ارمەنيا باسشىسى نيكول پاشينيان ءوز ەلىنىڭ ناتو-نىڭ رەسەيلىك بالاماسى بولىپ تابىلاتىن – ۇقشۇ-دان شىعاتىنىن مالىمدەدى. ارمەنيا ماسكەۋگە ۋلتيماتۋم قويىپ، ۇجىمدىق قاۋىپسىزدىك شارتى ۇيىمىنان (ۇقشۇ) شىعامىز دەپ قوقان-لوقى جاسادى. قانداي تالاپتاردى قوياتىندىعى پرەمەر-مينيستر نيكول پاشينياننىڭ اۋزىنان شىقتى.

پاشينيان ارمەنيانىڭ ۇقشۇ-عا قاتىسۋىنىڭ توقتاتىلعانىن راستاپ، رەسپۋبليكا وكىلىنىڭ ۇيىمنان شاقىرتىلىپ الىنعاندىعىن، ال ارميانداردىڭ بۇدان بىلاي وسى ۇيىمنىڭ جينالىستارى مەن كەزدەسۋلەرىنە قاتىسپايتىنىن باسا اتاپ ءوتتى.

«قازىر ءبىز ۇقشۇ-داعى قۇرمەتتى ارىپتەستەرىمىزدەن ارمەنياداعى ۇقشۇ-نىڭ جاۋاپكەرشىلىك باعىتى قانداي دەگەن ساۋالعا جاۋاپ بەرۋىن كۇتەمىز ءھام تالاپ ەتەمىز»، - دەدى پاشينيان.

وسى ۇيىم ارمەنيانى قانداي شەكارادا قورعاۋعا دايىن ءھام مۇلدە دايىن با دەگەن ساۋالعا جاۋاپ بەرگىسى كەلمەي وتىرعاندىعىنا توقتالىپ ءوتتى.

پاشينيان ەگەر ۇقشۇ ازىربايجانمەن اراداعى قاقتىعىسىندا ارمەنيانىڭ مۇددەسىن ەلەمەيتىن بولسا، وندا بۇل ەل بۇل ۇيىمعا مۇشەلىكتەن باس تارتاتىنىن اشىق ايتتى. «وسىلاي بولماسا، ارمەنيا رەسپۋبليكاسى ۇقشۇ-دان مۇلدەم شىعادى»، - دەدى پرەمەر-مينيستر. بىراق ونىڭ قاي كەزدە بولاتىن مەرزىمىن ايتۋعا پاشينياننىڭ ەش باتىلى بارمادى.

رەسەيلىك ساراپشى ەل ميۋريد (اناتولي نەسميان) ارمەنيانىڭ ۇقشۇ-دان شىعۋى قازىردىڭ وزىندە ءسوزسىز دەگەن پىكىر ءبىلدىردى. ەرەۆان ۇيىمنان شىعۋ مۇمكىندىگىن كۇتىپ وتىر. بۇل رەسەيلىك بلوك ءوزىنىڭ تولىق دارمەنسىزدىگىن كورسەتكەندىكتەن، باسقا ەلدەر دە ودان شەتتەي باستايدى دەۋگە نەگىز بار.

«شاماسى، ارمەنيا ۇقشۇ-دان شىعۋ تۋرالى شەشىم قابىلدانىپ قويعان سياقتى. بارلىق ماسەلە بۇل شەشىمدى قانداي دا ءبىر تۇردە رەسىمدەۋ جانە وعان سەنىمدى سەبەپ جاساۋ عانا قالىپ وتىرعانى جاسىرىن ەمەس. ماسەلە بۇل ارادا باسقا: ۇقشۇ ءۇشىن بۇل وقيعا باسقالارعا ساباق بولىپ، ونىڭ قۇرامىنداعى باسقا ەلدەر دە شىعۋ نەمەسە تاراتۋ ماسەلەسىن ۋاقىتى كەلگەندە كوتەرەدى»، - دەپ جازدى رەسەيلىك ساراپشى.

كەرىمسال جۇباتقانوۆ

Abai.kz