1 اقپاندا قاراعاندىدا جەدەل جاردەم كولىگىنىڭ جۇرگىزۋشىسىنىڭ دەنەسىنە زاقىم كەلتىردى دەگەن كۇدىكپەن ىزدەۋ جاريالانعان ادام ۇستالدى دەپ حابارلادى باس پروكۋراتۋرا.

وقيعا 27 قاڭتاردا بولعان. تەرگەۋ كەزىندە ول جاسىرىنىپ، وعان ىزدەۋ جاريالانعان.

نۇربولات داكەباەۆ ەسىمدى ازامات ۋاقىتشا تەرگەۋ اباقتىسىنا قامالدى.

پوليتسيا داكەباەۆ قاراعاندىدان 200 شاقىرىم قاشىقتاعى قىستاۋدىڭ بىرىنەن تابىلعانىن حابارلادى.

ول ءۇش جىلعا دەيىن باس بوستاندىعىنان ايىرىلۋى مۇمكىن.

36 جاستاعى كۇدىكتى جەدەل جاردەم جۇرگىزۋشىسىمەن ۇرىسىپ، ونى بىرنەشە رەت سوققىعا جىققان. بۇل وقيعانى فەلدشەر ۆيدەوعا ءتۇسىرىپ العان.

جۇرگىزۋشى نەۆرولوگيا بولىمىنە جاتقىزىلعان. ونىڭ باس ميى شايقالىپ، مۇرنى سىنعان. كوزىنە دە زاقىم كەلگەن.

فوتو: qamqor.gov.kz

Abai.kz