قىرعىزستاندا كەدەن جانە شەكارا قىزمەتكەرلەرى جاپپاي ۇستالدى، دەپ حابارلايدى قىرعىز باق-تارى.

«كەشە شەكارا جانە كەدەن قىزمەتىنىڭ 15-كە جۋىق قىزمەتكەرى ۇستالدى. ولار كونتراباندانى وتكىزىپ، ارتىنشا اقشا جيناپ وتىرعان. مەن ۆيدەوجازبانى كورىپ شىقتىم. ۇلتتىق قاۋىپسىزدىك مەملەكەتتىك كوميتەتى (ۇقمك) جاسىرىن كامەرا ورناتقان ەكەن، ول 15 كۇن بويى جۇمىس ىستەگەن. كۇن سايىن ءبارى كونۆەيەردەگىدەي قايتالانىپ وتىرعان: جۇرگىزۋشى كىرەدى، ءبىر كەدەنشى اقشانى الىپ قالتاسىنا سالادى، سودان كەيىن شەكاراشى دا ءدال سولاي ىستەيدى»، - دەدى باتكەن وبلىسى لەيلەك اۋدانىنىڭ تۋرعىندارىمەن كەزدەسۋدە قىرعىزستان پرەزيدەنتى سادىر جاپاروۆ.

سونداي-اق ول كونترابانداعا جول بەرىلمەۋى ءتيىس دەگەن تالاپ قويعانىن جانە يمپورتقا كەدەندىك الىمدار سالىنۋى كەرەكتىگىن مالىمدەدى.

«2020 جىلى قىزمەتكە كىرىسكەن ساتتەن باستاپ مەن كەدەن جانە شەكارا قىزمەتىنىڭ قىزمەتكەرلەرىنەن ەلگە كونتراباندالىق تاۋارلاردىڭ كىرمەۋىن تالاپ ەتىپ كەلەمىن. يمپورتتالاتىن تاۋارلار ءۇشىن كەدەندىك باج سالىعى تولەنۋى ءتيىس. بيۋدجەتتىڭ ءوسۋى، سونىڭ ىشىندە، وسى تۇسىمدەر ەسەبىنەن قامتاماسىز ەتىلەدى. ەگەر ءار اۋىلدا كونتراباندامەن اينالىساتىن بولسا، مەن ەكونوميكانى قالاي دامىتامىن؟ سوندا سىزدەر سۇراپ وتىرعان قاراجاتتى قايدان بولەمىن؟» - دەدى جاپاروۆ.

Abai.kz