بۇگىن ءباسپاسوز ءماسليحاتى ءوتتى. قازاقستاننىڭ ونەركاسىپ جانە قۇرىلىس ءمينيسترى قانات شارلاپاەۆ قر ۇكىمەتى مەن «ArcelorMittal» كورپوراتسياسى «ارسەلورميتتال تەمىرتاۋ» اق-نى قازاقستانعا بەرۋ تۋرالى كەلىسىم جاساسقانىن جەتكىزدى.

قانات شارلاپاەۆ تامىز ايىندا «ارسەلورميتتال تەمىرتاۋ» اق-دا ورىن العان اپاتتار بايلانىستى قر پرەزيدەنتى قاسىم-جومارت توقاەۆ كومپانيانىڭ ءوزىنىڭ ينۆەستيتسيالىق جانە وزگە دە مىندەتتەمەلەرىن ەلەۋلى تۇردە بۇزدى دەپ ايتقاندىعىن العا تارتىپ، قازاقستان ۇكىمەتى «ارسەلورميتتال تەمىرتاۋعا» ناقتى تالاپتار قويعاندىعىن جەتكىزدى.

فوتو: gov.kz

قر ونەركاسىپ جانە قۇرىلىس مينيسترلىگى مەن ادىلەت مينيسترلىگى وكىلدەرىنەن قۇرالعان توپ پەن «ArcelorMittal» كورپوراتسياسى اراسىنداعى 11 كەزەڭدىك دامىلسىز كەلىسسوزدەر ناتيجەسىندە 2022 جىلعى 9 جەلتوقساندا قازاقستان ۇكىمەتى مەن «ArcelorMittal» اراسىندا «Standstill Agreement» كەلىسىمىنە قول قويىلدى. وسى كەلىسىم ەندىگى جەردە قازاقستاندىق تاراپقا كاسىپورىندى باعالاۋ مەن اۋديت جۇرگىزۋگە مۇمكىندىك جاسادى.

«بۇل كەلىسسوزدەر پروتسەسىنىڭ ۇزاققا سوزىلۋىنىڭ نەگىزگى سەبەپتەرىنىڭ ءبىرى بولدى. ءبىزدىڭ ماقساتىمىز قىمبات جانە ۇزاققا سوزىلعان حالىقارالىق سوت پروتسەستەرىنە جول بەرمەي، كومبيناتتى ءادىل باعامەن ساتىپ الۋ بولدى. كەلىسسوزدەردىڭ جەدەلدىگى مەن شۇعىلدىعى كاسىپورىننىڭ توقتاپ قالۋىنا جول بەرمەۋ قاجەتتىلىگىنەن تۋىندادى»، - دەدى قانات شارلاپاەۆ.

قانات شارلاپاەۆ وسى بارىسىندا «ArcelorMittal» كومپانياسى حالىقارالىق كونسۋلتانتتاردىڭ ەسەپتەۋلەرىنە سايكەس كەلمەيتىن 3,5 ميلليارد دوللار سۇراعانىن اتاپ ءوتتى.

مينيستر ودان ارى: «قازاقستان ۇكىمەتى مەن «ArcelorMittal» اراسىنداعى كەلىسىمدى مەگا-مامىلە دەپ اتاۋعا بولادى، ول ءبىزدىڭ ەلىمىز ءۇشىن ايرىقشا ماڭىزعا يە. ءبىز باسقا ەلدەردىڭ ۇكىمەتتەرى تاپ بولعان كوپتەگەن تاۋەكەلدەردەن اۋلاق بولدىق»، - دەدى.

ەڭ ماڭىزدىسى ءۇش قادام:

بىرىنشىدەن، مەملەكەت اكتيۆتەردىڭ قۇنىن $3,5 ملرد -تان $286 ملن-عا دەيىن تومەندەتتى;

ەكىنشىدەن، مامىلەنى ىسكە اسىرۋعا مەملەكەتتىك بيۋدجەتتەن ءبىر دە-ءبىر تەڭگە جۇمسالعان جوق;

ۇشىنشىدەن، جاڭا ينۆەستور «ArcelorMittal» باس كومپانياسى الدىندا 4 جىل ىشىندە $250 ملن قىسقا مەرزىمدى قارىزدى جانە $450 ملن ۇزاق مەرزىمدى قارىزدى وتەۋ بويىنشا مىندەتتەمەلەردى ءوز مويىنا العاندىعى.

