قۇرمەتتى دوستار!

الدىن-الا وتىنەمىن سىزدەردەن، وسى جازبانى تىنباي بولىسىڭىزدەر، پىكىر جازىىزدار. ناعىز دوس دەگەن وسىنداي ماڭىزدى ماسەلەدە، قۋانىشتى ساتتە قاسىڭنان تابىلۋى كەرەك قوي...

قۇدايعا مىڭ مارتە تاۋبە، ەكى ايدان بەرى تىنباي كوتەرىپ كەلە جاتقان اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتۋ تۋرالى 17 شىلدە كۇنى جازعان كەزەكتى ءوتىنىش-حاتىم تاعى ءبىر مارتە پرەزيدەنت اكىمشىلىگىنىڭ ءۇش بىردەي باسشىسى – توراعاسى ولجاس بەكتەنوۆ، ونىڭ ءبىرىنشى ورىنباسارى تيمۋر سۇلەيمەنوۆ جانە ورىنباسارى ەرنار باسپاەۆ مىرزالارعا جەتتى.

وزدەرىڭىز جاقسى بىلەسىزدەر، بۇل ءۇش جىگىتتىڭ ۇشەۋى دە مەملەكەتتىك قىزمەتتىڭ ەڭ ءبىر جاۋاپتى باسپالداقتارىنان وتكەن، مول تاجىريبە جيناعان، قىلشىلدانعان قىرىقتىڭ ىشىندەگى قىرى سىنباعان بورىلەر.

ەستەرىڭىزدە بولسا، پرەزيدەنتىمىز قاسىم-جومارت توقاەۆ تۇركىستاندا وتكەن ۇلتتىق قۇرىلتايدىڭ ەكىنشى جينالىسىندا: «شىن مانىندە، ءبىز ايتىپ جۇرگەن ادىلەتتى قازاقستاندى ادال ازاماتتار قۇرادى»، - دەگەن ەدى عوي.

انە، سول «ادال ازاماتتاردىڭ» الدىڭعى ساپىندا، تاريحي شەشىمدەر قابىلدايتىن جەرىندە وسى ءۇش ءىنىم وتىر.

مەن ۇسىنىپ وتىرعان اۋىلدىق وكرۋگ اكىمىنە بەرىلسىن دەگەن ءۇش قۇزىرەت مىناۋ:

ءبىرىنشى، ءوزى جەتەكشىلىك ەتەتىن اۋىلدىڭ جەرىن ءوزى باسقارۋ;

ەكىنشى، اۋداندىق، وبلىسىق جانە رەسپۋبليكالىق بيۋدجەتتەن بولىنەتىن قاراجاتتى ءوزى باسقارۋ جانە اۋىلدىق كەڭەستىڭ كەلىسىمىن الا وتىرىپ يگەرۋ;

ءۇشىنشى، اۋىل تۇرعىندارىنا بەرىلەتىن سۋبسيديالاردىڭ، گرانتتاردىڭ جانە قايتارىمسىز نەسيەلەر مەن تومەن ءوسىمدى نەسيەلەردىڭ كىمدەرگە بەرىلەتىنىن الدىن-الا بەلگىلەپ، جوعارىعا ۇسىنۋ. ءسويتىپ، مەملەكەتتەن بولىنگەن كومەك قاراجاتتاردىڭ يەسىنە بىردەن جەتۋىن قاماتاماسىز ەتۋ.

سونداي-اق، اۋدان مەن وبلىستى رەسپۋبليكالىق بيۋدجەتتەن ايىرىپ، تەك جەرگىلىكتى بيۋدجەتپەن قالدىرۋ، اۋىلدى تىكەلەي رەسپۋبليكالىق بيۋدجەتپەن قامتاماسىز ەتۋ ماسەلەسىن دە وسى جولى قاراستىرعان ارتىق بولماس ەدى.

