ءار كۇنى تاڭەرتەڭ ءار ادامنىڭ ويىنا ءارتۇرلى وي كەلەدى...

جاڭا كۇن سونىمەن باستالادى...

بۇگىن مەنىڭ ويىما انا جانە شەشە دەگەن سوزدەر كەلدى...

ءسىرا، انامدى ساعىنعان بولۋىم كەرەك، بارىپ قايتقانىم ءجون اۋ دەيمىن - ول ەندى بولەك اڭگىمە...

ال، بۇل تۋرالى وي كەلگەنىنىڭ وزگە سەبەبى - جاقىندا عانا قازاقتىڭ كيەلى "شەشە" ۇعىمىنا سايقالدىق شابۋىل جاسالعانىنىڭ اسەرى مە دەپ ويلايمىن...

ءيا، جاقىندا عانا قازاق كيەسىنە اگرەسسيا بولدى.

وندا انا مەن شەشە ۇعىمدارىن اجىراتىپ، انانى - جاقسى، شەشەنى - جامان كورسەتۋ ارقىلى وسى ەكى كيەلى ۇعىم اراسىنا جىك سالۋ ارەكەتى جاسالدى.

بۇل - حالىققا قارسى جاسالعان "رۋحاني قىلمىس" ءتۇرى.

نەگە؟

سەبەبى، قازاق دۇنيەتانىمى ءۇشىن بۇل ەكى ۇعىم دا كيەلى، ساكرالدى ماعىناسى بار ۇعىمدار.

ەكەۋى دە ء"ومىر وزەگى" دەگەن ماعىنانى بىلدىرەدى.

ايىرماشىلىعى نەدە؟

بىزدە "انا" ۇعىمى - بۇكىل الەمدى جارىق دۇنيەگە اكەلگەن "انالىق باستاۋ" اتتى قاسيەتتى ماعىناعا يە.

انا - يە دە، كيە دە!

ال، شەشە - "ناقتى ۇرپاقتى ومىرگە اكەلۋ، ونى باۋىرىنا الۋ ارقىلى "انالىق باستاۋعا" قاراي اياق باسقان قادىرلى جان" دەگەندى بىلدىرەتىن كيەلى ۇعىم...

قازاقتىڭ دۇنيەتانىمدىق تاريحىندا انا مەن شەشە  وسىنداي ماعىناعا يە!

ال، ەندى، بۇگىندەگى شەشە تۋرالى جاعىمسىز ءسوز ايتۋ - ول وسى تۇنىعىمىزدى لايلاۋ ارەكەتى.

بۇل - حالىق ساناسىنىڭ ەڭ بۋىنسىز، ءبىرتۇتاس جەرىنە بالتا شابۋمەن بىردەي!

انالارىمىز امان بولسىن!

ءابدىراشيت باكىرۇلى

Abai.kz