ءۇندىستان ايدىڭ وڭتۇستىك پوليۋسىنە زەرتتەۋشى روبوتتى جەتكىزۋگە ارنالعان «چاندرايان-3» زىمىرانىن ءساتتى ۇشىردى، دەپ حابارلايدى  Euronews اگەنتتىگى. 

ساتيش دحاۆان اتىنداعى عارىش ورتالىعى باقىلاپ وتىرعان ميسسيا 14 تاۋلىككە سوزىلادى جانە وعان 75 ملن دوللار جۇمسالماق.

اپپارات اي ماڭىنداعى وربيتاعا شىعۋى ءتيىس. 23-24 تامىزعا قاراي ايعا قونۋى كەرەك.

ءارى قاراي زەرتتەۋ جابدىقتارىمەن جابدىقتالعان اي بەتىندە جۇرەتىن روبوت جەردىڭ تابيعي سەرىگىنىڭ بەتىنە حيميالىق تالداۋ جۇرگىزەدى.

ەگەر ءبارى ويداعىداي وتسە، ءۇندىستان ايعا بارعان ءتورت ەلدىڭ ءبىرى بولادى (رەسەي، اقش جانە قىتايدان كەيىن).

بۇل - ءۇندى عارىشكەرلەرىنىڭ وسىنداي ءۇشىنشى ميسسياسى.

2019 جىلعى تالپىنىس ءساتتى بولمادى. ايدىڭ بەتىنە قونايىن دەپ جاتقاندا زىمىراننىڭ جەرمەن بايلانىسى ءۇزىلىپ كەتكەن.

فوتو: عالامتوردان

Abai.kz