مۋزەي كەشە مەن بۇگىنگىنىڭ ايشىقتى تۇستارىن جاڭعىرتىپ، ولاردان بەلگىلى بولىپ قالعىن جادىگەرلەردىڭ يەسى ىسپەتتەس وزىندىك تاريحى بار. سەبەبى، ول – ءار داۋىردەگى مادەنيەتتى ساقتاۋشى، ناسيحاتتاۋشى بىردەن-ءبىر رۋحاني وردا.

ءنازىر تورەقۇلوۆ مۋزەيىندە قازاقتان شىققان تۇڭعىش ديپلوماتتىڭ ارتىندا قالعان سىرعا تولى قۇندى جادىگەرلەرى بار. بۇل جادىگەرلەر  مۋزەيگە كەلەتىن قوناقتاردىڭ كوزايىمىنا جانە يگىلىگىنە اينالعان. ءنازىر تورەقۇلوۆ حح عاسىردىڭ 20-جىلدارىنان باستاپ ماسكەۋدە ءار ءتۇرلى لاۋازىمدى قىزمەتتەر اتقاردى. ءنازىردىڭ ماسكەۋدە جۇرگەندە قىزمەت بابىندا پايدالانعان زاتتارى بۇگىندە مۋزەي تورىنەن ورىن العان. 2003 جىلى ن.تورەقۇلوۆتىڭ قىزى انەل نازىرقىزى اكەسىنىڭ بىرقاتار جەكە زاتتارىن تۇركىستاننان شىققان ءبىلىمدى ازامات ىبىراي قاجى ىسمايىلوۆقا امانات ەتىپ تاپسىرىپ كەتكەن بولاتىن-دى. سول ماسكەۋدەن كەلگەن ەكسپوناتتاردى تۇركىستاندا 2006 جىلى اشىلعان ءنازىر مۋزەيى قۇندى ەكسپونات رەتىندە تىركەۋگە العان-دى.

نازىرقىزى انەلدىڭ كوزىنىڭ قاراشىعىنداي ساقتاعان جادىگەرلەرىنىڭ ءبىرى – اكەسىنىڭ جۇمىس ۇستەلى مەن ورىندىعى. جۇمىس ۇستەلى ارنايى قولدان قىزىل اعاشتان ويىلىپ، ورنەكتەلىپ جاسالعان. ۇستەلدىڭ جەتى سۋىرماسى بار. ءار تارتپاسى تەمىرمەن بەدەرلەنىپ جاسالعان. ورىندىقتىڭ وتىراتىن بولىگى بىلعارىدان جاسالىپ، ورىندىق تا، ۇستەل دە قويۋ قىزىل-قوڭىر تۇسپەن سىرلانعان. جۇمىس ۇستەلىنىڭ اياقتارى مەن ورىندىقتىڭ وزىنە ءتان وتە ءساندى بەينەلەنگەن ورنەكتەرى ونى ەرەكشە ەتىپ كورسەتەدى.

ءنازىر تورەقۇلوۆتىڭ جۇمىس ۇستەلى مەن ورىندىعى وتكەن عاسىردىڭ ەسكەرتكىشى بولعاندىقتان، بىرنەشە رەت قايتا جوندەۋدەن وتكەن.

جۇمىس ۇستەلىنىڭ بويى – 100, ۇزىندىعى – 55, ەنى – 60 سم. ورىندىقتىڭ بيىكتىگى – 105, ەنى – 50 سم قۇرايدى.

جالپى، بۇل كۇندەرى سول نازىردەن قالعان جادىگەر – ۇستەل مەن ورىندىققا مۋزەيگە كەلۋشى ءاربىر كورەرمەن تامسانا، قىزىعا قارايدى. ويتكەنى، بۇل جادىگەر ءنازىردىڭ قيلى – قيلى ءومىر تاعدىرىنان سىر شەرتىپ تۇرعانداي.

باعلان تاشيموۆ،

مۋزەي قىزمەتكەرى

Abai.kz