«286 ميلليون دوللار – بۇل تولىق جۇمىس ىستەيتىن ەكى كاسىپورىننىڭ قۇنى ەكەنىن ەرەكشە اتاپ وتكىم كەلەدى. سونىمەن قاتار، «ArcelorMittal» قازاقستان ۇكىمەتىنە ەشقانداي تالاپ قويمايدى. كەلىسىمگە حالىقارالىق زاڭناماعا تولىق سايكەس قۇقىقتىق ءورىس شەڭبەرىندە قول جەتكىزىلدى»، - دەپ اتاپ ءوتتى قانات شارلاپاەۆ.

سونىمەن قاتار، قازاق جاعى «ArcelorMittal» كومپانياسىن «قازاقستان حالقىنا» قايىرىمدىلىق قورىن قولداۋ ءۇشىن 16 ملرد تەڭگەگە جارنا جاساۋعا كوندىردى. امت-دان قورعا تۇسەتىن قاراجات قاراعاندى وبلىسى تۇرعىندارىنىڭ وزەكتى ماسەلەلەرىن شەشۋگە جانە الەۋمەتتىك ماڭىزى بار جوبالاردى ىسكە اسىرۋعا جۇمسالاتىن بولادى. اتالعان سومانىڭ 50%-ى تەمىرتاۋ قالاسىنىڭ قاجەتتىلىگىنە جۇمسالادى.

قازاقستان ۇكىمەتى مەن «ArcelorMittal» حالىقارالىق كومپانياسى قازاقستاندىق مەملەكەتتىك تىكەلەي ينۆەستيتسيالار قورىنىڭ «ArcelorMittal Temirtau JSC» جانە «ArcelorMittal Tubular Products Aktau JSC» مەتاللۋرگيالىق كاسىپورىندارىنىڭ بارلىق اكتسيالارىن «Qazaqstan Investment Corporation» اق (QIC) ساتىپ الۋى تۋرالى كەلىسسوزدەردى ءساتتى اياقتادى. بۇل مامىلە وسى كاسىپورىنداردىڭ بولاشاعى مەن ولاردىڭ تۇراقتى دامۋى ءۇشىن وتە ماڭىزدى.

كەلىسىمشارتقا سايكەس، QIC رەبرەندينگكە يە بولاتىن جانە جاڭا اتاۋ الاتىن وسى كاسىپورىنداردىڭ قىزمەتى ءۇشىن تولىق باسقارۋ مەن جاۋاپكەرشىلىكتى ءوز موينىنا الدى. 1995 جىلدان بەرى وسى اكتيۆتەرگە يەلىك ەتكەن «ArcelorMittal» قازاقستاندا مەتاللۋرگيا جانە تاۋ-كەن ءوندىرۋ سالالارىنىڭ دامۋىنا ايتارلىقتاي ىقپال ەتتى.

فوتو: Forbes.kz

جاڭا يەسى بيزنەسمەن اندرەي لاۆرەنتەۆ - وسى كاسىپورىنداردىڭ بيزنەس-پروتسەستەرىنىڭ ساقتالۋى مەن تيىمدىلىگىن جاقسارتۋ بويىنشا عانا ەمەس، سونىمەن قاتار ولاردىڭ تۇراقتى جۇمىسى مەن يننوۆاتسيالاردى ەنگىزۋدى بارىنشا قامتاماسىز ەتۋگە ۇمتىلۋدا.

مامىلە قۇنى 286 ميلليون اقش دوللارىن قۇرادى، بۇل «ArcelorMittal» مەنشىكتى كاپيتالىنىڭ 800 ميلليون دوللارعا تومەندەۋىنە اكەلدى. «ArcelorMittal» باسشىلىعى قىزمەتكەرلەرگە سوڭعى 28 جىلداعى ۇلەستەرى مەن جەتىستىكتەرى ءۇشىن العىس ءبىلدىرىپ، قازاقستاندا وتكىزىلگەن ۋاقىتتىڭ ماڭىزدىلىعىن اتاپ ءوتتى.

Abai.kz