ەگەر بۇل جوبا ىسكە اسىپ جاتسا، داۋ جوق، مەملەكەت قارجىسىن سۇلىكتەي سورۋعا باعىتتالىپ جاسالعان وتىز جىلعى جەمقورلىق سحەماسى جويىلىپ، بەلگىلى دارەجەدە ادىلەتتىك ورنايدى!

ءبىز «جاڭا قازاقستاندى» جاي كوپىرمە سوزبەن ەمەس، قولدانىستاعى زاڭدار مەن نورماتيۆتىك قۇجاتتارعا زارەدەي بولسا دا وسىنداي وزگەرىستەر مەن تولىقتىرۋلار ەنگىزىپ، سول ارقىلى باسشىلىق قىزمەتتەگى ادال ازاماتتارعا جەتكىلىكتى قۇزىرەت بەرۋ ارقىلى عانا قۇرا الامىز.

مۇنى ولجاس ابايۇلى دا، ونىڭ كومانداسىنداعى قىز-جىگىتتەر دە وتە جاقسى تۇسىنەدى دەپ ويلايمىن.

ال، بۇل جوباعا قارسى بولىپ وتىرعانداردىڭ ىقپالىن كەم شامالاۋعا بولمايدى. وزدەرىڭىز جاقسى بىلەسىزدەر، وسىعان دەيىن زاڭ جوبالارى قاتىستى مينيسترلىكتەردە جاسالىپ، قۇلىباەۆتاردىڭ ىقپالىمەن پرەزيدەنت اكىمشىلىگىندە كۇزەلىپ، تۇزەلىپ، سوڭىندا ونى پارلامەنتتىڭ قوس پالاتاسى نوتاريۋس رەتىندە بەكىتىپ بەرۋمەن كەلدى. بۇل جەردە قۇلىباەۆ جالعىز تۇلعا ەمەس، ول مەملەكەتتى تونۋشى ءبۇتىن ءبىر ينستيتۋت! سوندىقتان، ولار وتىز جىل بويى وزدەرىنە ءتيىمدى ەتىپ جاساپ العان جۇيەمەن ابدەن جوندانىپ العان بالەلەر. سول ءۇشىن ولارمەن بۇكىل مەملەكەتتىك ورگان، جالپى حالىق بولىپ بىرىگىپ قارسى تۇرۋىمىز، كۇرەسۋىمىز كەرەك!

ايتپاقشى، بۇل — مەنىڭ اۋىل اكىمىنىڭ قۇزىرەتىن كەڭەيتۋ تۋرالى ءبىرىنشى مامىردان باستاپ پرەزيدەنت اكىمشىلىگىنىڭ باسشىسى ولجاس بەكتەنوۆتىڭ اتىنا جازعان التىنشى حاتىم. ال جالپى پرەزيدەنت اكىمشىلىگىنە جازعان ون ءۇشىنشى حاتىم ەكەن.

اتالعان ۇسىنىس-حاتىمنىڭ مەملەكەتتىك كەڭەسشىسى ەرلان تىنىمبايۇلى مەن پرەزيدەنتى اكىمشىلىگى باسشىسىنىڭ ورىنباسارى ايدا عالىمقىزىنىڭ دا قولىنا تيگەنىن بۇدان بۇرىنعى جازبالارىمدا قۋانا-قۋانا جازعان بولاتىنمىن...

وسى ارالىقتا ۇلتتىق ەكونوميكا ۆيتسە-ءمينيسترى وماربەكوۆ باۋىرجان باقىتۇلى مەن اۋىل شارۋاشىلىعى ۆيتسە-ءمينيسترى بەكباۋوۆ باعلان ءابداشىمۇلىنىڭ جەتەكشىلىگىمەن ەكى مينيسترلىكتە تالقىلۋ ءوتتى. پرەزيدەنتىنىڭ اكىمشىلىگى ينسپەكتسيالىق-ادىستەمەلىك جۇمىس سەكتورىنىڭ مەڭگەرۋشىسى شىڭعىس اندابەكوۆ اعامىزبەن ءبىر مارتە كەزدەسۋ بولدى. قانشالاعان ماقالالار جازىلدى.

