وسى ىسكەرلىگى مەن ادالدىعى تۇرمەگە وتىرعىزباعانىمەن، قىزمەتتەن ءبىرجولا شەتتەتىپ، ەڭبەكشىقازاق اۋدانىنىڭ ءجۇزىم باعىنان بىراق شىعاردى. ول سودان قايتىپ مەمقىزمەتكە ورالعان جوق.

ال، التىنبەك سارسەنبايۇلىن ايۋاندىقپەن ءولتىردى...

وسى جەردە، ايتپاقشى، قاسىم-جومارت توقاەۆتىڭ وتكەن جىلعى ۇلىتاۋدا وتكەن ۇلتتىق قۇرىلتايدىڭ ءبىرىنشى وتىرىسىندا ايتقان تاعى ءبىر ءسوزى ەسىمە ءتۇسىپ وتىر. ول جولى پرەزيدەنت «شەنەۋنىك» دەگەن ءسوزدىڭ جاعىمسىز ۇعىمعا اينالىپ بارا جاتقاندىعىنا قىنجىلىپ، «جالپى، مەملەكەتتىك قىزمەتشىلەردى قولىنان تۇك كەلمەيدى دەپ كەمسىتۋدى دوعارۋ كەرەك!» دەگەن بولاتىن.

بىراق، شەشەۋنىكتەرگە قانشا شۇيلىككەنىمەن، ءبىزدىڭ قارا حالىقتىڭ ولاردى توڭكەرىپ تاستايتىنداي قۇدىرەتى شامالى. اسا ءبىر اشىنىپ كەتپەسە، ارى كەتكەندە، قارعاپ-سىلەۋمەن تىنادى.

مەن مەملەكەت باسشىسىنىڭ ءسوزىن تەرىستەۋدەن مۇلدە اۋلاقپىن، بىراق وزدەرىڭىز كورىپ وتىرسىزدار، مەملەكەتتىك باسشىلىق قىزمەتتەگى ادال ازاماتتاردىڭ جولىن كەسەتىن، ءومىرىن قور قىلاتىن قاراپايىم حالىق ەمەس، ءوزىنىڭ اينالاسىنداعى قازاقستاندى تۇبەگەيلى جاڭعىرتۋعا، ترانسفورماتسيالاۋعا قارسى «ورتاشەلەك» پىسىقايلار مەن اقشاعا قۇنىققان تويىمسىزدار ەكەن.

ونىڭ ۇستىنە، ونداعان جىلدار بويى زاڭدار مەن نورماتيۆتىك قۇجاتتاردىڭ ءبارى ات توبەلىندەي ىقپالدى ادامداردىڭ مۇددەسىنە باعىتتالىپ جاسالعان، قانشا ساياسي رەفورما جاسالعانىمەن ونىڭ مۇرتى بۇزىلماي وتىرعان وتە كۇردەلى جۇيەدە باسشىلىق لاۋازىمدا وتىرىپ قىزمەت ەتۋ – ءوزىنىڭ قاراقان باسىن كۇتتەگەن ىنجىقتار مەن ءيىسالماستار ءۇشىن وڭاي بولعانىمەن، تۋعان حالقى مەن مەملەكەتىنە ادال قىزمەت ەتۋدى وزدەرىنە ۇلكەن ماقسات ەتىپ العان  سانجار مەن ابىلقايىر سەكىلدى تۇلعالار ءۇشىن وتە قيىن جانە اۋىر!

مىنە، وسى جانە وتكەن وتىز جىلدىقتاعى جاقسىبەك كۇلەكەەۆ پەن زەينوللا كاكىمجانوۆ سەكىلدى ءبىراز ادال ازاماتتاردىڭ تاعدىرىن ەسكە الساق، ءبىز اتى-ءجونىن اتاپ وتىرعان ازاماتتاردىڭ الداعى باسار جولىن ويلاپ، ىشتەي كۇرسىنىپ تە قالعان جايىمىز بار. قۇداي ونىڭ بەتىن ارى قىلسىن، ولاردىڭ باسىنا بالەندەي ءبىر قاۋىپ پەن قاتەر ءتونىپ تۇرماعان بولار. دەگەنمەن، سەركەلەرىنەن قاپيادا كوپ ايىرىلىپ قالۋدان ابدەن شايىلىپ قالعان ءبىزدىڭ  قۇرعىر جۇرەكتىڭ اتقالاقتاي جونەلگەنىن قالاي جاسىرايىق.

قازاق قوعامى بۇگىندە سانجار جاركەشوۆ پەن ءابىلحايىر تامابەك سەكىلدى بۇنداي التىن ازاماتتارعا وتە ءزارۋ. ارينە، قاسىم-جومارت كەمەلۇلى تانىپ-بىلمەسە، مۇنداي جىگىتتەردى وتە ماڭىزدى ءارى جاۋاپتى قىزمەتكە تاعايىندامايدى عوي. مەملەكەت ەندىگى جەردە مۇنداي تۇلعالاردى ۇلتتىق برەنت رەتىندە باعالاپ، كوسىلىپ قىزمەت ەتۋىنە كەڭ جول اشىپ بەرۋى ءتيىس. بىراق، بۇل – از. جەتكىلىكسىز!

«بايگى بەرەم جىعىلعان پالۋانعا دا، ادالدىعى سەزىلىپ تۇرار بولسا!» دەپتى عوي، تولەگەن ايبەرگەنوۆ.

سول اقىن ايتقانداي، ادالدىعى سەزىلىپ تۇرعان وسىنداي جاس شەنەۋنىكتەر پرەزيدەنتتىڭ قاماقورلىعىمەن بىرگە، قورعاۋىنا دا مۇقتاج. وتە مۇقتاج!

ايتپەسە، ادال ازاماتتاردى اقشا مەن تاق ءۇشىن انتالاعان جالماۋىزدار سىندىرىپ جىبەرۋى مۇمكىن. ولار ءۇشىن، جەمە-جەمگە كەلگەندە، «ۇلت»، «مەملەكەت» دەگەن قاسيەتتى ۇعىمداردىڭ كوك تيىنعا تاتىمايتىنىن كەشەگى قاڭتاردا كوردىك قوي...

مەن ەكى التىن باۋىرىما تەك قانا اماندىق پەن جەڭىس تىلەيمىن!

اۋىت مۇقيبەك،

«قۇرمەت» وردەنىنىڭ يەگەرى

Abai.kz

127 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1525
ءالىپبي

لاتىن جايى

بيجومارت قاپالبەك 1575