“وسى جاڭا بەلگىلى بولعان اقپارات بويىنشا، الماتى پوليتسيا دەپارتامەنتىنىڭ ءبىر توپ پوليتسەيى بەلسەندى بەسجان تولەۋبەكۇلىن (تارازداعى سوتتان كەلگەن بويدا) ۇيىنە كىرەبەرىستە ۇستاپ اكەتكەن. بەلسەندى تەلەفوندا ايتىپ ۇلگەرگەن سوزىنە قاراعاندا، اكىمشىلىك جازاعا تارتىپ، 20 تاۋلىككە دەيىن قاماۋى ىقتيمال”، – دەلىنگەن جازبادا.

بولجام بويىنشا، بەلسەندىنىڭ ۇستالۋىنا 11 شىلدەدە قاڭتار وقيعاسى كەزىندە الماتى اۋەجايىن باسىپ الۋ ءىسى بويىنشا سوتتالعانداردى قولداپ، ەل قاتارلى سىرتتا (سوت زالىندا ەمەس) سويلەگەنى سىلتاۋ بولۋى مۇمكىن. ۇكىم وقىلعان وتىرىسقا بەسجان تولەۋبەكۇلى عانا ەمەس، كەمى 160 ازامات قولداۋعا بارعان.

“قر ىشكى ىستەر مينيسترلىگى مۇنى «سانكتسيالانباعان ميتينگ» دەپ ەسەپتەي مە؟” دەپ نارازىلىق بىلدىرۋدە جەلىدەگى جۇرت.

ەسكە سالايىق، 11 شىلدەدە الماتىنىڭ ناۋرىزباي اۋداندىق سوتىندا قاڭتار وقيعاسى كەزىندە الماتى اۋەجايىن باسىپ الۋ ءىسى بويىنشا ايىپتالۋشىلارعا ۇكىم وقىلدى.

سوت ايىپتالۋشىلاردى كىنالى دەپ تانىپ، ايگەرىم تىلەۋجاندى 4 جىلعا باس بوستاندىعىنان ايىردى. قالاس نۇرپەيىسوۆ پەن نۇرلان دالىباەۆ 8 جىلعا سوتتالدى.

سوت ۇكىمىمەن ەرمۇحامەت شىلىباەۆقا پەن جانايدار كارمەنوۆ تە 8 جىلعا باس بوستاندىعىنان ايىرىلدى.

ءىس ماتەريالدارى بويىنشا، تىلەۋجان مەن نۇرپەيىسوۆ جاپپاي تارتىپسىزدىكتەردى ۇيىمداستىردى (قر قك 272 - بابىنىڭ 1-بولىگى) دەپ ايىپتالسا، دالىباەۆ، شىلىباەۆ جانە كارمەنوۆكە اۋەجايدىڭ ستراتەگيالىق وبەكتىلەرى مەن "كازاەروناۆيگاتسيا" رمك شابۋىل جاساۋ جانە باسىپ الۋ كەزىندە زورلىق-زومبىلىقپەن، ورتەۋمەن، مۇلىكتى قيراتۋمەن جانە جويۋمەن قاتار جۇرگەن جاپپاي تارتىپسىزدىكتەرگە (قر قك 272-بابىنىڭ 2-بولىگى) قاتىستى دەگەن ايىپ تاعىلدى.

بۇدان بۇرىن حابارلاعانىمىزداي، سوتتالۋشىلاردى قولداۋعا جينالعانداردىڭ قاراسى قالىڭ بولدى. ولاردىڭ كوپشىلىگى بەلسەندىلەردى بوساتۋدى تالاپ ەتكەن پلاكاتتار كوتەرىپ كەلدى. سوت زالىنا جينالعاندار ۇكىمگە نارازىلىقتارىن ءبىلدىرىپ، پوليتسيامەن توبەلەسۋگە دەيىن بارا جازدادى.

سوتتالۋشىلاردى قولداۋعا بارعانداردىڭ ءبىرى بەلسەندى بەسجان تولەۋبەكۇلى قاڭتارشىلاردى كولىكتەرگە تيەپ الىپ كەتەتىن ساتتە جينالعان ادامداردى كۇشپەن يتەرمەلەپ، جولدى بوساتۋدى تالاپ ەتكەن پوليتسيا قىزمەتكەرلەرىنە:

“ەلىمىزدە 170 مىڭ پوليتسيا قىزمەتكەرى بار، قاڭتار وقيعاسى كەزىندە نەگە ودكب اسكەرىنە قاراپ قالدىڭدار؟ نەگە ءبىزدى تاعى دا ورىسقا قاراتىپ قويدىڭدار؟ كومەكتەرىڭ كەرەك كەزدە نەگە جۇمىستا بولمادىڭدار؟ قازىر قوعامدىق ءتارتىپ تۋرالى ايتىپ تۇرسىڭدار”، – دەگەن بولاتىن.