كازينوعا بارعان قىرعىزستان ازاماتتارىن بەس جىلعا دەيىن باس بوستاندىعىنان ايىرۋ ۇسىنىلىپ وتىر. بۇل تۋرالى پارلامەنتتىڭ بيۋدجەت، ەكونوميكالىق جانە فيسكالدىق ساياسات كوميتەتىنىڭ وتىرىسىندا دەپۋتات مارلەن ماماتاليەۆ ءمالىم ەتتى، دەپ حابارلايدى  24.kg باسىلىمى.

ونىڭ ايتۋىنشا، جاقىن ارادا ءتيىستى زاڭ جوباسى جوگوركۋ كەنەشكە جىبەرىلەدى.

«كازينو، بۋكمەكەرلىك كەڭسەلەر ەندى ءبىر جەردە جۇمىس ىستەيتىن بولادى. بۇل مەكەمەگە قىرعىزستان ازاماتى بارسا، ليتسەنزياسىنان ايىرىلادى. ەكىنشىدەن، ساراپشىلار توبىندا ازاماتتارعا ايىپپۇل سالىپ قانا قويماي، ەكى جىلدان بەس جىلعا دەيىن باس بوستاندىعىنان ايىرۋ كەرەك دەگەن ۇسىنىس ايتىلدى. بۇل جاعدايدا قىرعىز رەسپۋبليكاسىنىڭ ءبىر دە ءبىر ازاماتى كازينوعا بارمايدى دەپ ويلايمىن»، - دەدى حالىق قالاۋلىسى.

ەستەرىڭىزگە سالا كەتەيىك، «قىرعىز رەسپۋبليكاسىنداعى ويىن قىزمەتى تۋرالى» زاڭعا سايكەس 21 جاسقا تولماعان قىرعىزستان ازاماتتارى، شەتەلدىكتەر نەمەسە مۇمكىندىگى شەكتەۋلى ازاماتتار ويىن مەكەمەسىنىڭ كليەنتى بولا المايدى.

Abai.kz