وسى بىزدە كىم-كىمنىڭ دە ءسال بيلىككە قولى جەتسە، بىردەن وزگەرىپ سالا بەرەتىندىگى نەسى ەكەن؟ وزىنە بەكىتىپ بەرىلگەن سالاداعى اتقارعان جۇمىسىنىڭ ناتيجەسىمەن ەمەس، ءساندى كيىمى مەن قول سومكەسى سەكىلدى كاكىر-شۇكىرمەن ماقتاناتىندىعىن قايتەرسىڭ؟..

مۇنداي تىراشتانۋشىلىقتى الەمنىڭ وركەنيەتتى ەلدەرىندە ارتتا قالعاندىق، ياعني ناداندىق دەپ سانايدى. ولار بىزدەردەگىدەي بايلىعىن اسىرىپ كورسەتپەيدى، قايتا جاسىرىپ كورسەتەدى. قاراشا حالىق الدىندا نەعۇرلىم قاراپايىم كۇيىندە كورىنۋگە تىرىسادى.

ال بىزدە…بىزدە ءبارى كەرىسىنشە. مىنە، ورىنتاققا جايعاسىپ تا ۇلگىرمەگەن ەلىمىزدىڭ دەنساۋلىق ساقتاۋ ءمينيسترى اقمارال ءالنازاروۆا جۋرناليستەر الدىندا جايسىز جاعدايعا ۇشىرادى. بۇل سۋ جاڭا ءمينيسترىمىز الەمجەلىگە تەك قانا برەندتىك ستيلگە جاتاتىن اسا قىمبات كيىمدەرىمەن ساندەنىپ تۇسكەن سۋرەتتەرىن سالىپ قويىپتى. قازىر بىردەڭەنى جاسىرۋ وڭاي ەمەس قوي، ەرىگىپ جۇرگەن جۋرناليستەر بۇل سۋرەتتەن ءمينيستردىڭ ءوزى ونشا ءمان بەرمەيتىن جايتتى بايقاپ قويىپتى. سويتسە، كيىپ تۇرعان كويلەگىنىڭ باعاسى 900 مىڭ تەڭگە، ال جاي عانا قول سومكەسى 250 مىڭ تەڭگە تۇراتىن كورىنەدى.

ءبىر قىزىعى، ءمينيسترىمىزدىڭ اسا اۋەسقوي جۋرناليستەردىڭ سۇراقتارىنا بەرگەن جاۋابىندا قاراعاندا بۇل دۇنيەلەردى اسا قىمبات نارسە ەمەس، جاي عانا قاراپايىم دۇنيەلەردىڭ قاتارىنا جاتقىزاتىن كورىنەدى. ول كىسىنىڭ ايتۋىنشا، كويلەگىن مەرەيتويعا دەپ ساتىپ العان. ال قول سومكە دەگەن نە ءتايىرى، ونى ەلىمىزدەگى كەز-كەلگەن ايەل قينالماي-اق ساتىپ الادى ەكەن.

ەندى بۇعان نە ايتارسىز؟ مينيستر شىنىمەن وسىلاي ويلاي ما ەكەن؟ اۋ، ەلىمىزدىڭ باسىم بولىگىنىڭ ايلىعى شايلىعىنا جەتپەي، الدى كۇنكورىستىڭ قامىمەن انگلياعا، ارتى وڭتۇستىك كورەياعا اسىپ جاتقان ايەلدەردىڭ قايسىسىنىڭ قولىنان وسىنداي سومكە كورىپ ەدىڭىز، مينيستر حانىم؟

ءبىز، ارينە، اقمارال ءالنازاروۆانىڭ ءوزى باسقاراتىن سالاداعى بىلىكتىلىگىنە كۇمان كەلتىرگەلى وتىرعان جوقپىز. بۇل كىسىنىڭ تالاي ساتىدان وتكەندىگىنەن ءارى مەديتسينا سالاسىنان مول تاجىريبە جيناعان جان ەكەندىگىنەن مول حاباردارمىز. تەك اباي حاكىم ايتپاقشى «وزىڭدە بارمەن كوزگە ۇرىپ» قالاتىنداي جاعىمسىز ارەكەتتەردەن اۋلاق بولعاندىعىن قالار ەدىك.

وسىمەن قاتار ءبىز شەتەلدىك مينيستر حانىمدار دا برەندىك قىمبات كيىمدەردەن تارشىلىق كورىپ وتىرعانماعاندىعىن ەسكە سالا كەتەر ەدىك. ولار دا اسا ءساندى كيىنەدى. الايدا ولاردىڭ بىزدەردەن ايىرماشىلىعى، مۇنداي ساندىك كيىمدى حالىقارالىق كەزدەسۋلەردە نەمەسە شەتەلدىك اسا جوعارى دارەجەلى دەلەگاتسيالاردى قارسى الاردا، بولماسا حالىقارالىق شارتتارعا قول قويۋ ءراسىمى سەكىلدى ەرەكشە جاعدايدا عانا كيىنەدى. ال قاراپايىم جۇمىس بارىسىندا سول ءجۇرىپ-تۇرۋعا لايىقتى ورتاڭقول كيىمدەرمەن جۇرە بەرەدى. قىزمەتتىك ەتيكا دەگەنىمىز وسى. مۇنى ءبىزدىڭ حانىمدارىمىز بىلە مە، جوق پا، ودان حابارسىزبىز.

جالپى، قاراپايىمدىلىق پەن تالعامپازدىق كىم-كىمگە دە جاراسارى ءسوزسىز. اسىرەسە، حالىق ءوز اقشاسىنا جالداعان مەملەكەتتىك بيىك لاۋازىمدى جاندارعا. بۇل ءتىپتى قاتاڭ قاعيداعا اينالسا يگى.

جايبەرگەن بولاتوۆ

Abai.kz