وبلىس ورتالىقتارىن 5G بايلانىسىمەن قامتۋ جوسپارلانعان ۋاقىتتان ءبىر جىل ەرتە ورىندالادى. بۇل تۋرالى تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين ءمالىم ەتتى.

«5G جاڭا تەحنولوگيا جانە ونى اۋىلدارعا جەتكىزۋ تۋرالى ايتۋ ازىرگە ەرتەلەۋ. 5G-مەن ازىرگە وبلىس ورتالىقتارى مەن رەسپۋبليكالىق ماڭىزى بار قالالاردى قامتۋ مىندەتى تۇر. بيىل جىل سوڭىنا دەيىن 600-700 بازالىق ستانتسيا ورناتۋ جوسپارى بار. بىراق 5G اۋكتسيونىندا جەڭىسكە جەتكەن وپەراتورلار بۇل جوسپارلاردى وزگەرتتى»، - دەدى باعدات مۋسين.

ءمينيستردىڭ مالىمدەۋىنشە، استانا، الماتى جانە شىمكەنت قالالارىندا 1 مىڭعا جۋىق بازالىق ستانتسيا ورناتىلادى.

«وڭىرلەردە جاڭا تەحنولوگيانى قولدانۋ ءۇشىن بىرنەشە بازالىق ستانتسيالار ورناتىلادى. رەسپۋبليكا بويىنشا وپەراتورلار 2027 جىلعا دەيىن بارلىق وبلىس ورتالىقتارىن قامتۋدى جوسپارلاعان. دەگەنمەن، قازىر بايلانىس وپەراتورلارى جوسپارلارىن قايتا قاراپ، جوبانى 2026 جىلدىڭ سوڭىنا دەيىن ىسكە اسىرعىسى كەلىپ وتىر»، - دەيدى ول.

Abai.kz