قىركۇيەكتىڭ ورتاسىندا فرانتسيادا باستالعان نارازىلىقتاردىڭ ارتى شۋ شۇرقانعا ۇلاسقانىن وتكەندە جازدىق.

قاراشا كىردى، ەۋروپا ەلدىرى باسىلماي تۇر. گەوگرافيالىق ەرەكشىلىگى ءھام ساياسي جۇيە قۇرىلىمىنا بايلانىستى “دومينو ەففەكتىسى” دەگەن تەرمين بۇل جاقتا وڭاي ءارى ءجيى كورىنىس الادى. قارابايىر ايتساق، قامىسقا تۇسكەن شوقتاي، لاپ ەتپە ەففەكتى وڭاي ىسكە اسادى. قازىر دە سولاي. فرانتسيادان باستالعان نارازىلىقتار ەۋروپاداعى وزگە ەلدەرگە جىلدام تارادى. يتاليا جۇرتى دا كوتەرىلدى، البانيا حالقى دا كوتەرىلدى، باسقالار دا…

بۇگىن دە ەۋروپاداعىلار جاپپاي نارازىلىقتارعا شىعىپ جاتىر. كەي جەرلەردە كۇشتىك قۇرىلىمدارمەن قاقتىعىستار ورىن الۋدا. كەي جەرلەردە شاعىپ-قيراتۋلار تىركەلۋدە…

1) فرانتسيا شىقتى كوشەلەرگە (قىركۇيەكتىڭ ورتاسىنان باستاپ توقتاعان جوق). پاريج، بوردو، تۋلۋزۋ، رەنن، ليلل، نانت، مارسەل مەن ليوندا رەسمي ەسەپ بويىنشا 320 مىڭنان استام ادام شىققان. ال كاسىپرداقتار 500 مىڭ ادام جينالعانىن ايتادى. اۋەلدە بەيبىت باستالعان اكتسيالار بۇگىندە اگرەسسيۆتى سيپات الۋدا. مورودەرلىك، شاعىپ-قيراتۋلار كوبەيگەن. كۇشتىك قۇرىلىمدار جىلاتاتىن گازدار قولدانۋعا رۇقسات الدى. ال بيلىك مورودەرلەرگە ايىپپۇلدى 10 مىڭ ەۋروعا دەيىن ءوسىردى.

وقۋشىلار ءبىلىم جۇيەسىن جاقسارتۋدى، قوسىمشا رەسۋرس ءبولۋدى، وقىتۋشىلاردى كوبەيتۋدى، ءبىلىم عيماراتتارىن كەڭەيتۋدى جانە جاقسارتۋدا تالاپ ەتىپ شىققان. وعان كەيىن ستۋدەنتتەر مەن كاسىپوداقتار قوسىلدى. جۇرە كەلە باسقا دا الەۋمەتتىك، ساياسي توپتار قوسىلدى. ايلىقتى كوتەرۋ، مەملەكەتتىك جاردەماقىنى كوتەرۋ، الەۋمەتتىك تولەمدەردىڭ قىمباتتاۋى، ءومىر ءسۇرۋدىڭ قيىنداۋى، قارىزدىڭ ۇلعايۋى، ءدارى-دارمەك باعاسى، تۇرعىن ماسەلەلەرى، ميگراتسيا ماسەلەلەرى ت.ب. تالاپتار ايتىلۋدا.

بۇل جاقتاعى وقيعالار جالپىلاما - “وقۋشىلار مەن ستۋدەنتتەر كوتەرىلىسى” دەگەن اتاۋعا يە.

2) البانيا دا كوتەرىلىپ جاتىر. بۇل جاق مامىردىڭ سوڭىنان بەرى بۇلقىنىپ جاتىر. سودان بەرى توقتاعان جوق. جۇرت ەل پرەمەرى ەدي رامانىڭ دوعارىسقا كەتۋىن تالاپ ەتۋدە. ال ول ءۇزىلدى-كەسىلدى باس تارتتى، بۇدان.

بەيبىت اكتسيالار بۇل جاقتا دا اگرەسسياعا ۇلاسقان. الدىندا ءتىپتى اشۋلى توپ ەل استاناسى تيرانادا اكىمشىلىك عيماراتىن ورتەپ جىبەرگەن. “مولوتوۆ كوكتەيلدەرى” اتىلىپ، جىلاتاتىن گازدار شاشىلىپ، ناعىز استاڭ-كەستەڭ بولىپ جاتىر.

بۇل جاقتا ءبارى ەكولوگيالىق جانە انتيكوررۋپتسيالىق تالاپتاردان باستالعان. كەيىن الەۋمەتتىك-ەكونوميكالىق-ساياسي تالاپتارعا ۇلاستى. قازىر جاعداي ۋشىعىپ تۇر. بيلىك دەمونسترانتتارعا قاتىستى زاڭدى قاتايتىپ، كۇشتىك قۇرىلىمدارعا قۇزىرەتتى كەڭەيتۋدە…

تيرانا - نارازىلىقتاردىڭ ەپيتسەنترى. كورچە مەن شكودەر قالالارى دا نارازىلىقتارعا قوسىلعان.

بۇل جاقتاعى وقيعالار - “فلامينگو رەۆوليۋتسياسى” دەگەن اتاۋمەن باستالعان.

3) گەرمانيا تۋلادى. بۇگىن گەرمانيانىڭ 34 قالاسىندا ونداعان مىڭ ادام نارازىلىقتارعا شىقتى. ۇيىمداستىرۋشىلار ەسەبىنشە، 160 مىڭ دەلىنەدى. شىندىعىندا ودان ەداۋىر از.

دەمونستراتسيالار بەرليندە، ميۋنحەن، كەلن، گامبۋرگ، فرانكفۋرت پەن شتۋتگارتتە ءوتتى.

جاللى بۇگىن گەرمانياداعى اكتسيالار اگرەسسيۆتى سيپاتقا يە بولا قويعان جوق. بارىنشا بەيبىت ءوتتى.

ءبىلىم بەرۋ ساپاسىن ارتتىرۋ جانە مەكتەپتەرگە تارتىلاتىن ينۆەستيتسيالاردى كوبەيتۋ، ءومىر ءسۇرۋ قۇنىنىڭ وسۋىنە جانە ينفلياتسياعا قارسى ءتيىمدى شارالار قابىلداۋ، كاتاستروفالىق كليماتتىق وزگەرىستەردەن قورعانۋ جانە قورشاعان ورتانى بەلسەندى قورعاۋ، پسيحوتەراپياعا جانە تاۋەلدىلىك كەزىندەگى كومەككە قولجەتىمدىلىكتى جەڭىلدەتۋ، مىندەتتى اسكەري قىزمەتتىڭ ىقتيمال ەنگىزىلۋىنە جانە الەۋمەتتىك شىعىستاردىڭ قىسقارتىلۋىنا كەلىسپەۋشىلىك تالاپتارى ايتىلدى. كانتسلەر فريدريح مەرتستىڭ وتستاۆكاسىن تالاپ ەتكەندەر دە بولدى.

بۇل جاقتاعى وقيعالار - “Z بۋىننىڭ كوتەرىلىسى” دەگەن اتاۋعا يە بولدى.

Abai.kz