سارسەنبى, 21 اقپان 2024
بيلىك 4760 49 پىكىر 1 جەلتوقسان, 2023 ساعات 14:17

«مەنىڭ ءومىرىم». نازارباەۆتىڭ مەمۋارىندا نە جازىلعان؟

سۋرەت: الەۋمەتتىك جەلىدەن الىندى

ءبارىمىز بىلەمىز, كەزىندە ءبىر مەملەكەتتى نەمەسە جارتى الەمدى جۇمسا جۇدىرىعىندا، اشسا الاقانىندا ۇستاعاندار قولدارىنان بيلىك كەتكەننەن كەيىن جازۋ ۇستەلىنە وتىرىپ، مەمۋار جازۋعا كىرىسەدى. وسى ءبىر تىرلىك قازاقستاننىڭ بۇرىنعى پرەزيدەنتىن دە اينالىپ وتپەگەن سەكىلدى. سونىمەن نۇرسۇلتان نازارباەۆ «مەنىڭ ءومىرىم. بوداندىقتان – بوستاندىققا» اتتى ومىرباياندىق كىتاپ جازىپ، ءوزىن دەرەكتى پروزانىڭ تارلانى رەتىندە تانىتتى.

باق-تاعى دەرەكتەرگە كوز جۇگىرتسەك، جاڭا كىتاپتا بۇعان دەيىن نۇرسۇلتان نازارباەۆ تۋرالى جازىلعان عۇمىرنامالىق تۋىندىلاردان الا بوتەندىك بار. ول الابوتەندىك نۇرەكەڭنىڭ ەكىنشى ايەلىمەن ودان تۋعان ەكى بالاسى تۋراسىندا اعىنان جارىلۋى.

بۇرىنعى مەملەكەت باسشىسى بيلىكتە بولعان كەزدە ونىڭ ەكىنشى وتباسىسىنىڭ بار ەكەنىن وتاندىق جانە شەتەلدىك باق بۇرقىراتىپ جازعانىمەن، ن.نازارباەۆ ونىڭ نە جوققا، نە شىندىققا جاناسىمدى ەكەندىگى جايىندا ءلام-ميم دەپ جاق اشپاعان.

اتالعان كىتاپتىڭ باسپا كورگەنىن نۇرسۇلتان نازارباەۆتىڭ ءباسپاسوز حاتشىسى ايدوس ۇكىباي دا راستادى. ال نازارباەۆتىڭ رەسمي سايتىنىڭ اقپاراتىنشا، كىتاپتا بۇرىنعى پرەزيدەنت ءوزىنىڭ ءومىر جولىمەن قاتار، ەلدىڭ قالىپتاسۋى جانە دامۋ كەزەڭدەرى تۋرالى ەستەلىكتەرىن بولىسكەن.

«كىتاپتى «فوليانت» باسپاسى شىعارعان»، - دەيدى «وردا» سايتى. وندا «قاڭتار وقيعاسى»، «ەلباسى تۋرالى» زاڭنىڭ كۇشىن جويۋى، تۋىستارى، كۇيەۋ بالالارى تۋرالى، راحات اليەۆ پەن لاكشمي ميتتال تۋرالى جانە ەكىنشى ايەلى دەپ اتالىپ كەلگەن اسەل يساباەۆا مەن ودان تۋعان ەكى ۇلى جايلى جازعان.

ءبىز «وردا» سايتى ءسوز ەتكەن كىتاپتىڭ ۇڭعىل-شۇڭعىلىنا دەيىن ءسوز ەتىپ جاتپايمىز. وزىنە ەكى ۇل تاۋىپ بەرگەن ەكىنشى ايەلى اسەل يساباەۆامەن العاش قالاي جولىققانى جايىندا اۆتور:

«بىردە تالدىقورعانعا جولىم ءتۇستى. وسى ايماقتاردى ارالاۋداعى رەسمي ساپارىمدا ۇشاق ساتىسىنان مەنى گۇلمەن قارسى الدى... وزىمە گۇل سىيلاعان قىز جۇرەگىمە شوق ءتۇسىردى. ءارى كوز الدىمدا ۇنەمى كولبەڭدەپ ءجۇردى»، - دەپ جازادى.

ودان ارى وقيعا ءوربي كەلە، كوز الدىنان كەتپەگەن قىز بەينەسى قايتا قىلاڭ بەرۋىن، بىردە گازەتتەن كوزىنە وتتاي باسىلعانى اسەلدىڭ «ميسس قازاقستان» اتانعان فوتوسى بولعاندىعىن اشىپ سۋرەتتەيدى.

ەكىنشى نەكەدەن ومىرگە كەلگەن ۇلدارى تۋراسىندا وقىرماندارىمەن سىر بولىسەدى. بۇعان سارا الپىسقىزىنىڭ ءھام ءۇش قىزىنىڭ قالاي قاراعاندىقتارىن دا قالام ۇشىنا ىلىكتىرەدى.

جالپى كىتاپ ءبىر عانا اعىنان جارىلۋدان تۇرمايدى عوي. كىتاپتا بۇدان بولەك ءبىراز جەكە باستىق وي-تولعامدار بار.

«وردا» سايتى: «كىتاپتا جاڭاوزەن وقيعاسى، 2019 جىلعى بيلىكتىڭ اۋىسۋى ءھام قازىرگى مەملەكەت باسشىسى قاسىم-جومارت توقاەۆپەن اراداعى قارىم-قاتىناسى تەرەڭىرەك ءسوز بولادى»، - دەيدى.

كىتاپ تاياۋ ارادا وتاندىق كىتاپ دۇكەندەرىندە ساتىلۋعا شىعارىلادى.

Abai.kz

49 پىكىر

ۇزدىك ماتەريالدار

ادەبيەت

قاۋىرسىن

ءالىمجان ءاشىمۇلى 1511
ءالىپبي

لاتىن جايى

بيجومارت قاپالبەك 1556