كەشە پرەزيدەنت قاسىم-جومارت توقاەۆ تۇركياعا رەسمي ساپارمەن باردى. مەملەكەت باسشىسىن انكارا قالاسىنداعى ەتيمەسگۋت اۋەجايىنان تۇركيا پرەزيدەنتى رەجەپ تايىپ ەردوعان كۇتىپ الدى. قازاقستان پرەزيدەنتىنىڭ كەلۋىنە وراي قۇرمەت قاراۋىلى ساپ تۇزەدى.

ونان سوڭ انكاراداعى پرەزيدەنت سارايىندا سالتاناتتى قارسى الۋ ءراسىمى ءوتتى.

مەملەكەت باسشىسىنىڭ كەلۋىنە وراي قۇرمەت قاراۋىلى ساپ تۇزەدى. سارايعا كەلگەن ساتتە پرەزيدەنت كورتەجىن سالت اتتى گۆارديا باستاپ ءجۇردى. قازاقستان مەن تۇركيانىڭ مەملەكەتتىك ءانۇراندارى ورىندالىپ، زەڭبىرەكتەن 21 دۇركىن وق اتىلدى. ەكى ەلدىڭ كوشباسشىلارى قۇرمەت قاراۋىلى الدىنان ءجۇرىپ ءوتىپ، ءبىر-بىرىنە رەسمي دەلەگاتسيا مۇشەلەرىن تانىستىردى. سودان كەيىن مەملەكەتتەر باسشىلارى شاعىن قۇرامدا كەلىسسوز جۇرگىزدى.

مەملەكەت باسشىسى قوناقجايلىق تانىتقانى ءۇشىن تۇركيا پرەزيدەنتىنە العىس ايتىپ، ارىپتەسى مەن بارشا تۇرىك حالقىن ۇلتتىق مەرەكە – رەسپۋبليكا كۇنىمەن قۇتتىقتادى. ءوز كەزەگىندە رەجەپ تايىپ ەردوعان ەكى ەل اراسىنداعى سان قىرلى ىنتىماقتاستىقتى ودان ءارى تەرەڭدەتە تۇسۋگە نيەتتى ەكەنىن راستادى.

مەملەكەتتەر باسشىلارى ماڭگى دوستىق پەن كەڭەيتىلگەن ستراتەگيالىق سەرىكتەستىك رۋحىنداعى ەكىجاقتى قارىم-قاتىناستىڭ قارقىندى دامىپ كەلە جاتقانىن اتاپ ءوتتى. اڭگىمەلەسۋ بارىسىندا ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىقپالداستىقتى نىعايتۋ پەرسپەكتيۆاسىنا ايرىقشا نازار اۋدارىلدى.

سونداي-اق پرەزيدەنتتەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.

ونان كەيىن پرەزيدەنتتەردىڭ كەلىسسوزى ەكى ەلدىڭ رەسمي دەلەگاتسيا مۇشەلەرىنىڭ قاتىسۋىمەن ودان ءارى جالعاستى. قاسىم-جومارت توقاەۆ باۋىرلاس ەلدىڭ رەسپۋبليكا كۇنى قارساڭىنداعى جۇزدەسۋ تەرەڭ سيمۆولدىق مانگە يە ەكەنىنە نازار اۋدارىپ، تۇركيا پرەزيدەنتى مەن بارشا تۇرىك حالقىن ۇلىق مەرەكەمەن قۇتتىقتادى.

– ءسىزدىڭ پاراساتتى باسشىلىعىڭىزدىڭ ءارى كورەگەن ساياساتىڭىزدىڭ ارقاسىندا تۇركيا اۋقىمدى رەفورمالاردى تابىستى جۇزەگە اسىرىپ جاتىر. ەلىڭىز ساياسي جانە ەكونوميكالىق تۇرعىدان جاڭعىرىپ، قارقىندى دامىپ كەلەدى. تۇركيانىڭ ابىروي-بەدەلى جىلدان جىلعا ارتا تۇسۋدە. ءبىز ءوزىڭىزدى الەمدەگى اسا ىقپالدى كوشباسشىلاردىڭ ءبىرى رەتىندە بىلەمىز. ءسىزدىڭ اشىق ءارى باتىل ۇستانىمىڭىز، بەيبىتشىلىك پەن ادىلدىك جولىنداعى كۇش-جىگەرىڭىز جاھاندىق دەڭگەيدە مويىندالىپ وتىر. تۇرىك حالقىنىڭ مارتەبەسى الداعى ۋاقىتتا دا اسقاقتاي بەرەدى دەپ سەنەمىن. قازاق ەلى تۇركيانى ارقاشان قولدايدى جانە اعايىن جۇرتتىڭ ءاربىر جەتىستىگىنە شىن جۇرەكتەن قۋانادى، – دەدى قاسىم-جومارت توقاەۆ.

قازاقستان پرەزيدەنتى ءوزارا بايلانىستاردى ودان ءارى نىعايتۋعا ەرەكشە ءمان بەرەتىنىن اتاپ ءوتتى.

