«ديكي ارمان» مەن قايرات قۇدايبەرگەننىڭ سوتى جابىق رەجيمدە وتەدى
![](https://abai.kz/content/uploads/2023/09/650c171121866934884006.jpeg)
21 قىركۇيەكتە ارمان جۇماگەلديەۆ پەن، قايرات قۇدايبەرگەن جانە باسقا دا تۇلعالارعا قاتىستى قىلمىستىق ءىس بويىنشا الدىن الا تىڭداۋ اياقتالدى، دەپ حابارلايدى Ulysmedia.kz.
ءىس بويىنشا سوتتالۋشىلاردىڭ جالپى سانى – 45 ادام. ولارعا «بيلىكتى نەمەسە لاۋازىمدىق وكىلەتتىكتەردى اسىرا پايدالانۋ» (قك 362-بابى), ۇيىمداسقان قىلمىستىق توپ قۇرۋ، وعان باسشىلىق ەتۋ جانە وعان قاتىسۋ (قك 262-باپ), قاراقشىلىق شابۋىل (قك 191-باپ), زاڭسىز باس بوستاندىعىنان ايىرۋ (قك-ءنىڭ 126-بابى), 2022 جىلعى قاڭتارداعى جاپپاي تارتىپسىزدىكتەردى ۇيىمداستىرۋ جانە ولارعا قاتىسۋ (قك 272-باپ), بانديتيزم (قك 268-باپ) بويىنشا ايىپتار تاعىلدى.
الماتى قالالىق سوتىنىڭ ءباسپاسوز قىزمەتىنىڭ حابارلاۋىنشا، وتىرىس بارىسىندا سوتقا پروتسەسكە قاتىسۋشىلاردان سوتتالۋشىلارعا قاتىستى بۇلتارتپاۋ شاراسىن وزگەرتۋ جانە جويۋ، قىلمىستىق ءىستى قايتارۋ جانە توقتاتۋ، جاقىن تۋىستارىن قورعاۋشى رەتىندە تانۋ تۋرالى جۇزدەن استام ءوتىنىشحات تۇسكەن.
سونداي-اق ءىس بويىنشا 10 جابىرلەنۋشى، ءبىر كۋا جانە ءبىر سوتتالۋشى تاراپ، سوت وتىرىسىن جابىق تۇردە وتكىزۋدى سۇرادى.
“ولار ءوز ومىرلەرى مەن وتباسىلارى مەن جاقىندارىنىڭ قاۋىپسىزدىگى ءۇشىن قاۋىپتەنەتىندەرىن ءبىلدىردى. بۇل وتىنىشتەردى سوت قاناعاتتاندىردى”، – دەلىنگەن حابارلامادا.
باستى سوت وتىرىسى بيىلعى جىلدىڭ 6 قازانىنا بەلگىلەنگەن.
ەسكە سالايىق، قايرات قۇدايبەرگەن وتكەن جىلدىڭ 22 ساۋىرىندە ۇستالدى. 24 ءساۋىر كۇنى سوت قاۋلىسىمەن تەرگەۋ ورگاندارىنىڭ ءوتىنىشى قاناعاتتاندىرىلىپ، قايرات قۇدايبەرگەنگە قاتىستى ارەكەتتى سارالاۋ تۋرالى قاۋلى شىعارىلعانعا دەيىن ونى 30 تاۋلىك مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسىنا سانكتسيا بەرىلدى. سودان بەرى ونى قاماۋدا ۇستاۋ مەرزىمى ۇزدىكسىز ۇزارتىلىپ كەلدى.
قايرات قۇدايبەرگەنگە قاڭتار وقيعاسى كەزىندە جاپپاي تارتىپسىزدىكتەردى ۇيىمداستىردى دەگەن ايىپ تاعىلعان. الماتى قالاسى ءماسليحاتىنىڭ بۇرىنعى دەپۋتاتى پورتالىمىزعا تەرگەۋ كامەراسىنان جولداعان جازباشا جاۋابىندا قاڭدى قاڭتار جايلى ءوز نۇسقاسىن ايتىپ بەرگەن ەدى.
ال «ديكي ارمان» لاقاپ اتىمەن تانىلعان ارمان جۇماگەلديەۆ بىلتىر 7 قاڭتاردا ۇستالدى.
بۇدان بۇرىن ارمان جۇماگەلديەۆ پەن قايرات قۇدايبەرگەننىڭ ادۆوكاتتارى مالىمدەمە جاساعان.
سوتتىڭ ءبىرىنشى وتىرىسىندا 42 ايىپتالۋشى مەن جابىرلەنۋشىنىڭ ساۋالنامالىق دەرەكتەرى تىڭدالدى. ادۆوكاتتار مەن قۇقىق قورعاۋشىلار بۇل پروتسەسس كەم دەگەندە التى ايعا سوزىلادى دەپ بولجاپ وتىر.
Abai.kz