باياعىدا ۋنيۆەرسيتەتتەگى ءبىر ۇستازىمىز "ومىردە نە بولمايدى؟" دەگەن كىتاپ جازعان ەدى. ول كەيىن قاناتتى سوزگە اينالىپ كەتتى. مىنە، ەندى جاقىندا الەۋمەتتىك جەلىدەگى جاڭالىقتاردى قاراپ وتىرعاندا وسى ماتەل ويعا ورالا كەتتى. بۇدان ەلىمىزدى جەمقورلىق دەگەن جەگى قۇرت ابدەن جايلاپ الىپ، ونىڭ اعزاسىن جازىلماس دەرتكە اينالدىرعان با دەگەن ۇيعارىمعا كەلدىم.

ەندى ول وزگەسىن جيناپ قويىپ، ەلىمىزدەگى جوعارى ءبىلىم بەرۋ سالاسىن دا مىقتاپ قامتىپتى. قازتاگ اگەنتتىگىنىڭ جازۋىنا قاراعاندا، ەلىمىزدەگى عىلىم جانە جوعارى ءبىلىم مينيسترلىگى ءوز سالاسىنا باقىلاۋدى ءبىرجولاتا جيناپ قويىپ، فيلوسوفيا عىلىمىنىڭ دوكتورى دەگەن جالعان ديپلوم جاساپ، ولاردى جان-جاققا تاراتۋدى جاقسى جولعا قويىپتى. بۇل بىلتىرعى جىلدىڭ قىركۇيەك ايىندا-اق ءمالىم بولعان. كوزاچكوۆ دەگەن ءجۋرناليستىڭ جازۋىنا قاراعاندا، بىلتىردىڭ وزىندە اناۋ-مىناۋ ەمەس، تۇپ-تۋرا 58 ادامنىڭ ماڭدايى جارقىراپ، اياق استىنان عىلىم دوكتورى بولىپ شىعا كەلدى.

تاڭعالارلىعى، ءتىپتى، بۇل دا ەمەس. ءبىر عاجابى، وسى جالعان دوكتورلاردىڭ اتى-جوندەرى الەمجەلىدە تايعا تاڭبا باسقانداي ەتىپ جازىلسا دا، مىنە، استاناداعى ەسىل اۋداندىق پوليتسيا دەپارتامەنتى مۇنى تەكسەرىپ، كىنالىلەردى انىقتاۋعا مۇلدەم دارمەنسىز بولىپ وتىر. بىزدىڭشە، مۇنىڭ ەكى سەبەبى بار. ءبىرىنشىسى، وسى پوليتسيا قىزمەتكەرلەرىنىڭ ىشىندە دە دوكتور اتاعىن يەلەنىپ، جولى بولعاندار بار. ەكىنشىسى، جوعارى جاقتا كوكەسى مىقتى بۇل مينيسترلىككە اۋداندىق پوليتسيانىڭ ءتىسى باتپاي، دارمەنسىزدىك تانىتىپ وتىر. قايسىسىن تاڭدايسىز، ونى پاتشا كوڭىلدەرىڭىز ءبىلسىن.

ايتپاقشى، وسى تەك قازاقتاردان عانا تۇراتىن ۇزاق-سونار، سالا قۇلاش تىزىمنەن وزىمە تانىس بىرەر ادامنىڭ اتى-جوندەرىن دە كوزىم شالىپ قالدى. ماسەلەن، مەن كوپتەن بىلەتىن، وسى قوستانايداعى جەكە مەنشىك جوعارى وقۋ ورىندارىنىڭ ءبىرىنىڭ رەكتورىنىڭ بالاسىنىڭ ەسىم-سويى كوزىمە قاتتى جىلى ۇشىراپ كەتتى.
مۇمكىن، بۇل ماعان دا وسى ۇلكەن ءبىر عىلىم دوكتورى دەگەن جالعان بولسا دا بەدەلدى اتاق بۇيىرماعاندىقتان تۋعان كورەالماستىق پا ەكەن؟ كىم ءبىلىپتى، پەندەمىز عوي.

جايبەرگەن بولاتوۆ

Abai.kz