– قازاق-تۇرىك ىقپالداستىعى تەرەڭنەن تامىر تارتادى. تاريحىمىز – ورتاق، ءتىلىمىز بەن ءدىلىمىز – ءبىر، ءداستۇرىمىز – ۇقساس. ەكى ەلدىڭ ساياسي ىنتىماقتاستىعى ءوزارا سەنىمگە جانە مىزعىماس دوستىققا نەگىزدەلگەن. مەملەكەتتەرىمىزدىڭ اراسىندا شەشىمىن تاپپاعان ەشقانداي ماسەلە جوق. ءبىز ەكىجاقتى جانە حالىقارالىق دەڭگەيدە ءبىر-بىرىمىزگە ۇنەمى قولداۋ كورسەتىپ ءجۇرمىز. ساۋدا-ەكونوميكا سالاسىنداعى قارىم-قاتىناسىمىز دا كۇشەيىپ كەلەدى. تۇركيا – قازاقستاننىڭ ەڭ ءىرى بەس ساۋدا سەرىكتەسىنىڭ ءبىرى. بۇعان قوسا، انادولىداعى اعايىن ۇلتتىق ەكونوميكامىزعا كولەمدى قارجى سالعان باستى 10 ينۆەستوردىڭ قاتارىنا كىرەدى. قازاقستاندا بىرقاتار تۇرىك كومپانيالارى تابىستى جۇمىس ىستەپ جاتىر. ءبىز تۇرىك باۋىرلارىمىزعا جان-جاقتى قولداۋ كورسەتىپ، ولاردىڭ كاسىپ جۇرگىزۋى ءۇشىن قولايلى جاعداي جاساۋعا تىرىسامىز، – دەدى مەملەكەت باسشىسى.

قاسىم-جومارت توقاەۆتىڭ ايتۋىنشا، رەجەپ تايپ ەردوعاننىڭ بيىل مامىر ايىندا قازاقستانعا مەملەكەتتىك ساپارى جەمىستى بولىپ، بىرقاتار ماڭىزدى ۋاعدالاستىققا قول جەتكىزىلدى. ساپار اياسىندا ەكى ەل اراسىنداعى ستراتەگيالىق ىنتىماقتاستىق كەڭەسىنىڭ التىنشى وتىرىسى ۇيىمداستىرىلدى. ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالاردا اۋقىمدى جوبالار تابىستى جۇزەگە اسىرىلۋدا.

ەڭ باستىسى، قارىم-قاتىناس ماڭگىلىك دوستىق جانە كەڭەيتىلگەن ستراتەگيالىق سەرىكتەستىك دەڭگەيىنە كوتەرىلدى.

– سەرىكتەستىگىمىزدى ودان ءارى دامىتۋ ءبارىمىزدىڭ مۇددەمىزگە ساي كەلەدى. ەرتەڭ وزىڭىزبەن بىرگە تۇركى مەملەكەتتەرى ۇيىمىنىڭ 13-سامميتىنە قاتىسامىز. جاقىن ارادا انتاليادا سور31 كليماتتىق فورۋمى وتەدى. مەن وسى بەدەلدى باسقوسۋعا قاتىسۋدى جوسپارلاپ وتىرمىن. مۇنىڭ ءبارى ەكىجاقتى جانە كوپجاقتى بايلانىسىمىزدى دامىتۋعا تىڭ سەرپىن بەرەتىنى ءسوزسىز، – دەدى قازاقستان پرەزيدەنتى.

تۇركيا پرەزيدەنتى قاسىم-جومارت توقاەۆتى جانە باۋىرلاس قازاق حالقىن رەسپۋبليكا كۇنىمەن قۇتتىقتادى. رەجەپ تايىپ ەردوعان جاقىندا انكارادا قازاق مەملەكەتتىلىگىنىڭ تاريحىنا ارنالعان «قۇرىلتاي فەنومەنى» كىتابىنىڭ تۇساۋكەسەرى وتكەنىن ايتتى.

بۇدان بولەك، «ناۋرىز – تۇركى الەمىنىڭ ورتاق مۇراسى» كىتابى قازاق تىلىنە اۋدارىلدى.

– بيىل مامىر ايىندا استاناعا جاساعان ساپارىم بارىسىندا بىرقاتار ماڭىزدى قۇجاتقا، سونىڭ ىشىندە ماڭگىلىك دوستىق جانە كەڭەيتىلگەن ستراتەگيالىق سەرىكتەستىك تۋرالى دەكلاراتسياعا قول قويدىق. ستراتەگيالىق ىنتىماقتاستىق كەڭەسىنىڭ كەلەسى وتىرىسىندا ءوزارا قارىم-قاتىناستى ناقتى قادامدارمەن بەكىتە تۇسەمىز. ءبىز تاۋار اينالىمىن 15 ميلليارد دوللارعا جەتكىزىپ، ينۆەستيتسيالىق بايلانىستاردى جانداندىرۋعا نيەتتىمىز، – دەدى تۇرىك ەلىنىڭ باسشىسى.

كەلىسسوز بارىسىندا ەكى ەل باسشىلارى كولىك-لوگيستيكا، ەنەرگەتيكا، جاساندى ينتەللەكت، اۋىل شارۋاشىلىعى، قورعانىس ونەركاسىبى جانە مادەني-گۋمانيتارلىق باعىتتاعى ىقپالداستىق ماسەلەلەرىن تالقىلادى.

Abai.kz