سول كەزدەسۋدە شىعىس ابدحادىرۇلى دا وسى ۇسىنىس-حاتىمنىڭ ولجاس ابايۇلىنا جانە ول كىسىنىڭ ورىنباسارىنا جەتكەنىن ايتقان بولاتىن.

مىنە، سول اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتۋ تۋرالى كوتەرگەن ماسەلەم قازىر شارىقتاۋ شەگىنە جەتتى. ەندى ءبىر اتتاسا، پرەزيدەنتىمىز قاسىم-جومارت توقاەۆتىڭ الدىنا بارادى دەگەن سەنىمدەمىن.

وسى ورايدا، وسى ۇسىنىس-حاتتارىمنىڭ دىتتەگەن جەرىنە جەتۋىنە ىقپال ەتكەن، قول ۇشىن بەرگەن قازاقستان رەسپۋبليكاسى پرەزيدەنتىنىڭ كومەكشىسى – وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى قاناتبەك جايساڭباەۆ ىنىمە العىس ايتقىم كەلەدى! سىزگە كوپ راحمەت، قۇرمەتتى قاناتبەك باحىتۇلى!

سونىمەن بىرگە، مەنىڭ وسىناۋ حاتتارىما جاۋاپ بەرە-بەرە ساۋساقتارى تەسىلگەن، كوز مايلارى سارقىلعان ۇلتتىق ەكونوميكا، اۋىل شارۋاشىلىعى، ساۋدا جانە ينتەگراتسيا، ادىلەت مينيسترلىكتەرىندەگى ءىنى-قارىنداستارىما باسىمدى يەم!

اسىرەسە، قولدانىستاعى سۋبسيديالاۋ جۇيەسىن رەفورمالاۋدىڭ بىرنەشە نۇسقالارى دايىنداپ، ونى جۇمىس توبىنىڭ وتىرىستارىندا بىرنەشە رەت تالقىلاعان، سوڭىندا مەنىڭ ۇسىنىس-حاتىما «تۇبەگەيلى رەفورمالاۋدىڭ بارلىق ۇسىنىلعان نۇسقالارىن اگروبيزنەس وكىلدەرى قولدامادى، فەرمەرلەر قاۋىمداستىعى قولدانىستاعى سۋبسيديالاۋ جۇيەسىن ساقتاۋدى تالاپ ەتتى...» دەپ، بار شىندىقتى جايىپ سالعان اۋىل شارۋاشىلىعى ۆيتسە-ءمينيسترى ەربول تاسجۇرەكوۆ مىرزاعا ايتارىم جالعىز اۋىز ءسوز – «ءجۇز جاسا، ەرەكە!»...

ءسويتىپ، ءۇش ايعا تاياۋ ۋاقىت بويى تىنباي كوتەرىپ كەلە جاتقان اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتۋ تۋرالى بەسىنشى ۇسىنىس - حاتىمنىڭ دا بەكتەنوۆ مىرزاعا جەتكەنىن ايتىپ، قۇرمەتتى الاش جۇرتى، سىزدەردەن ءسۇيىنشى سۇرادى ءجون كوردىم!

بۇل جولى وزگە مينيسترلىكتەرگە باعىتتالماي، بۇل حاتىما پرەزيدەنت اكىمشىلىگى باسشىسىنان تىكەلەي جاۋاپ بەرىلەدى دەگەن ويلايمىن.

قازاقتا «نار جولىندا جۇك قالمايدى!» دەگەن قاسيەتتى ءسوز بار. وسىنداي جاس نارلار تۇرعاندا، اۋىل اكىمىنە ءۇش قۇزىرەت بەرۋ دەگەن ءسوز بولىپ پا، ءتايىرى!

ەڭ باستىسى، ەل تىزگىنىن ۇستاعان ازاماتتار امان بولسىن!!

اۋىت مۇقيبەك

Abai.kz