«داۋىل تۇرسا ەشكىنى اسپاننان ىزدە» دەگەندەي، رەسەيگە سالىنعان سانكتسيا ورتالىق ازيانى دا اينالىپ وتپەۋدە.

بىراق ءبىر جاماندىقتىڭ، ءبىر جاقسىلىعى بولادى دەگەندەيىن، ۋكرايناداعى سوعىستان كەيىن ورتالىق ازيانى بۇرىن قىتاي مەن رەسەيدىڭ «ماڭگىلىك مۇددەسىندەگى» ايماق دەپ ساناعان باتىس پەن اقش تاۋەكەلگە بەل بۋىپ، ارىپتەس رەتىندە باۋىرعا تارتۋدىڭ ءتۇرلى جولدارىن قاراستىرۋعا كوشتى.

ەۋرووداقتىڭ كەزىندە «سانكتسيا سالىنعان تاۋارلار قازاقستان ارقىلى رەسەيگە ءوتىپ، ماسكەۋ بۇل تاۋارلاردى قارۋ جاساۋعا پايدالانىپ جاتىر» دەپ مالىمدەگەنىن دە جاقسى بىلەمىز.

بۇرىن ايىندا، جىلىندا ءبىر وا-عا توبە كورسەتەتىن ەۋرووداقتىڭ وكىلدەرى ەكى ورتانى تاپتاۋىرىندى جولعا اينالدىرا باستادى.

كەشە 28 قاراشادا ەۋروپا وداعىنىڭ سانكتسيالار جونىندەگى ارنايى وكىلى دەۆيد و'سالليۆان استاناعا كەلىپ، قازاقستان ۇكىمەت مۇشەلەرىمەن رەسەيگە سالىنعان سانكتسيالاردى اينالىپ وتۋگە شەكتەۋ قويۋ ماسەلەسىن تالقىعا سالدى.

ەستەرىڭىزدە بولسا، و'سالليۆان بيىل ساۋىردە قازاقستان مەن وزبەكستاندا بولعان ەدى. ەۋروپا وداعىنىڭ سانكتسيالار جونىندەگى ارنايى وكىلى سول كەزدە قازاقستان ۇكىمەتىمەن سانكتسيا تىزىمىندەگى تاۋارلاردى رەسەيگە جەتكىزبەۋ جونىندە ديالوگ ءجۇرىپ جاتقانىن مالىمدەگەن بولاتىن. ال، وسى جولى دەۆيد و'سالليۆان «ءبىز قوقاڭ-لوقى جاسامايمىز» دەپ كەسىپ ايتىپ:

- قازاقستانعا ساپارلاپ كەلگەن ءساۋىر ايىنان بەرى بىرقاتار جاقسى وزگەرىس بايقادىم. سوعىس مايدانىنان تابىلعان قالدىقتار اراسىندا رەسەيگە رەەكسپورتتالعان تاۋارلار سانى ازايعان. بىراق باسقا تاۋارلاردىڭ رەەسپورت مولشەرى كوبەيگەن. سوندىقتان قازاقستان مەن ەۋروپا وداعى بىرلەسە جۇمىس ىستەپ، ىنتىماقتاستىق نىعايتۋ قاجەت. الدا اتقارار جۇمىس كوپ، - دەدى.

باق وكىلدەرىمەن كەزدەسكەنىندە و'سالليۆان قازاقستان ۇكىمەتىنىڭ لاۋازىمدى تۇلعالارىمەن كەزدەسۋدىڭ ەكەۋارا ءتيىمدى بولعانىن ايىپ، قازاقستان ارقىلى سانكتسيا تىزىمىندەگى تاۋارلاردىڭ رەسەيگە ەكسپورتتالۋىن بولدىرماۋ ءۇشىن بۇنداي باسقوسۋلاردىڭ ءالى دە جيىندار جالعاساتىنىن العا تارتا كەلە:

- ءبىز قوقاڭ-لوقى كورسەتپەيمىز، ءبىز بارلىعىمىزعا ورتاق قاۋىپ-قاتەردى ەسكەرتىپ وتىرمىز. قازاقستاننىڭ سانكتسيانى اينالىپ وتەتىن جەرگە اينالۋى ەلگە دە، ەلدەگى كومپانيالارعا دا تەرىس اسەر ەتىپ، بەدەلىنە نۇقسان كەلتىرەرى انىق، - دەدى.

ەۋروپا وداعىنىڭ سانكتسيالار جونىندەگى ارنايى وكىلى و'سالليۆان بۇگىن، 29 قاراشادا وزبەكستانعا ات باسىن بۇرادى.

Abai.kz