2005 جىلعى پرەزيدەنت سايلاۋى كەزىندە ۇيىنەن ءولى تابىلعان قوعام قايراتكەرى زامانبەك نۇرقادىلوۆتءى ەسكى بيلىك «ءوزىن-ءوزى ءۇش رەت اتىپ، قايتىس بولدى» دەپ ءاجۋالاپ، جاۋاپكەرشىلىكتەن جالتارعىسى كەلگەن ەدى.

ارادا ونداعان جىلدار وتسە دە باتىر ۇلىن حالقى ءبىر ساتتە ۇمىتقان جوق. اقيقاتتىڭ اشىلۋىن تالاپ ەتۋمەن كەلدى. بىراق ەسكى بيلىك قاشانعى ادەتىنە باسىپ ەستىسە دە، ەستىمەگەن كەيىپ تانىتتى.

ەندى مىنە، سول سەڭنىڭ بۇزىلعانىنا كۋا بولىپ وتىرمىز.

كەشە الماتىدا قوعام قايراتكەرىنىڭ 80 جىلدىعىنا وراي وتكىزىلگەن استا مارقۇمنىڭ تۋىپ وسكەن كەگەن اۋدانىندا ەسكەرتكىش ءمۇسىنى، الماتىداعى تۇرعان ۇيىنە ەسكەرتكىش تاقتا ورنالاتىنى ءمالىم بولدى.

بۇل اقجولتاي جاڭالىقتى اسقا ارنايى كەلگەن پرەزيدەنتتىڭ حاتشىسى بەرىك ءۋالي جەتكىزگەن. استا سونداي-اق سەنات توراعاسى ماۋلەن امىمباەۆتىڭ ارناۋ ءسوزى دە وقىلعان. كوپشىلىك نۇرقادىلوۆقا بولعان بيلىكتىڭ وڭدى كوزقاراسىن جاقسىلىققا باعالاپ، ءولىم قۇپياسىنىڭ كوپ ۇزاماي اشىلاتىنىنا سەنىم بىلدىرۋدە.

قوعام بەلسەندىلەرى دە جاڭا قازاقستاننىڭ ساياسي وزگەرىستەرىنىڭ ناقتى كورىنىسى رەتىندە باعالاۋدا. «قاڭتار وقيعاسىنان»، جۇزەگە اسپاي قالعان «مەملەكەتتىك توڭكەرىستەن» كەيىن حالىقتىڭ 30 جىل ەل بيلەگەن نازارباەۆ جۇيەسىنە سىني تالاپتارى كۇشەيگەن. مارقۇمنىڭ ۇلى قايرات نۇرقادىلوۆ تا پروكۋراتۋراعا اكەسىن اقتاۋ تۋرالى تالاپ ارىزىن جازعانى بەلگىلى بولعان ەدى.

اسقا جينالعان قوعام قايراتكەرلەرىنىڭ قاتارىندا ءسوز سويلەگەن رىسبەك سارسەنباەۆ زامانبەك مارقۇمعا الماتىدان كوشە اتىن بەرۋ ماسەلەسىن كوتەردى. قالا ورتالىعى بولماسا دا، ءوزى قالىڭ قازاقتى قونىستاندىرعان «شاڭىراق» اقشام اۋدانى جاعىنان قاراستىرۋدى ايتتى.

مارقۇم نۇرقادىلوۆ وڭتۇستىك استانانى باسقارىپ تۇرعاندا ءتورت بىردەي اۋداننىڭ ورىس اكىمدەرىن ورىنىنان الىپ، ءۇيسىز-كۇيسىز جۇرگەن زيالىلارعا، ونەر ادامدارىنا باسپانا بەرىپ، «جاپپاي جەكەشەلەندىرۋدىڭ» كەسىرىنەن قالاعا اعىلعان اۋىل جۇرتىنا قالا ماڭىنان تەگىن جەر بەرىپ، كەڭەس زامانىنان باستالعان قيتۇرقى ساياساتتىڭ جولىن كەسىپ، الماتىنى قازاقلاندىرعان ەدى. ەلى ءۇشىن باسىن ءباي تىككەن ەر قانداي قۇرمەتكە دە لايىق!

Abai.kz