كسرو تاراعان كەزدە باتىستىق ساراپشىلار: «ەكونوميكالىق جۇيەنى اۋىستىرۋعا بولادى. بىراق كەڭەس وداعى كەزىندە جىلۋ جانە سۋ قۇبىرلارىن ءھام تاسجولدار مەن قوقىس پوليگوندارى كاپيتاليزم رەلسىنە ءتۇسىرۋ وڭايعا تۇسپەيدى. وسىنىڭ ىشىندە جىلۋ جانە سۋ قۇبىرلارىنىڭ ورنى بولەك.

ويتكەنى، جىلۋ جانە سۋ قۇبىرلارى بۇگىنگى تاۋەلسىز مەملەكەتتەر ءۇشىن «جارىلماعان بومبا»، - دەگەن ساياسي-الەۋمەتتىك ساۋەگەيلىك ايتقان ەدى. سونداي-اق، باتىستىق ەكونوميكالىق كەڭەسشىلەر ونى الماستىرۋدىڭ جولدارىن جانە ورىستىق قۇبىردى باتىستىق جاڭا تەحنولوگيالارمەن الماستىرىپ، لوگيستيكا مەن ينفراقۇرىلىم قالىپتاستىرۋدىڭ، زاۋىتتار مەن جۇمىس ورىندارىن اشۋدىڭ ايلا-شارعىسىنىڭ ءجون-جورالعىسىن كورسەتكەنىمەن، نازارباەۆ بيلىگى بۇنىڭ ءبارىن قۇلاعىنا قىستىرمادى. ءتىپتى بالەنباي رەت سايلاناعان دەپۋتاتتار كورپۋسى بۇل ماسەلەگە قاتىستى نە قاۋقارلى زاڭ، نە لاۋازىمدى تۇلعالار باسىمەن جاۋاپ بەرەتىن جازالاۋ فۋنكتسياسىن ومىرگە اكەلۋگە قۇلىق تانىتپادى. بارلىعى دا تابيعي مونوپوليستەردىڭ ىعىنا جىعىلۋدان اسپادى.

تاپ وسى تابيعي مونوپوليستەردىڭ ىعىنا جىعىلۋدىڭ اقىرى مونوقالالارىمىزدىڭ جىلۋسىز قالىپ، حالىقتى قىستا قالتىراتاتىن فاكتورعا اينالىپ وتىر.

ورتالىق ازياداعى قىسى دا 40, جازى دا 40 گرادۋس سۋىق پەن ىستىقتان تۇراتىن ايماق – قازاقستان ءبىر كەزدەرى باتىس ەسكەرتكەن قاۋىپتەردىڭ الدىن السا، بىلتىرعى ءھام بيىلعى ەكىباستۇزداعى وقيعا ورىن الماس ەدى.

وسى قالانىڭ سوتى «ەكيباستۋزتەپلوەنەرگو» جشس بۇرىنعى باس ديرەكتورى پاۆل مەلنيچۋك، «ەتەتس» جشس باسشىسى ۆيكتور ۆەبەر مەن «ەكيباستۋزسكيە تەپلوۆىە سەتي» باسشىسى ەۆگەني گورۆاتتارعا قاتىستى سوت ۇكىمىن شىعاردى. العاشقى ەكەۋى بەس جىلعا سوتتالسا، گورۆات 2 جىل 6 اي تۇرمەنىڭ ءدامىن تاتاتىن بولادى.

ەندى ولاردىڭ ءىزباسارلارىنىڭ جايباسارلىعى مەن ەنجارلىعى ستەپنوگورسكىدە ورىن الىپ، سلاۆسكي مەن تسەلينوگراد كوشەلەرىنىڭ قيىلىسىنداعى جىلۋ قۇبىرى جارىلىپ، كوپ قاباتتى ۇيلەردىڭ تۇرعىندارى قاقاعان قىستا جىلۋسىز قالدى.

وتكەن جەكسەنبىلىك كۇندەردى ەلىمىزدىڭ بىرقاتار ايماقتارىندا، اتاپ ايتقاندا اقتاۋ، بالقاش پەن ەكىباستۇزدا سۋ جانە جىلۋ قۇبىرلارىندا اپات بولدى. قاقاعان قىستا قاراشا حالىق سۋسىز، جىلۋسىز قالدى، تاعى.

وسىدان سوڭ، قر ەنەرگەتيكا مينيسترلىگىنىڭ ۆيتسە-ءمينيسترى جاندوس نۇرماعانبەتوۆ دوعارىسقا كەتۋى ءتيىس دەگەن اڭگىمەلەر ايتىلا باستاعان. بۇگىن اتالعان مينيسترلىك نۇرماعانبەتوۆتىڭ قىزمەتتەن الىنعانىن راستادى. «باسقا قىزمەتكە اۋىسۋىنا بايلانىستى»، دەپ تۇسىندىرگەن بۇل جايدى.

ءتۇيىن: مونوقالالاردىڭ جىلۋ جۇيەلەرى جاڭا تەحنولوگيامەن تولىق الماستىرىلماي، بۇنداي اپاتتار ەلىمىزدىڭ شىعىسى مەن سولتۇستىگىندە ورىن الا بەرەتىن بولادى. ودان قۇتىلۋدىڭ جولى نازارباەۆ بيلىگى كەزىندە وسى سالاعا جاۋاپ بەرگەن بارشا جوعارى شەندىلەر مەن اكىمدەردىڭ تاقىمىنا قىل بۇراۋ سالىپ، ناعىز ايىپتىلاردى تور كوزدىڭ ار جاعىنا اتاندىرۋ. ولاردى قۇرىقتاۋدان تۇسكەن اقشانى جىلۋ مەن سۋ جۇيەلەرىن قالىپىنا كەلتىرۋگە جۇمساۋ. بىراق بيلىك وسى قادامعا بارا الا ما؟! ويقى-شويقى جولدارمەن ىشەك-قارىنىڭدى اۋزىڭا تۇسىرۋدەن، كۇلىمسى ساسىعان قوقىسپەن دەم العىزۋدان، قىستا تون كيىپ ۇيدە بۇرىسۋدەن قۇتىلار جولدى حالىققا كورسەتەتىن بىردە-ءبىر پارتيانىڭ بەلسەنىپ شىقپاۋى كوپ نارسەنى ۇقتىرادى.

Abai.kz