جاڭا اتتاعان جاڭا جىلدىڭ بۇگىن ءۇشىنشى كۇنى... مەرەكەنى اتاپ ءوتىپ، ءبىر-بىرىمىزبەن جۇزدەسىپ، قۇشاقتاسىپ، ءبىر ارنادا توعىستىق.

ارنايى قۇتتىقتاۋلار جىبەرىپ، سىيلىق ۇيلەستىرىپ، توسىننان دا قۋانتىپ ۇلگەردىك. وسى مەرەكەلىك كوڭىل-كۇي ءار وتباسىندا ورنادى. وسى اۋرانى مەن ءار ۇيدەن سەزىنە الدىم. سول ءۇشىن شىن قۋاندىم. سىرتتاي باقىلاپ وتىرسام، داستارحاندى جايناتىپ، اس ءمازىرىن ەرەكشە ەتىپ ۇسىنىپ، اعايىنعا سىي-قۇرمەت جاساپ جۇرگەن ۇيدەگى ايەلدەر، انالار، اپا-سىڭلىلەر. ەر ازاماتتاردى دا باقىلاعان ءتىپتى قىزىق. ولار دا ساۋدا ورتالىقتارىندا اسىعىس سىيلىق تاڭداپ، بازاردان ازىق-تۇلىك تولتىرىپ، زىر جۇگىرىپ ءجۇر. قۇشاعىندا گۇل مەن تورت، كەيبىرىندە ويىنشىقتار، جاڭا جىلدىق تاتتىلەر. ءيا، وسىنداي كەرەمەت ۇيلەسىم تاپقان ءار ۇيدە باقىت، بەرەكە، بالالاردىڭ شات كۇلكىسى. وتباسىلىق يديلليا بار ورتادا جاڭا جىلدىق كەش وسىلاي وتەدى. ايتپاعىم نە؟ تەك مەرەكە ەمەس، اپتانىڭ قاي كۇنى دە باقىتتى وتباسى ءۇشىن ەستە قالادى. بۇل جاڭا قوعامنىڭ ىرگەتاسىن قالايتىن ناعىز وتباسىنىڭ كەلبەتى. الايدا، «شىنايى وقيعالارعا نەگىزدەلگەن» مىسالدار جارقىن ساتتەردىڭ بىت-شىتىن شىعارادى. ايەلگە جۇدىرىق الا جۇگىرۋ، اۋىر سوققىعا جىعۋ، ءتىپتى كۇش سالىستىرۋعا كەلمەيتىن تۇستا ساناسۋ، تومەندەتۋ، جانشۋ سياقتى وقيعالار ءتىپتى ءتۇڭىلتىپ جىبەرەدى. ال بالاعا قاتىستى جاسالعان قىلمىسقا قاراي المايسىڭ...

جاڭا جىلداعى مەملەكەت باسشىسى قاسىم-جومارت توقاەۆتىڭ العاشقى سۇحباتى اتالعان ماسەلەنى قايتا قاراۋعا كۇش بەردى. «Egemen Qazaqstan» جالپىۇلتتىق گازەتىنە بەرگەن سۇحباتىن وقىپ، وندا ايتىلعان ءار ساليقالى ويعا سالماقتى قاراۋدى تالاپ ەتەدى. زاڭ مەن ءتارتىپ ورناعان قوعامنىڭ بولاشاعى زور ەكەنىن ەسكەرتكەن پرەزيدەنت ءبىرتۇتاس ۇلتتىڭ وركەندەۋىنە ۇلەس قوسۋعا شاقىردى، جالپىۇلتتىق بىرەگەيلىگىمىزدەن اجىرماي، ۇلتتىق قۇندىلىقتاردى جوعارى ۇستانۋدى ۇسىندى. ال تۇرمىستىق زورلىق-زومبىلىققا قارسى ءىس-قيمىلدى جاڭالاۋ، زاڭدى كۇشەيتۋگە باعىتتالعان وزگەرىستەر كوڭىلگە قوندى. تۇر­مىستىق زورلىق-زومبىلىق جاسا­عان­دارعا اكىمشىلىك جانە قىلمىستىق جاۋاپكەرشىلىك ەداۋىر كۇشەيتىلگەنى، جابىرلەنۋشىنىڭ قايتا-قايتا قىسىمعا ۇشىراماۋى ءۇشىن بۇدان بىلاي مۇنداي ىسكە قاتىستى تاراپتارعا ەكىنشى رەت تاتۋلاسۋ مۇمكىندىگى بەرىلمەيتىنى، سونداي-اق ايەلدەر مەن بالالارعا جاسال­عان زورلىق-زومبىلىققا قاتىس­تى قىلمىستاردى تەرگەۋمەن ايەل تەرگەۋشىلەر اينالىساتىنى سەنىم ۇيالاتتى.

ودان بولەك ىشكى ىستەر ورگاندارىندا ايەلدەردى زورلىق-زومبىلىقتان قورعاۋ­مەن شۇعىلداناتىن مامان­دار شتاتى قالپىنا كەلتىرىلىپ، ولاردىڭ قۇزىرەتى كۇشەيتىلەتىنى ماسەلەنى شەشۋگە جاسالعان ناقتى قادام ەكەنى بايقالدى. بىراق قوعامدا وزبىرلىق پەن زورلىق-زومبىلىقتىڭ كەز كەلگەن تۇرىنە مۇلدەم توزبەيتىن تۇسىنىك قالىپ­تاسپايىنشا، بۇل وزگەرىس­تەردەن ەش پايدا جوق. قابىرعانىڭ ار جاعىنداعى جان ۇشىرا كومەك سۇراعان داۋىسىنا ءۇن قاتپاساق، جاردەمدەسپەسەك، زاڭنىڭ قۇدىرەتى بولمايدى. مەن بۇل پىكىردى مىنبەرلەردەن ءجيى ايتىپ ءجۇرمىن. قوعامدىق كولىكتە، ورتادا، ۇجىمدا، وتباسىندا ورىن العان كەلەڭسىز وقيعا سۇراۋسىز قالماۋى كەرەك. نەگە، نە ءۇشىن دەپ سەبەبى سۇرالىپ، سالدارىمەن كۇرەس ءجۇرۋى قاجەت. پرەزيدەنت وسى تۇرعىدا قولعا الىنعان ناقتى شارالاردى اتاپ كورسەتتى. ولاي بولسا، قوزعالىس بار، جىلجۋ بار، تەك ونىڭ وڭ باعىتتا، دۇرىس شەشىمدەر قابىلدانۋىنا اسەر ەتۋ ماڭىزدى. وسى ماقساتتاعى ورتاق ىستەر اتقارۋعا كۇش سالامىز.

P.S. وتباسىلىق مەرەكەلەر، اتاۋلى كۇندەر سۇيىكتىلەر مەن سۇيە بىلگەندەر، شىنايى قۇرمەتتەپ، سىيلاسا بىلگەندەر جادىندا ساقتالادى. سوندىقتان وسى جىلى جادىراعان جىلى ەستەلىكتەر كوپ بولسىن!

قاراقات ابدەن،

قر ءماجىلىس دەپۋتاتى

Abai.kz